1 Kurintu 1:17 - Manobo Western Bukidnon

¹⁷ Su si Kristu, wazè e zin sug̵ua wey a mekebewtismu, kekenà, iyan insug̵ua zin kedì su wey ku ikesangyew is Meupiya he Tudtulanen. Ne impesavut din kedì he kinahanglan he kenè ku egemiten is kelibutanen he ketau te kegkag̵i su kela ke egkevenaran is menge etew tenged te ketau ku ne egketembunan is gehem ni Kristu te kedlibriya kandan pinaag̵i te kebpatey zin duen te krus.

1 Kurintu 1:17 Кръстосани препратки

Juan 4:1

Nezineg te menge Perisiyu is tudtul he mezakel is nengehimu ni Jesus he menge sumusundan wey mezakel is nengebewtismuwan ni Jesus kenà te ki Juan; asal wazà iyan si Jesus mebewtismu, kekenà, iyan is menge sumusundan din. Ne hein nezineg daan ni Jesus haazà he tudtul, mid-awà diyà te prubinsya he Hudiya ne mid-ulì diyà te prubinsya he Geliliya.

Nengeulaula 10:48

Ne insug̵ù ni Pedro he bewtismuwi sikandan wey metueni he nekidsevaha sikandan ki Jesu Kristu. Ne hein nepasad haazà, si Pedro, midhengyuan eni Cornelio he med-ubpè dè pa ziyà te kandan seled te egkepipira he andew.

1 Kurintu 2:1

Siak, menge suled, dutun te aney ku kebpekeuma ziyan, hein impesavut ku ziyan te keniyu is mehitenged te Megbevayà, ne wazè ku g̵emita is ketau te kegkag̵i wey is menge ketezengan he mibeelan te etew zà duen.

1 Kurintu 2:13

Ne tenged kayi iyan ibpenurù dey is impesavut kenami te Wag̵as he Mulin-ulin, ne kenà iyan is impesavut kenami te memetau he etew zà duen. Is ebpuun diyà te Wag̵as he Mulin-ulin, ne iyan ibpesavut dey ziyà te menge etew he mid-ulinan daan te Wag̵as he Mulin-ulin.

2 Kurintu 1:12

Duen, menge suled, idantal zey ne netuenan dey he tutuu heini, ne iyan is: layun meupiya is ulaula zey ziyà te minsan hentei he etew, lavew en diyan te keniyu. Su layun key edtuman te egkesuatan te Megbevayà ne utew hustu is tuyù dey. Wazè dey g̵emita is ketau zey te etew zà duen, kekenà, iyan igkehimuwa zey te langun is mekeg̵eg̵ehem he tavang te Megbevayà.

2 Kurintu 10:10

iyan, duen egkag̵i he siak si Pablo, utew a mevurut he edawey keniyu emun ebpekidlalag a keniyu pinaag̵i te surat, iyan, emun diyan a te keniyu, telawen e kun ne kenè e kun metau he egkag̵i.

2 Kurintu 11:6

su minsan ke kenà a metau he egkag̵i netuenan ku mulà ke hengkey is tutuu he tuluuwen. Ne iyan heini impesavut dey keniyu zengan te minsan keenu he timpu wey te minsan hengkey he paag̵i.

2 Kurintu 4:2

Sikan is menge mahawag he ulaula he meeles he ebeelan te zuma, kenè dey mulà ebeelan. Kenè key edtarùtarù ne kenè dey edhelinen is Lalag te Megbevayà, kekenà, hustu is kedsengyawa zey su wey mesavut te minsan hentei he kenà tarù is ebeelan dey. Iyan edsusi kayi is Megbevayà.

2 Pedro 1:16

Sikan is impenurù dey keniyu mehitenged te egkeulaula keuzemà ke edlikù is Nengazen tew he si Jesu Kristu he utew zekelà is gehem din, ne kenà heini tetezemen dà he midhimu te etew zà duen. Netuenan dey su nemesahan dey en is mekeg̵eg̵ehem he anlag din.