1 Juan 2:27 - Manobo Western Bukidnon

²⁷ Iyan, sikiyu, wazà kinahanglan he zuen selakew pa he ebpenurù keniyu su mibpeulinan kew en ni Kristu te Wag̵as he Mulin-ulin. Pinaag̵i zutun egkesavut niw is langun he ibpesavut keniyu ni Kristu. Tutuu mulà ne kenà tarù haazà is ibpesavut din keniyu umba kinahanglan he hemeni niw is kebpekidsevaha niw kandin sumalà is impenurù en keniyu.

1 Juan 2:27 Кръстосани препратки

Mateo 13:11

Ne midtavak kandan si Jesus te, “Sikan is in-eles dengan mehitenged te kedhadì te Megbevayà, impesavut en keniyu te menge sumusundan ku, iyan, is duma he menge etew, id-eles heini kandan.

Juan 14:16

ne edhengyuan ku is Amey ku su wey zin ikeveg̵ey keniyu is Menenavang he ed-ilis kediey he kenà edsuwey keniyu te minsan keenu.

Juan 14:17

Iyan sikandin sikan is Wag̵as he Mulin-ulin he tutuu is ibpenurù din. Kenà heini egkezawat te menge etew zini te kelibutan he kuntada te Megbevayà su kenè dan egkekilala sikandin ne kenè dan egkesavut ke hentei sikandin. Sikiyu mulà, nesavut niw en ke hentei sikandin su ziyà ed-ubpà te keniyu ne kenà daan ed-awà diyà te keniyu.

Juan 14:26

Ne edsug̵uen te Amey ku zini te keniyu is Menenavang he ed-ilis kediey. Iyan sikandin sikan is Wag̵as he Mulin-ulin ne ibpenurù din keniyu is langun, ne ibpetenuzan din keniyu is langun he migkag̵i ku keniyu.

Juan 16:13

Ne sikan is Wag̵as he Mulin-ulin he ebpenurù te tutuu he tuluuwen, emun dini en sikandin te keniyu, ibpesavut din keniyu is langun he tutuu. Kenè din iyan ibpesavut is kandin dà he isip, kekenà, iyan ibpesavut din is nezineg din diyà te Amey ku. Ibpesavut din daan keniyu is egkeulaula keuzemà.

Juan 4:14

iyan, ke zuen ed-inum te wahig he ibeg̵ey ku kandin kenè en maan sikandin egkemezahan te minsan keenu. Su is wahig he ibeg̵ey ku kandin, egkehimu ziyà te kandin he ulu te wahig he ebpekeveg̵ey kandin te untung he wazà pidtemanan.”

Juan 6:45

Duen netagnà he insurat dengan te ebpeneuven te Megbevayà he edhenduen te, ‘Ebpenuruen te Megbevayà is tivuuk he menusiyà.’ Umba,” ke si Jesus, “is langun he ebpemineg te ibpenurù kandin te Amey ku he Megbevayà, edsundan kediey.

1 Kurintu 2:12

Sikitew is menge tumutuu, imbeg̵ey kenitew te Megbevayà is Wag̵as he Mulin-ulin ne is ed-ulin kenitew, diyà ebpuun te Megbevayà ne kenà ebpuun diyà te etew zà duen. Umba imbeg̵ey is Wag̵as he Mulin-ulin kenitew su wey tew mesavut is langun he ibeg̵ey kenitew te Megbevayà.

1 Kurintu 2:13

Ne tenged kayi iyan ibpenurù dey is impesavut kenami te Wag̵as he Mulin-ulin, ne kenà iyan is impesavut kenami te memetau he etew zà duen. Is ebpuun diyà te Wag̵as he Mulin-ulin, ne iyan ibpesavut dey ziyà te menge etew he mid-ulinan daan te Wag̵as he Mulin-ulin.

2 Kurintu 1:21

Su is Megbevayà, ne iyan edheg̵et te kedtuu tew ki Jesu Kristu ne iyan sikandin mibpilì kenitew

Ipisu 4:21

Tutuu iyan he impesavut keniyu is keag̵i ni Kristu ne impesavut daan keniyu is tutuu he tuluuwen he impenurù din.

Kulusas 2:6

Ne g̵eina te midawat niw si Jesu Kristu he Nengazen niw kinahanglan he is menge ulaula niw, ne zait te upakat niw kandin.

1 Tiselunika 2:13

Ne elin daan layun dey ibpeselemati te Megbevayà is: hein impesavut dey keniyu is Lalag te Megbevayà, midawat niw su nesavut niw he Lalag te Megbevayà ne kenà lalag te etew zà duen. Su pinaag̵i te lalag din egkelig-enan is kedtuu tew te nemeketuu kandin.

1 Tiselunika 4:9

Ne wazè en kinahanglan he ibpenurù ku pa keniyu he mahala niw ziyà te g̵ehinawa niw is menge zuma niw he tumutuu su impenurù en heini keniyu te Megbevayà.

1 Timoteo 2:7

Ne tenged kayi intezù e zin he epustul ne midsug̵ù e zin wey ku ipenurù heini. Kenà tarù heini is egkeg̵iyen ku, kekenà, tutuu. Midtezù e zin wey ku mepenurù is menge etew he kenà Hudiyu su wey zan meketuu te tutuu he tuluuwen.

1 Pedro 1:23

Su mid-umanan ki limbag̵a te Megbevayà ne veg̵u ki en maan he etew pinaag̵i te wazà pidtemanan he Lalag te Megbevayà he iyan ebpekeveg̵ey te untung.

1 Juan 2:28

Ne tenged kayi te langun, menge anak ku, hemeni niw is kebpekidsevaha niw ki Kristu su wey kenè kew mahandek ne kenè kew egkeeled keuzemà dutun te kedlikù din.

1 Juan 3:24

Is minsan hentei he edtuman te menge sug̵ù te Megbevayà, nekidsevaha sikandin te Megbevayà ne ziyà te kandin ed-ubpà is Megbevayà. Egketuenan ta he zini te kenita ed-ubpà is Megbevayà su mid-ulinan ki te Wag̵as he Mulin-ulin.

2 Juan 1:2

Umba minahal zey sikiyu su g̵eina te midhamen kiw en te tutuu he tuluuwen ne heini is tutuu he tuluuwen, kenà egkeawà dini te kenitew te wazà pidtemanan.