1 Juan 3:5 - Manobo Western Bukidnon

⁵ Netuenan niw en he umba mibpeetew si Kristu su wey zin maawà is menge salè tew. Ne netuenan niw zaan he wazà minsan sevaha he salà he nehimu zin wey egkehimu zin.

1 Juan 3:5 Кръстосани препратки

Mateo 1:21

Maama is id-anak din ne ngezani nu ki Jesus, he ke và dà egkeg̵iya, Menluluwas, su iyan sikandin edlibri te menge etew he edsunud kandin wey kenè en sikandan siluti tenged te menge salè dan.”

Lucas 23:41

iyan, sikita is dezuwa, ne engayan en he edhimetayan ki su id-ulì dini te kenita is kelelalung ta. Iyan, heini he etew mulà, ne wazè nehimu zin he mezaat.”

Lucas 23:47

Ne zutun, sikan is kepitan te menge sundaru zutun, hein neehè din heini is neulaula ne nekezalig te Megbevayà, ke sikandin te, “Tutuu ves iyan he wazà mezaat he ulaula kayi he etew!”

Juan 1:29

Hein mid-ilis he andew zutun, naahà ni Juan si Jesus he edhendiyà te kandin, ne ke si Juan diyà te menge etew, “Iyan heini sikan is etew he egngezanan te ibpemuhat he Nati he Kerehidu he ibeg̵ey te Megbevayà su pinaag̵i kandin egkeawà is menge memezaat he ulaula te menusiyà.

Juan 1:31

Hein aney,” ke si Juan, “wazè ku metueni ke hentei sikandin, iyan, umba ebpemewtismu a su wey metueni te menge zuma tew he menge kevuwazan ni Israyil he meg̵aan sikandin ebpekeuma.”

Juan 14:30

Mevavè dà utew is menge lalag ku keniyu su meg̵aan en ebpekeuma si Setanas is egalen te menge etew zini te kelibutan he kuntada ku. Wazè din keg̵ehem kediey,

Juan 8:46

Ne hentei keniyu is ebpeketistig̵us te mezaat he mibeelan ku? Wazà! Emun tutuu is egkeg̵iyen ku, maan is kenè kew ebpeketuu?

2 Kurintu 5:21

Wazà minsan hengkey he mezaat he ulaula ni Kristu, iyan, midhimu te Megbevayà he iyan sikandin midsilutan tenged te salè tew su wey pinaag̵i te kebpekidsevaha tew kandin, egkehimu he ed-isipen kiw he metazeng te Megbevayà.

1 Timoteo 1:15

Duen erubasa he utew tutuu ne kinahanglan he tuuwi te minsan hentei; ne iyan is: “Midhendini si Jesu Kristu te kelibutan wey zin libriya te silut is menge mekesesalà.” Ne siak, iyan a tuwas he lalung te langun kandan.

1 Timoteo 3:16

Ne netuenan tew te langun he lavew pa te langun is imbugnà he tuluuwen he midtuuwan tew. Mibpeetew si Kristu; midtistig̵usan te Wag̵as he Mulin-ulin he metazeng sikandin; naahà sikandin te menge velinsug̵uen te Megbevayà; insangyew sikandin diyà te menge etew he kenà menge Hudiyu; duen menge tumutuu kandin dini te tivuuk he kelibutan; midtulus sikandin pehendiyà te langit.

Tito 2:14

Mibpehimatey sikandin he elili kenitew wey kiw zin melibri te kebpekeulaula tew te mezaat ne wey kiw zin daan mehimu he menge g̵aked din he etew he nelumpiyuwan he utew en egkengesuat he ed-ulaula te meupiya.

Hibriyuhanen 1:3

Pinaag̵i kayi te Anak din ibpezayag is mekeg̵eg̵ehem he anlag te Megbevayà su neked-iring dan. Ke hengkey is Megbevayà ne iyan ded daan sikan is Anak din. Ne pinaag̵i te g̵ehem te kegkag̵i kayi te Anak ebeyveyaan din is minsan hengkey he linimbag. Ne hein nepasad din en is ked-ewaa zin te menge salè tew, mid-ulì diyà te langit ne mibpinuu ziyà te egkekewanan te Megbevayà su edhadì.

Hibriyuhanen 4:15

Ne heini si Jesus is lavew he memumuhat tew, nesavut din is keg̵uyè tew tenged te kememenusiyai tew su neseg̵azan din he mibpenulayan sikandin dengan ni Setanas te minsan hengkey he paag̵i iring te ebpenulayan kiw zaan, iyan, wazà mulà sikandin mepenulayi.

Hibriyuhanen 7:26

Iyan si Jesus lavew he memumuhat he egkinehenglanen tew su wazà igkesewayi te menge ulaula zin, wazè din salà, ne wazè din sayep. Ne kenà sikandin iring te menge mekesesalà he menusiyà, ne midhimu sikandin te Megbevayà he lavew te minsan hentei ziyà te langit.

Hibriyuhanen 9:26

su emun iyan haazà egkinehenglanen, puun pa te kedlimbag̵a te kelibutan, ne utew mezakel is kebpekeantus din te kebpehimatey. Iyan, wazà iyan haazà kinehenglana su iyan mid-ulaula zin kayi te timpu he meg̵aan en egketapus is kelibutan is: midlepew sikandin wey zin maawà is salè tew pinaag̵i te kebpemuhata zin te keugelingen din he lawa. Ne kesevaha zà is kedhimuwa zin kayi.

Hibriyuhanen 9:28

Ne si Kristu zaan, kesevaha zà is kebpehimatey zin he iyan kebpemuhata zin te lawa zin wey zin maawà is menge salà te utew mezakel he menge etew. Ne ed-uman pa ebulus si Jesus dini te kelibutan, kenà te ked-ewaa zin te menge salè tew, kekenà, edhimesazen din is kedlibriya zin te langun he utew zekelà is perateng dan kandin.

1 Pedro 1:18

Netuenan ta he utew mahal is imbelukas din kenita. Su nengeuripen ki zengan te menge ulaula he wazà pulus he imbilinbilin kenita te menge kepuun ta. Sikan is imbelukas din kenita, ne kenà iring te selapì wey vulawan he egkeawà is bali zin.

1 Pedro 1:20

Te wazè pa limbag̵a is kelibutan, daan en si Kristu he intezù te Megbevayà wey mehimu he Menluluwas tew. Ne kayi te timpu g̵untaan, impezayag sikandin wey kiw mevelukasi.

1 Pedro 2:22

Wazà minsan hengkey he salà he neveelan ni Kristu. Wazà minsan hengkey he tarù he migkag̵i zin.

1 Pedro 2:24

Iyan si Kristu midsilutan tenged te menge salè tew zutun te kedrensanga kandin diyà te krus. Umba iyan sikandin midsilutan su wey tew meengkezi is menge mezaat he ulaula ne wey tew iyan meulaula is metazeng. Is menge palì din dutun, ne iyan nekevawì kenitew.

1 Pedro 3:18

Kesevaha zà is kebpehimatey ni Kristu wey mepesaylu is menge salè tew. Mibpehimatey su wey mehimu sikandin is metazeng he elili tew te kenà memetazeng wey kiw mehimu he menge g̵aked te Megbevayà. Nepatey is lawa zin, iyan, nevanhew sikandin

1 Juan 1:2

Hein mibulus dini te kelibutan heini is puunà te untung, neehè dey ne tenged dutun egkeg̵iyen dey keniyu is neehè dey. Edseyseyen dey keniyu is migeraran te untung he wazè din pidtemanan. Daan sikandin he zuma te Amey tew he Megbevayà ne zutun mibpeg̵awag̵awa kenami zini te kelibutan.

1 Juan 1:7

Emun merayag mulà is ibayè tew iring te merayag is Megbevayà, he ke và dà egkeg̵iya, emun mibpesakup kiw te Megbevayà, egkeupakat kiw ne layun kiw edlumpiyuwi te minsan hengkey he salè tew pinaag̵i te kebpelisi kenitew te lengesa ni Jesus he Anak te Megbevayà.

1 Juan 2:1

Sikiyu is iring te menge anak ku, iyan ibpesurati ku keniyu is: wey meheg̵eti is kedtuu niw wey kew kenà mekesalà. Iyan, ke zuen ebpekesalà he minsan hentei kenitew, duen datù tew he edtavang kenitew ziyà te etuvangan te Amey tew he Megbevayà. Iyan datù tew si Jesu Kristu he utew metazeng.

1 Juan 2:2

Iyan sikandin impemuhat tenged kenitew wey mepalis is menge salè tew, ne kenè kenitew zà he salà is egkepalis, kekenà, is menge salà daan te tivuuk he menusiyà.

1 Juan 2:29

Netuenan te en he metazeng si Kristu. Netuenan ta zaan he minsan hentei he metazeng is menge ulaula zin, nehimu en sikandin he anak te Megbevayà.

1 Juan 3:8

Ke zuen etew he layun ed-ulaula te mezaat ne sakup sikandin ni Setanas su layun daan si Setanas ed-ulaula te mezaat puun pa te kedlimbag̵a te kelibutan. Umba midhendini te kelibutan is Anak te Megbevayà su wey zin ikeawà is gehem te menge ulaula ni Setanas.