Ɛ́fɛ̂zɛ 1:7 - Kɑɑ Fí

⁷ Mɔ́ɔ nɛ ɛ̂wɑ́ kɑ lɔk mɛci mɛ́ ńdɔk ńtsúꞋ wɛkŋɛ, pɛkŋɛ luk. Sɛ́ likŋɛ mɛfɑɑnɛ mɛkŋɛ ŋ́ɡɑ́ mbɔ̌ pɛkŋɛ. Yɔ nu kɛ́ fʉꞋ yi Sɛ́ kɑ lɔknɛ ŋ́ɡɑ́ fuꞋ fɛ̌ɛ yɛkŋɛ,

Ɛ́fɛ̂zɛ 1:7 Кръстосани препратки

Mɑtʉ̈ɔ 20:28

Ndʉ́ŋndʉŋ pɑ́Ꞌ Mɔ́ɔ-Ŋu ŋkɑɑ tɔ́ ndǔ tsɛ́tsɑ́Ꞌ, pɔ pɑ́Ꞌ pʉɔmɛsɔŋ ɡʉ ɛ́fɑꞋ mbɔ̌ wɛ́ pɔ́, ɑ kɑ tɔ́ pɔ nɛfɑꞋ mbɔ̌ pʉɔmɛsɔŋ, ɛ́fɑꞋ fɑꞋ tɛ ḿbɛn ŋ́ɡɑ́ tú yɛ́ nɛlɔk ńtsúꞋ pʉɔ tɛ ńzɑ́ɑ.»

Mɑtʉ̈ɔ 26:28

MbíꞋŋɡɔ yɔ mɛci mɑ́ɑ, ɛ́ mɛci mí Sɛ́ lɔknɛ ŋ́ɡwɑt kɑɑ, ɛ́ mi ɛ́ tswɛtnɛ nǔu tú-pʉɔ tɛ ńzɑ́ɑ, pɑ́Ꞌ Sɛ́ ɡʉ ńdɔk ńdikŋɛ mɛnu kɛpɔŋ mɔ́p.

Mɑtʉ̈ɔ 6:12

likŋɛ mɛfɑɑnɛ mɛ́k, ŋ́ɡɑ́ mbɔ̌ pɛk, pɑ́Ꞌ pɛk sɛ́ ńdikŋɛ yɛ́k ŋ́ɡɑ́ mbɔ̌ pʉɔ pi pɔ́p ɡɛnɛ nǔu pɛk lɑ́.

Mɑ́lɛ́kúshi 14:24

A cú mbɔ̌ pɔ́p ŋɡɔ: «Yɔ mɛci mɑ́ɑ, ɛ́ mɛci mi Sɛ́ lɔknɛ ŋ́ɡwɑt kɑɑ, ɛ́ tswɛtnɛ nǔu tú-pʉɔ tɛ ńzɑ́ɑ.

Lúkɑ́shi 1:77

Ɔ ɡɛ ńtɑ́ɑ ŋ́ɡɛ pʉɔ pɛ́ jí ŋɡɔ ɑ kẅɛ́Ꞌlɛ mɔ́ tɛ ḿbɑ́ɑtɛ pɑ́Ꞌ ɑ ɡɛ ńdikŋɛ mɛnu kɛpɔŋ mɔ́p, ŋ́ɡɛ pɔ́p luk,

Lúkɑ́shi 24:47

Ɛ́ sɛ́ ḿbíkŋɛ ŋɡɔ pɛ́ lɑ́Ꞌ ńdɔk lík yɑ́ɑ, ńcú nu-Sɛ́ mbɔ̌ lɑ́Ꞌ ŋɡɔ mbɑ wɔ̌ lɑ́ kúpmɛ mɑt wɛ, Sɛ́ likŋɛ mɛnu kɛpɔŋ mɛ́. Pɔ́Ꞌɔ, ɛ́ kɛ ńzɛ Yɛlúsɑlɛm.»

Jɑ̂ŋ 20:23

Pʉʉ lɑɑ ńdikŋɛ mɛnu kɛpɔŋ pʉɔ ŋ́ɡɑ́ mbɔ̌ pɔ́p, mbɔ Sɛ́ ɡʉ ńdikŋɛ yɛ́ likŋɛ́nɛ. Pʉʉ lɑɑ ńdʉꞋ nɛlikŋɛ mɛnu kɛpɔŋ pʉɔ ŋ́ɡɑ́ mbɔ̌ pɔ́p, mbɔ Sɛ́ ɡʉ ńdʉꞋ yɛ́ lʉꞋnɛ nɛlikŋɛ.»

ŊwɑꞋnɛ-Gɑŋntúu Yɛ́su Kɛlístɔ 10:43

Jʉ́ zɛɛnɛ ḿbɔ́ ŋu ẅí pɛŋɡɛ́mndʉ̈ɔ́Ꞌ-Sɛ́ pɛtsʉʉ kɑ pɔ́ ńdɛꞋlɛ, pɑ́Ꞌ pɔ́p kɑ pɔ́ ńcú ŋɡɔ mbɑ wɔ̌ lɑ́ ẅi ɑ zɑ́pnɛ tʉ́m yɛ́ nǔu Yɛ́su, Sɛ́ ɡʉ ńdikŋɛ mɛnu kɛpɔŋ-ŋɡɑŋ ŋ́ɡɑ́ mbɔ̌ wɛ́, ntɛ́ wɛ́.

ŊwɑꞋnɛ-Gɑŋntúu Yɛ́su Kɛlístɔ 2:38

Pyɛ̂ pʉ̈ɔt mbɔ̌ pɔ́p ŋɡɔ: «Pʉʉ kúpmɛ mɑt. Wɛ́t ŋu lɑ́ nǔu pʉʉ pɛ́m pɛ́ nuꞋ wɛ́ ŋki nǔu lík-Yɛ́su Kɛlístɔ. Nɛpɔ́ yi Sɛ́ ɡʉ ńdikŋɛ mɛnu kɛpɔŋ mɛ́ ŋ́ɡɑ́ mbɔ̌ wɛ́. Sɛ́ ɡɔ́ɔ ŋ́kɛ́ ŋ́ɡɑ́ Zẅikŋɛ Lɛ́ɛnɛ́nɛ mbɔ̌ pʉʉ.

ŊwɑꞋnɛ-Gɑŋntúu Yɛ́su Kɛlístɔ 20:28

Pʉʉ pɑ́ɑ yʉ́ʉ tú kwɑꞋ sʉ́Ꞌnɛ, ḿbɛn ḿbɑ́ɑ yɛ nɔɔ-mɛnjinjɔ mi Zẅikŋɛ-Sɛ́ kɑ níꞋnɛ mbɔ̌ pʉʉ ŋɡɔ pʉʉ pɔ́ ḿbyɛ́p. Pʉʉ líŋɛ cúꞋlɛ-pʉɔ-Sɛ́ sʉ́Ꞌnɛ. Jʉ́ ẅi ɑ lɛɛnɛ nǔu mɛci-Mɔ́ɔ nɛ ŋ́ɡɛ cúꞋlɛ ɛ̂yɑ́ tsʉ́Ꞌ pʉɔ pɛ́.

ŊwɑꞋnɛ-Gɑŋntúu Yɛ́su Kɛlístɔ 3:19

Pɔ́Ꞌɔ lɑ́, pʉʉ kɛ́ ŋ́kúp mɑt wʉʉ, ḿbɛ́m Yɛ́su Kɛlístɔ. Sɛ́ likŋɛ mɛnu kɛpɔŋ mʉ́ʉ.

Pʉɔ-Lɔ́mɑ 2:4

Ɔ sɛ́ ŋ́ɡɛ pɔ́Ꞌɔ, ńtsʉ́Ꞌ ńdɔk ŋ́ɡwɑ́k Sɛ́ ɡwɑ́knɛ, ḿbɔ́ ńcú ŋɡɔ ɑ ɡẅɛɛ pɔŋtʉ́m, ɑ kɑ́ ɡɔ́ɔ fɛ́Ꞌnɛ cɔ́k pɔ́, ɑ ɡẅɛɛ kɔkmbʉʉ. Pɔ́Ꞌɔ, ɔ kɑ́ pɔ́ ńjí ŋɡɔ ɑ ɡẅɛɛ pɔŋtʉ́m nzʉʉ ɡu pɔ́Ꞌɔ, pɔ nɛlɔk ŋ́ɡɛ ɔ kúpmɛ mɑt pɔ́ ɔɔ?

Pʉɔ-Lɔ́mɑ 3:24

Lɑ́, pɑ́Ꞌ Yɛ́su Kɛlístɔ kɑ kɛ́mɔ́ ńtɔ́, ŋ́kíɛꞋ kʉ̈ɔ́Ꞌlɛ-nu kɛpɔŋ nǔu pʉɔ lɑ́, Sɛ́ tsʉ́Ꞌ fú nǔu ńdíŋɛ pʉɔ pɔ́p pɔ́ pʉɔ pinɛ pɔ́p ndʉ́ŋndʉŋ mbi yɛ́, ɛ́ pɔ́ yúu mi ɑ lɔknɛ ŋ́ɡɑ́ fuꞋ níinɛ yɔ́p.

Pʉɔ-Lɔ́mɑ 3:25

Sɛ́ kɑ lɔk wɛ́ ńnɔŋ pɔꞋ pɑ́Ꞌ mɛci mɛ́ ɡʉ ɛ́suk mɛnu kɛpɔŋ-pʉɔ pinɛ pɔ́p zɑ́pnɛ tʉ́m nǔu jʉ́ Kɛlístɔ. Pɑ́Ꞌ ŋu kɑ ɡẅɛɛnɛ nɛpfú nǔu mɛnu kɛpɔŋ-pʉɔ lɑ́, ɛ́ lɔk ńnyɛt ŋɡɔ Sɛ́ ɡɛ mɛnu mɛ́ ndʉ́ŋndʉŋ. Ɛ́ kɑ pɔ́ yɛcɔ́ ŋkɑ́, pʉɔmɛsɔŋ pɔ́ ŋ́ɡɛ nu kɛpɔŋ, jʉ́ Sɛ́ ɡɛ pɔ pɑ́Ꞌ ŋkɑ́ yi ɑ kɑ́ pɔ́ ńjʉ́ɔ pɔ́ lɑ́.

Pʉɔ-Lɔ́mɑ 9:23

Lɑ́ Sɛ́ kɑ pɔ́ ḿbɛn ŋ́kɔŋ nɛnyɛt ndɛn fuꞋ yi ɛ́ tsɛt nɛɡúꞋ wɛ, ḿbɔ́ yi ɑ ŋ́ɡɑ́ mbɔ̌ pʉɔ pi ɑ tsɑ́ɑnɛ mɛjʉ́ŋ mɔ́p, pʉɔ pi ɑ kɑ lɑ́Ꞌnɛ ńzɑ́Ꞌ njí ńniitɛ wɔ́p ńtík, nɛɡẅɛɛ nɛɡúꞋ wɛ ẅîwɑ́.

1 Kɔlɛ̂ŋtɛ 1:30

Jʉ́ Sɛ́ kɑ lɔk wɛ́ ŋ́ɡɛ yɛkŋɛ jínu. Sɛ́ fú nǔu wɛ́ ńjʉ́ɔ wɛkŋɛ pɑ́Ꞌ pɑkɛfɑɑnɛ, ńdɔk wɛkŋɛ ŋ́ɡɛ pʉɔ pɛ́, ńzɑ́Ꞌ ŋkʉ-puꞋ-nu kɛpɔŋ nǔu pɛkŋɛ.

2 Kɔlɛ̂ŋtɛ 8:9

Pʉʉ zɛɛ ḿbɔ́ ńjí yúu mi Tsɑpʉɔ Yɛ́su Kɛlístɔ kɑ lɔknɛ pɔ tʉ́m sʉ́Ꞌnɛ ŋ́ɡɑ́. A kɑ ɡẅɛɛ yúu tsʉʉ, lɑ́ ńtsʉ́Ꞌ mbúŋ mbíꞋ wʉ́ʉ, pɑ́Ꞌ pʉʉ ɡʉ ɛ́fú nǔu púŋ yɛ́, ńtsʉ́Ꞌ pʉɔ pi Sɛ́ ɡɑ́nɛ yúu yɛ́ mbɔ̌ pɔ́p tɛꞋ.

Ɛ́fɛ̂zɛ 1:14

Zẅikŋɛ Lɛ́ɛnɛ́nɛ lɔk ḿbɔ́ zɛsɛ́ nǔu fuꞋ yi Sɛ́ kɑ niitɛ ńzɑ́p nɛɡɑ́ mbɔ̌ pʉɔ pɛ́. Sɛ́ lɔk ńniitɛ ɛ́sẅíi wɛkŋɛ ŋɡɔ pɛkŋɛ ɡʉ ńdɑ́Ꞌ ŋ́ɡẅɛɛ mɛcɔ́ nǔu ŋkɑ́ yi ɑ ɡʉ ńdɑ́Ꞌ ńtɛmtɛ ńcẅɛɛtɛ wɛkŋɛ nǔu nu kɛpɔŋ. Pɑ́Ꞌ ɛ́ pɔ́Ꞌɔ lɑ́, pɛkŋɛ sɛ́ ŋ́ɡúꞋlɛ Sɛ́ mbíꞋŋɡɔ ɑ ɡúꞋ tɛꞋ.

Ɛ́fɛ̂zɛ 1:18

Mɔ sɛ́ ḿbɛn ḿbúꞋ mbɔ́ mbɔ̌ wɛ́, ŋɡɔ ɑ ɡɛ tʉ́m yʉ́ʉ jí kyɛꞌ yɛ́ nɛpɔ́ yi pʉʉ ɡʉ tsuŋ ńjí yúu mi ɑ kɑ pɔ́ ɛ́fúŋ wʉ́ʉ ntɛ́ yɛ́tɛ́. Mbɑ pɑ́Ꞌ pʉʉ ɡʉ ńjí mɑ́mɑ́ nu sʉ́Ꞌnɛ yi pʉʉ pɛ́ pɛcɔ́ pʉɔ pi ɑ kɑ tsɔ́Ꞌnɛ wɔ́p ɡʉ ŋ́ɡɛ cẅɛ́ɛ, ɛ́ pɔ́ yúu mi ɑ kɑ niitɛ́nɛ ńzɑ́p mbɔ̌ pʉʉ.

Ɛ́fɛ̂zɛ 1:6

A kɑ lɔk wɛkŋɛ ŋ́ɡɛ pʉɔ pɛ́ nɛpɔ́ yi pɛkŋɛ ɡʉ ŋ́ɡúꞋlɛ wɛ́ nǔu mɑ́mɑ́ nu kɛ́ fʉꞋ yi ɑ kɑ ɡɛnɛ. Ɛ́ kɑ lɛɛ nǔu pɑ́Ꞌ ɑ kɑ tɛmtɛ́nɛ wɛkŋɛ pɛ́ Mɔ́ɔ nɛ ẅi ɑ kɔŋnɛ wɛ́ tɛꞋ, ŋ́ɡɑ́ fuꞋ fɛ̌ɛ yɛkŋɛ, pɔ́Ꞌɔ ɛ́ pɔ́ kwɑꞋ mɑ́mɑ́ nu tɛꞋ.

Ɛ́fɛ̂zɛ 1:8

ɛ́ fuꞋ yi ɑ kɑ ɡɑ́nɛ mbɔ̌ pɛkŋɛ tɛ ɛ́ zɑ́ɑ zɑ́ɑnɛ, ŋ́ɡɔ ŋ́ɡɑ́, ńtsɔ́Ꞌ jínu yɛkŋɛ pɛkŋɛ jí nu.

Ɛ́fɛ̂zɛ 2:4

Lɑ́ Sɛ́ tsɑ́ɑ mɛjʉ́ŋ-pʉɔmɛsɔŋ tɛꞋ. A kɑ pɛn ńdɛɛ pɔ nǔu ntɛ́ yi ɑ kɑ lɔknɛ ŋ́kɔŋ wɛkŋɛ,

Ɛ́fɛ̂zɛ 2:7

A kɑ ɡɛ mɔnɛ mɛnu pɑ́Ꞌ ɑ ɡʉ ńdɑ́Ꞌ ńdɔk ńdɛꞋlɛ nǔu yîyɑ́ kɛm njí yi ɛ́ sɛ́ ńtɔ́ ŋɡɔ ɑ kɑ ɡɑ́ fuꞋ níinɛ yɛkŋɛ tɛ ńdɛɛ ntɛ́, ɛ́fú nǔu pɑ́Ꞌ, ɑ lɛɛnɛ nǔu Yɛ́su Kɛlístɔ ŋ́ɡẅɛɛ pɔŋtʉ́m nǔu pɛkŋɛ pɔ́Ꞌɔ.

Ɛ́fɛ̂zɛ 3:16

mɔ sɛ́ ńdɔ́ɔ mbɔ̌ wɛ́ ŋɡɔ ɑ lɔk pɑ́Ꞌ nɛɡúꞋ wɛ ɡú tɛꞋ lɑ́, ḿbɛ́m, ŋ́ɡɛ Zẅikŋɛ yɛ́ ɡɑ́ yʉ́ʉ tʉʉ nɛpɔ́ yi tʉ́m yʉ́ʉ ɡʉ tsuŋ tɛntɛ tɛꞋ.

Ɛ́fɛ̂zɛ 3:8

Tɛ mbɑ pɑ́Ꞌ mɔ tsɛtsɛt pʉɔ-Sɛ́ pɛtsʉʉ ḿbɔ́ pɔ ndẅiknzʉʉ, ɑ kɑ kɛ́ ḿbɛ́m pɛ́mnɛ ŋɡɔ mɔ ɡʉnɛ ńcẅi Ŋkʉʉ Sʉ́Ꞌnɛ mbɔ̌ pʉɔ pi pɔ́p kɑ́ pɔ́ pɑyúdɑ pɔ́, ńdɛꞋlɛ pii kɛ́mɛ yi ɛ́ nǔu nu-Kɛlístɔ.

Filipɛ 4:19

Sɛ́ wɑɑ ɡʉ ńdɔk ntɛ́ yi ɑ ɡẅɛɛnɛ yúu pɔ́Ꞌɔ, ńdɛɛtɛ nǔu Yɛ́su Kɛlístɔ, ŋ́ɡɑ́ mbɑ kʉ̈ɔ́ lɑ́ yi ɛ́ sɛ́ ńjɑ́k mbɔ̌ pʉʉ kɛ́ sɑ́ŋ.

Kɔlɔsíyɛ̂ŋ 1:14

Jʉ́ mɔ́ɔ nɛ ɛ̂wɑ́ kɑ ɡɛnɛ Sɛ́ fú tsɛt nu kɛpɔŋ ńtsúꞋ wɛkŋɛ, ńdikŋɛ mɛfɑɑnɛ mɛkŋɛ, ŋ́ɡɑ́ mbɔ̌ pɛkŋɛ.

Kɔlɔsíyɛ̂ŋ 1:27

MbíꞋŋɡɔ Sɛ́ kɑ jʉ́ɔ ŋɡɔ ɑ ɡʉ ŋ́ɡɛ pʉɔ pɛ́ jí yúu mi ɛ́ kɑ zɛɛ ńdʉ̈ɔmɛ mík-pʉɔ lʉɔmɛ́nɛ, ḿbɔ́ yi ɑ kɑ kɑꞋnɛ nɛɡɛ nǔu mɛtúu mɛtúu, yîyɑ́ yúu ɡẅɛɛ fuꞋ, ḿbɛn ḿbɔŋ tɛꞋ. Yîyɑ́ ntsɛm pɔ́ ŋɡɔ pʉʉ jí ŋɡɔ Kɛlístɔ ɑ tsɛt tʉ́m pʉʉ, ḿbɔ́ ŋ́ɡɛ pʉʉ zẅíꞋlɛ ŋkɑ́ yi pʉʉ ɡʉ ńdɑ́Ꞌ kúu tsɛt nɛɡúꞋ-Sɛ́.

Kɔlɔsíyɛ̂ŋ 2:13

Pʉʉ kɑ pɔ́ yɛcɔ́ ŋkɑ́ ḿbɔ́ mbɔ̌ Sɛ́, ḿbɔ́ pɔ pɛpfú, mbíꞋ mɛnu kɛpɔŋ mʉ́ʉ, mbɑ pɑ́Ꞌ pʉʉ kɑ pɔ́ pʉɔ pi pɛ́ kɑ púꞋnɛ wɔ́p nɛlɔk wɔ́p ŋ́ɡɛ pʉɔ-Sɛ́ lɑ́. Ɛ́ kɛ́ ḿbɔ́ nǔu ŋkɔ̂ɔnɛ, mbɔ Sɛ́ tɛmtɛ njẅɛt-Kɛlístɔ ńzẅíimɛ nǔu nɛvú. A likŋɛ mɛnu kɛpɔŋ mɛkŋɛ tsʉʉ, ŋ́ɡɑ́ mbɔ̌ pɛkŋɛ.

Kɔlɔsíyɛ̂ŋ 2:2

Mɔ ŋ́ɡɛ pɔ́Ꞌɔ, nɛlɔk ńníꞋ tʉ́m yɔ́p, ŋkɔŋɛ tɛmtɛ wɔ́p, mbɑ pɑ́Ꞌ pɔ́p ɡʉ niitɛ ńjí nu yi ɛ́ nǔu Kɛlístɔ, ɛ́fú nǔu ńjí ntsɛm-Sɛ́, yîyɑ́ ntsɛm pɔ́ pɔ kwɑꞋ jʉ́ Kɛlístɔ.

1 Timɔtɛ́ɛ 2:6

KwɑꞋ Jʉ́ kɑ ɡɑ́nɛ tú yɛ́ ńdɔk ńtsúꞋ pʉɔ pɛtsʉʉ mbɔ̌ nɛvú, ńdɔk pɔ́Ꞌɔ, ńnyɛt nǔu ŋkɑ́ yi Sɛ́ kɑ zɑ́pnɛ ŋɡɔ jʉ́ Sɛ́ sɛ́ ŋ́kɔŋ ŋɡɔ pʉɔmɛsɔŋ tsʉʉ luk.

Tîtɛ 2:14

KwɑꞋ jʉ́ kɑ ɡɑ́ tú yɛ́ ńdɔk ńzúu tú yɛkŋɛ, nɛlɔk ńtsúꞋ wɛkŋɛ nǔu mɛnu kɛpɔŋ mɛkŋɛ tsʉʉ. A kɑ niitɛ wɛkŋɛ, pɛkŋɛ tsʉ́Ꞌ pʉɔ pɛ́, ḿbɔ́ pʉɔ kɛ́ lɔ́Ꞌ, ńtsʉ́Ꞌ ńníꞋ tú ŋ́ɡɛ pɔ yúu mi ɛ́ pɔŋnɛ.

Tîtɛ 3:6

Sɛ́ kɑ lɛɛ nǔu Yɛ́su Kɛlístɔ, jʉ́ ẅi ɑ ɡɛnɛ pɛkŋɛ luk, ńníꞋ Zẅikŋɛ Lɛ́ɛnɛ́nɛ ɛ̂yɑ́ tʉ́m pɛkŋɛ kɛ́ ɡʉɔꞋ.

Ɛ́bɛlʉʉ 9:22

Pɛ́ lɑɑ ńdíŋɛ nǔu ntɛ́ yɛ́ nɛpʉ́ʉ-Mɔ̌sɛ̂ɛ, mbɔ ḿbɔ́ pɛ́ cú ŋɡɔ pɛ́ lɔk mɛci-mɛnɑɑ, suk lɔ́Ꞌ nǔu nɛlʉ́m mɛyúu. Pɛ́ pɛn ńjí ŋɡɔ: Pɛ́ lɑɑ ŋ́kɛ́ mbɔɔ tswɛt mɛci pɔ́, Sɛ́ kɛ́ mbɔɔ mɛfɑɑnɛ pʉɔmɛsɔŋ likŋɛ.

1 Pyɛ̂ 2:24

KwɑꞋ jʉ́ Kɛlístɔ kɑ tíi mɛnu kɛpɔŋ mɛkŋɛ ńníꞋ sɔŋ-mbʉʉ yɛ́, ɛ́ ŋkɑ́ yi pɛ́ kɑ kẅiinɛ wɛ́ nǔu tʉ́ mbɑ́ŋtɛ pɑ́ŋtɛ́nɛ. A kɑ ɡɛ pɔ́Ꞌɔ, nɛpɔ́ yi pɛkŋɛ ɡʉ ńtsʉ́Ꞌ pɔ mbɔ̌ nu kɛpɔŋ, ḿbɔ́ pɔ pɛpfú, ŋ́kuꞋ nɛɡɛ yúu mi ɛ́ ndʉ́ŋndʉŋ mbi Sɛ́. Pʉʉ kɑ lúꞋnɛ pɔ mɛfʉ́ŋ mɛ́ lɑ ɛ́fíitɛ.

1 Pyɛ̂ 3:18

Kɛlístɔ kɑ zɛɛ ńjʉ́ɔ yɛ́ ŋɡʉ̈ɔ́Ꞌ tɛ ḿpfú nɛlɔk ńjɛ́p mɛnu kɛpɔŋ-pʉɔmɛsɔŋ, ŋ́kɛ́ ḿpfú ndɑꞋ tɑ́Ꞌ ŋkɑ́, ɛ́ kuꞋ. Jʉ́ kɛ́ fɑɑnɛ ḿpfú ntɛ́ ɡɑŋ-mɛfɑɑnɛ, pɔ́Ꞌɔ, nɛlɔk wʉ́ʉ ńtɔ́ mbi Sɛ́. Pɛ́ kɑ jẅí mbɑp-mbʉʉ yɛ, lɑ Zẅikŋɛ Lɛ́ɛnɛ́nɛ ɡɛ ɑ pɛn ḿbɔ́ ɡú.

1 Jɑ̂ŋ 2:12

Mbɔ́ŋkʉ̈ɔ́ pɑ́ɑ, mɔ tsɛt yɔ ŋwɑꞋnɛ, ḿbɔ́ ɛ́sẅíi wʉ́ʉ ŋɡɔ Sɛ́ lɛɛ nǔu yúu mi Yɛ́su Kɛlístɔ kɑ ɡɛnɛ, ńdikŋɛ mɛnu kɛpɔŋ mʉ́ʉ ŋ́ɡɑ́ mbɔ̌ pʉʉ.

1 Jɑ̂ŋ 2:2

A kɑ zɛɛ ńdɔk tú yɛ́, ńnɔŋ pɔꞋ pɑ́Ꞌ ɛ́ lɑɑ ḿbɔ́ Sɛ́ likŋɛ mɛnu kɛpɔŋ mɛkŋɛ. Pɑ́Ꞌ ɛ́ lɑɑ ḿbɔ́ ɑ pɔɔ likŋɛ pɔ ndɑꞋ mɛkŋɛ pɔ́, pɑ́Ꞌ mbɔ ɑ pɛn ńdikŋɛ mɛ́ pʉɔmɛsɔŋ tsʉʉ ndǔmbí.

1 Jɑ̂ŋ 4:10

Ŋkɔŋɛ kɑ pɔ́ pɔ pɑ́Ꞌnɛ. Pɛkŋɛ ŋkɑɑnɛ kɛ́ ŋ́kɔŋ Sɛ́ pɔ́, jʉ́ kɑ kɔŋnɛ wɛkŋɛ. A kɑ kɔŋ wɛkŋɛ kɔŋnɛ tɛ ńtúu Mɔ́ɔ nɛ, ɑ tɔ́ ńdɔk tú yɛ́ ńnɔŋ pɔꞋ mbíꞋ wɛkŋɛ, ɛ́ yúu mi ɛ́ ɡɛnɛ Sɛ́ likŋɛ mɛnu kɛpɔŋ mɛkŋɛ.

Mɛnu ɛ́ ńdɑ́Ꞌ ńcẅɛt 14:4

pʉɔ pí pɔ́p pɑŋɡɛ́ ŋkɑɑ ɡɛ mɛnu ndǔmbí pɔ́, pɔ́p pɔ́ pɔ pʉɔ pi pɔ́p ŋkɑɑ mɑŋɡɛ́ jí. Mɔ́ɔ-Njinjɔ ɡʉ ɡɔ́ lɑ́, pɔ́p cʉ́ɔ pɔ nzʉʉ yɛ́. Pʉɔ pi pɛ́ kɑ ɡʉnɛ tsɛtsɛt pʉɔmɛsɔŋ ńtsuꞋ wɔ́p, pɔ́p ḿbɔ́ mbi Sɛ́ mbɑ mbi Mɔ́ɔ-Njinjɔ, ḿbɔ́ pɔ pɑ́Ꞌ ntú-yúu mi ɛ́ fúnɛ ŋkɑ́Ꞌ lɑ́,

Mɛnu ɛ́ ńdɑ́Ꞌ ńcẅɛt 5:9

Pɛlʉ́m pɑ́, pɔ́p mɛyúumɛku mɑ́ pɔ́ ńzɔp zɔpŋki fí ńcú tsɛtú ŋɡɔ: Ɔ kuꞋ ŋu ẅí ḿbɔ́ ɔ cẅɛ́ɛ ŋwɑꞋnɛ, ŋ́kuꞋ ŋu ẅí ḿbɔ́ ɔ ŋíɛꞋ ŋɛmɛ-ŋwɑ́Ꞌ yi pɛ́ kɑ lɔknɛ ńdɑt. Pɛ́ kɑ jẅí wú ńdɔk ńnɔŋ pɔꞋ. Ɔ kɑ tswɛt mɛci mú ńdɔk ńtsúꞋ pʉɔ, ńtsúꞋ tɛ mbɑ pʉɔ pí pɔ́p nǔu yɛ́tɛ́ njẅɛtndɑ́ lɑ́, tɛ mbɑ pʉɔ pi pɔ́p sẅiŋɛ́nɛ yɛ́tɛ́ sẅiŋɛ lɑ́, tɛ mbɑ yɛ́tɛ́ ntɛ́ lɑ́, tɛ mbɑ pɛ́ wɛ́tɛ́ ŋɡɔŋ lɑ́, ńtsúꞋ wɔ́p pɔ́Ꞌɔ, pɔ́p pɛn mbɔ̌ Sɛ́.