1 Juan 2:20 - Manobo Western Bukidnon

²⁰ Sikiyu mulà, mibpeulinan kew ni Kristu te Wag̵as he Mulin-ulin ne tenged dutun nesavut niw te langun is tutuu he tuluuwen.

1 Juan 2:20 Кръстосани препратки

Mateo 13:11

Ne midtavak kandan si Jesus te, “Sikan is in-eles dengan mehitenged te kedhadì te Megbevayà, impesavut en keniyu te menge sumusundan ku, iyan, is duma he menge etew, id-eles heini kandan.

Marcos 1:24

Ne hein neehè din si Jesus, mibensag sikandin is egkag̵i te, “Sikew, Jesus he tigNeserit, hengkey is lavet nu kenami te menge mulin-ulin? Kela ke iyan inhendini nu is edezeetan key kenikew. Egkekilala ku sikew; iyan ka kes hadì he mibpilì te Megbevayà!”

Lucas 4:18

“Mid-ulinan a te Wag̵as he Mulin-ulin he ebpuun te Megbevayà. Ne mibpilì a te Nengazen su wey ku ikepesavut te menge egkengeayuayu is Meupiya he Tudtulanen. Ne mibpeveyaan din kedì is menge etew wey ku sikandan metudtuli he egkengevelukasan is nengevihag ni Setanas, ne egkengeulian is nengelakap wey zan mekeahà ne egketevangan is egkengereg̵enan.

Lucas 4:34

“Sikew, Jesus he tigNeserit, hengkey is lavet nu kenami te menge mezaat he mulin-ulin? Kela ke iyan inhendini nu is edezeetan key kenikew. Egkekilala ku sikew; iyan ka sikan is hadì he mibpilì te Megbevayà!”

Juan 14:26

Ne edsug̵uen te Amey ku zini te keniyu is Menenavang he ed-ilis kediey. Iyan sikandin sikan is Wag̵as he Mulin-ulin ne ibpenurù din keniyu is langun, ne ibpetenuzan din keniyu is langun he migkag̵i ku keniyu.

Juan 16:13

Ne sikan is Wag̵as he Mulin-ulin he ebpenurù te tutuu he tuluuwen, emun dini en sikandin te keniyu, ibpesavut din keniyu is langun he tutuu. Kenè din iyan ibpesavut is kandin dà he isip, kekenà, iyan ibpesavut din is nezineg din diyà te Amey ku. Ibpesavut din daan keniyu is egkeulaula keuzemà.

Nengeulaula 10:38

Si Jesus he tigNeserit, mibpeulinan sikandin te Megbevayà te Wag̵as he Mulin-ulin ne mibeg̵ayan sikandin te zekelà he g̵ehem. Ne mid-eneb din is menge inged ne meupiya is baal zin diyà te menge etew ne nengeulian din is langun he edlelungen ni Setanas. Neveelan din heini su kenà edsuwey kandin is Megbevayà.

Nengeulaula 3:14

iyan, sikiyu, wazè niw mesuati sikandin is wag̵as he wazà kandin he mezaat he ulaula. Midhangyù kew he iyan libriya ni Pilatu kes teremunù he nepirisu.

1 Kurintu 2:15

Ne sikan is etew he ziyà te kandin is Wag̵as he Mulin-ulin, egkesavut din mulà is pulus te minsan hengkey he ibpenurù te Wag̵as he Mulin-ulin. Iyan, haazà is etew he wazà diyà te kandin is Wag̵as he Mulin-ulin, kenà sikandin ebpekesavut ke hengkey is diyà te isip te menge etew he mibeg̵ayan te Wag̵as he Mulin-ulin.

Hibriyuhanen 1:9

Iyan egkesuatan nu is metazeng he ulaula ne igkeepes nu is mezaat he ulaula. Tenged kayi, siak is Megbevayà nu, midhimu ku sikew he lavew te menge zuma nu ne imbeg̵ey ku kenikew is utew zekelà he kelipey.”

Hibriyuhanen 8:11

Ne tenged kayi, dutun he timpu keuzemà kenè en kinahanglan te minsan hentei he ebpepenurù te zuma zin mehitenged kedì, ne kenè en daan kinahanglan dutun he zuen pa maan etew he edseysey ziyà te zuma zin ke hentei a is Megbevayà su zutun egketuenan te minsan hentei, lavew se kenà lavew, ke hentei a.

1 Juan 2:27

Iyan, sikiyu, wazà kinahanglan he zuen selakew pa he ebpenurù keniyu su mibpeulinan kew en ni Kristu te Wag̵as he Mulin-ulin. Pinaag̵i zutun egkesavut niw is langun he ibpesavut keniyu ni Kristu. Tutuu mulà ne kenà tarù haazà is ibpesavut din keniyu umba kinahanglan he hemeni niw is kebpekidsevaha niw kandin sumalà is impenurù en keniyu.

1 Juan 4:13

Mibpeulinan ki zin te Wag̵as he Mulin-ulin ne tenged dutun egketuusan ta he nekidsevaha ki kandin wey impeubpè din dini te kenita is Wag̵as he Mulin-ulin.

Hudas 1:5

Netuenan niw en is egkeg̵iyen ku, iyan, ed-umanan ku pa egkeg̵iya ziyan te keniyu wey niw kenà melipati. Dengan midlibri te Megbevayà is menge pinilì din he etew ne impeg̵uwè din sikandan diyà te g̵inhedian he Ihiptu, iyan, dutun te nekeg̵uwè dan en, mibpenhimetayan din is duma kandan he wazà medsarig kandin.

Impezayag 3:7

Ne ke sikandin en maan te, “Pesurati nu is belinsug̵uen te Megbevayà he ebantey te menge tumutuu ziyan te inged he Piledilpya. Ne ke sikew te, ‘Siak si Jesus is egkag̵i; iyan a sikan is egkeserig̵an he mibpilì te Megbevayà. Imbeg̵ey kedì is keg̵ehem te kedhadì te g̵inhedian ku iring te kedhadì dengan ni Hadì David. Ne emun duen ebpuwasan ku wey mekeseled dutun te g̵inhedian ku, kenè en egkelekevan te minsan hentei. Ne emun duen etew he edlekevan ku, kenè en daan egkepuwasan te minsan hentei.

Impezayag 4:8

Ne heini is heepat he linimbag, heenem is pakpak te uman sevaha kandan. Neeneb te mata is lawa zan wey is diyà te zizalem te pakpak dan. Ne te maandew wey mezukilem, iyan dà baal zan is kenè en egkepangkus he kegkanta. Ke sikandan te, “Wag̵as, wag̵as, wag̵as is Megbevayà. Nengazen sikandin he ebpekehimu te minsan hengkey. Iyan sikandin sikan is Megbevayà he zengan, guntaan, wey keuzemà te wazà pidtemanan.”