1 Juan 3:10 - Manobo Western Bukidnon

¹⁰ Ne ke zuen etew he kenà metazeng is menge ulaula zin, tuus heini he kenà sikandin anak te Megbevayà. Ne kenà daan anak te Megbevayà is minsan hentei he kenè din ebmahalen is duma zin. Pinaag̵i kayi egketuusan ta ke hentei is menge anak te Megbevayà wey ke hentei is menge sakup ni Setanas.

1 Juan 3:10 Кръстосани препратки

Mateo 13:38

Haazà is pemuleey, ne iyan heini is kelibutan; ne haazà is menge meupiya he pinemula, ne iyan heini is menge etew he ebpahadì te Megbevayà; ne sikan is menge mezaat he pinemula, ne iyan is menge sakup ni Setanas.

Lucas 6:35

Iyan penurù ku keniyu is: kenà imezaat te g̵ehinawa niw is menge kuntada niw, kekenà, meupiya is ul-ulaha niw ziyà te kandan. Ke zuen etew he ed-utang keniyu, kenè niw itag̵ù diyà te g̵ehinawa niw he kinahanglan he beyazi kew zin. Emun edtumanen niw heini, igkepeehè niw he menge anak kew te utew lavew he Megbevayà. Ne utew zekelà is suhul zin keniyu su minsan is menge etew he memezaat is ulaula wey is menge kenà ebpeselamat kandin, egkehizuwan din sikandan gihapun.

Juan 1:12

Asal is minsan hentei he nekezawat wey midtuu kandin, mibeg̵ayan din sikandan te ketenged wey zan mehimu he menge anak te Megbevayà.

Juan 11:52

Ne kenà tenged te menge Hudiyu zà su netagnè din daan he pinaag̵i te kebpatey ni Jesus egkesevaha is langun he menge etew he egkehimu he menge anak te Megbevayà minsan hendei he inged.

Juan 8:44

Iyan amey niw si Setanas, ne is egkesuatan te amey niw, iyan daan egkesuatan niw he meveeli niw. Puun pa te puunà ne memumunù en si Setanas. Ne wazè din kelavet te tutuu he tuluuwen su wazà diyà te kandin is minsan hengkey he tutuu. Emun egkag̵i sikandin, ne tarù is lalag din su tarù dà is egkeisip din. Teruen man sikandin wey ziyà te kandin ebpuun is minsan hengkey he tarù.

Juan 8:47

Emun anak te Megbevayà is etew, ebpeming̵en din is menge lalag te Megbevayà. Umba kenè niw ebpemineg̵en su kenè kew menge anak din.”

Nengeulaula 13:10

ne migkeg̵iyan din te, “Iring ka ki Setanas he ebpenlimbung. Utew ka lalung ne kuntada ka te minsan hengkey he meupiya. Su is Lalag te Nengazen he utew hustu, egkeg̵iyen nu he tarù.

Ruma 13:8

Kenè niw pekelug̵eyaza is kebeyazi niw te menge utang niw ziyà te minsan hentei, kekenà, iyan niw pekelug̵eyaza te wazè din en taman is kebmahala niw ziyà te g̵ehinawa niw te menge zuma niw, su is etew he ebmahalen din is menge zuma zin, ne netuman din en is menge sug̵ù te Megbevayà.

Ipisu 5:1

Ne g̵eina te pinelanggè kew he menge anak te Megbevayà, kinahanglan he mekeiring kew kandin.

Kulusas 3:14

Kinahanglan he mahal ziyà te g̵ehinawa te kada sevaha is minsan hentei he zuma zin. Iyan heini lavew te langun he sambag ku keniyu su emun egketuman niw heini egkehimu niw zaan is langun kayi te menge meupiya he ulaula.

1 Timoteo 1:5

Ne kinahanglan he iyan ketezengan ke maan is idsug̵ù nu kandan heini su wey zan mahala is menge zuma zan diyà te g̵ehinawa zan. Ne kenà egkehimu he hustu is kebmahala ta te menge zuma ta emun wazè ki melumpiyuwi te Megbevayà duen te menge salè ta. Kinahanglan he iyan dà ed-ul-ulahan ta is netuenan ta he hustu ne kinahanglan daan he tutuu is kedtuu ta te tutuu he tuluuwen ne zutun human hustu is kebmahala ta te menge zuma ta.

1 Juan 2:29

Netuenan te en he metazeng si Kristu. Netuenan ta zaan he minsan hentei he metazeng is menge ulaula zin, nehimu en sikandin he anak te Megbevayà.

1 Juan 3:1

Utew kiw mahal ziyà te g̵ehinawa te Amey tew he Megbevayà su ahaa niw man migngezanan kiw zin en he menge anak din ne menge anak kiw zin en iyan. Is menge etew zini te kelibutan he kuntada te Megbevayà, kenè kiw zan egkekilala he menge anak kiw te Megbevayà su kenè dan daan egkekilala ke hentei sikandin.

1 Juan 3:2

Menge minahal ku he menge emig̵u, menge anak kiw en te Megbevayà ne kenè tew pa egketuenan ke hengkey is egketemanan te kegkeenaka kenitew te Megbevayà. Iyan, netuenan tew he ke edlikù si Kristu, egkehimu zutun is kenitew he zagwey he iring te kandin he zagwey su zutun egkeehè tew human is tutuu he zagwey zin.

1 Juan 4:21

Su insug̵ù kenitew te Megbevayà he is minsan hentei he tutuu is kebmahala zin te Megbevayà, kinahanglan daan he ebmahalen din is duma zin.

1 Juan 4:6

Iyan, sikitew mulà, gaked kiw te Megbevayà ne tenged dutun ebpemineg te ibpenurù tew is minsan hentei he emig̵u te Megbevayà. Iyan, is minsan hentei he kenà gaked te Megbevayà, kenà ebpemineg te ibpenurù tew. Pinaag̵i kayi egketuusan tew ke hentei is mid-ulinan te Wag̵as he Mulin-ulin he ebpenurù te tutuu wey ke hentei is mid-ulinan te teruen he mulin-ulin.

1 Juan 4:8

Is minsan hentei he wazè din gag̵ew te menge zuma zin, wazè din hanew te menge ulaula te Megbevayà su is minsan hengkey he ed-ul-ulahan te Megbevayà, ne iyan kebpaahaa zin te g̵ag̵ew zin.

1 Juan 5:19

Netuenan tew he menge anak kiw te Megbevayà, iyan, is langun he menge kuntada te Megbevayà dini te kelibutan, ebeyveyaan sikandan ni Setanas.

1 Juan 5:2

Emun hustu is kebmahala ta te Megbevayà wey is kedtumana ta te menge sug̵ù din, egketuenan ta he hustu zaan is kebmahala ta te menge zuma ta he anak te Megbevayà.

3 Juan 1:11

Minahal ku he suled, kenè ta iyan ed-iringan is mezaat he ulaula he iring dutun, kekenà, iyan ta ed-iringan is meupiya he ulaula. Is minsan hentei he meupiya is menge ulaula zin, neg̵aked sikandin te Megbevayà. Is minsan hentei mulà he mezaat is ulaula zin, wazà diyà te g̵ehinawa zin is Megbevayà.