1 Timɔtɛ́ɛ 5:10 - Kɑɑ Fí

¹⁰ Ɛ́ píkŋɛ ŋɡɔ ɑ pɔ́ ẅí pʉɔ sɛ́ ḿbɛ́m wɛ́ mbíꞋ mɛfɑꞋ sʉ́Ꞌnɛ mɛ́, ɑ pɔ́ ẅi ɑ cúꞋlɛ́nɛ mbɔ́ŋkʉ̈ɔ́ pɛ́ sʉ́Ꞌnɛ, ḿbɔ́ ẅi ɑ ŋ́kúkŋɛ́nɛ pɛɡʉʉ njɛ́Ꞌ yɛ́, ẅí ɑ ɛ́suknɛ mɛku-pʉɔ-Kɛlístɔ, ḿbɔ́ ẅi ɑ ńcẅɛ́lɛ́nɛ pɛɡɑŋŋɡʉ̈ɔ́Ꞌ, ḿbɛn ḿbɔ́ ẅi ɑ ɡɛnɛ pɔ nu sʉ́Ꞌnɛ.

1 Timɔtɛ́ɛ 5:10 Кръстосани препратки

Mɑtʉ̈ɔ 25:17

Ŋu ẅí pɛ́ kɑ nɑ́nɛ yɛ́ pɑk ŋkʉ yɛ́pɑ́, pɛn ńjʉ́ yɛ́ yɛcɔ́ pɑk ŋkʉ yɛ́pɑ́.

Mɑtʉ̈ɔ 5:16

Ɛ́ pɔ́Ꞌɔ lɑ ɛ́ píkŋɛ ŋɡɔ pʉʉ pɔ́ kyɛꞌ-pʉɔmɛsɔŋ tɛ pɔ́p jʉ́ɔ nu sʉ́Ꞌnɛ yi pʉʉ sɛ́ ŋ́ɡɛ, ŋ́ɡúꞋlɛ Tɑ̌ɑ wʉʉ ẅí ɑ tʉ́nɛ́pú.

Lúkɑ́shi 7:38

ŋ́kúu ndɑ́, ńtʉ́ʉ nzʉʉ Yɛ́su, nɛjɔ́ŋ mɛku mɛ́, ńzɛ nɛkíi, ŋ́kíi kíinɛ tɛ ŋki-mík mɛ́ cẅɛt ńcʉ̈ɔ́tɛ nǔu mɛku-Yɛ́su. Pɛ́ pɔ́ ńjʉ́ɔ mɑŋɡɛ́ ɛ̂wɑ́ pɔ́ ńdɔk, ńtɑ́ɑ ɛ́sɛntɛ, ńdɔk lɑmɛ́ndɑɑ yîyɑ́ ńzɔ́Ꞌ.

Lúkɑ́shi 7:44

Ḿbɛn ɛ́shɔtnɛ, ńdíŋɛ mɑŋɡɛ́ ɛ̂wɑ́, ḿbɛn ńcú mbɔ̌ Simɔ̂ŋ ŋɡɔ: «Ɔ sɛ́ ńjʉ́ɔ mɑŋɡɛ́ wɔ? Mɔ ńdɑ́Ꞌ mɔ́ ŋ́kúu ndɑ́ zɑ́Ꞌnɛ, ɔ pɔɔ ɡɑ́ wɑ́ɑ ŋki n dɔk suk mɛku pɔ́, lɑ́ mɑŋɡɛ́ wɔ lɔknɛ ŋki mík mɛ́ suk mɛku mɑ́ɑ, ḿbɛn ńdɔk mɛnuk-tú mɛ́ ńtuk.

ŊwɑꞋnɛ-Gɑŋntúu Yɛ́su Kɛlístɔ 10:22

Pʉɔ ɛ̂pɑ́ cú mbɔ̌ wɛ́ ŋɡɔ: «Kɔ̂lnɛ́ɛ túunɛ wɛk, ḿbɔ́ wɛcɔ́ tɑ́tndɑ́ntsɔ-Pɑlɔ́mɑ, ḿbɔ́ ɛ́sɑ́Ꞌ pʉɔ ŋkʉ. A ŋu ndʉ́ŋndʉŋ, ḿbɔ́k Sɛ́. Pɑyúdɑ pɛtsʉʉ kẅíi lík yɛ́ pɔ sʉ́Ꞌnɛ. Tɑ́Ꞌ Cʉ̈ɔꞋ-Sɛ́ kɑ tɔ́ ńcú mbɔ̌ wɛ́ ŋɡɔ: “Túu pɛ́ ɡʉ ɛ́fúŋ Pyɛ̂, ɑ tɔ́ ndɑ́ wu, ɔ zẅíꞋlɛ nu yí ɑ ɡʉ ɛ́sẅíi wú.”»

ŊwɑꞋnɛ-Gɑŋntúu Yɛ́su Kɛlístɔ 22:12

Ŋ́kúu zúꞋu, wɛcɔ́ ŋu pɔ́ zúꞋu. Pɛ́ fúŋ wɛ́ ŋɡɔ Anɑníyɑs. A pɔ́ ŋu ŋ́ɡɛ mɛkuꞋ-Sɛ́ ḿbɛn ńnɛn pɑ́Ꞌ nɛpʉ́ʉ nɛkŋɛ sɛ́ ḿbíkŋɛ. Pɑyúdɑ pi pɔ́p ńtswɛ́nɛ tʉ́sɔŋ-Ndɑ́mɑ́s tɛ ḿmik wɔ́p pɔ́ ŋ́kẅíi lík yɛ́ pɔ sʉ́Ꞌnɛ.

ŊwɑꞋnɛ-Gɑŋntúu Yɛ́su Kɛlístɔ 6:3

Pɔ́Ꞌɔ lɑ́ mbɑ̌ɑ pɔ́ɔpɛ́mɑ́, pʉʉ ɡʉ tsɛtsɛt pʉʉ, ńdɔɔ pʉɔ sɑɑmbɑ́ pɑ́Ꞌ pɔ́p ɡʉ ḿbɔ́ ɛ́fɑꞋ yîyɑ́ fɑꞋ. Pʉʉ tsʉ́Ꞌ nɛtsɔ́Ꞌ, ńdíŋɛ pʉɔ pi tswɛ́ wɔp pɔŋnɛ. Pʉɔ pi Zẅikŋɛ-Sɛ́ kɑ jʉ́ mɔ tʉ́m yɔ́p. Pɔ́p pɛn ŋ́ɡẅɛɛ jínu. Pɛk ńníꞋ fɑꞋ-yúupɛ́jʉ́ mbɔ̌ pɔ́p,

ŊwɑꞋnɛ-Gɑŋntúu Yɛ́su Kɛlístɔ 9:36

Wɛcɔ́ mɑŋɡɛ́ pɔ́ Jɔp, lík yɛ́ pɔ́ ŋɡɔ Tɑpítɑ, ńdɔk ńcú ŋɡɔ Ndɔlkɑs nǔu cú-Ŋɡɛlɛk, ɛ́ lɔk ńcú ŋɡɔ ŋ́ɡɑ́p nǔu cú wɛkŋɛ. A pɔ́, mbɔ ɑ kɑ pɛ́m nu-Yɛ́su, ḿbɔ́ ŋ́kɑ́ tsʉʉ ŋ́ɡɛ pɔ nu sʉ́Ꞌnɛ, ḿbɛn ńtɔ́ɔtɛ pɑkɛ́yúu.

ŊwɑꞋnɛ-Gɑŋntúu Yɛ́su Kɛlístɔ 9:39

Pyɛ̂ ɡɔ́ɔ ńzúꞋ, pɔ́p pɛ́pɔ́p cʉ́ɔ sɛ̂ndúŋ kɛ́ lɑ́ɑtɛ, ŋ́ɡʉ tɛ ŋ́kúu zúꞋu, pɛ́ lɔk wɛ́ ŋ́ɡʉ tsɛt lûmndɑ́ ẅi ɛ́ ndǔ ndɛ̂k wɛ tʉ́. A kúu tsɛtú, pɛpfúk pɑŋɡɛ́ tsʉʉ tɔ́ ńcúꞋlɛ nɛjɔ́ŋ wɛ́, ḿbɔ́ ńdɑɑ, ḿbɔ́ ḿmɑꞋ mɛjʉ́ŋ ńnyɛt wɛ́ nɛ́ mɛkɛm-ndẅí nɛ́ mɛcɔ́ mɛndẅí mi Tɑpítɑ kɑ pɛ́tnɛ ntʉʉ, ńtɛ́m ŋ́ɡɑ́ mbɔ̌ pɔ́p.

Pʉɔ-Lɔ́mɑ 12:13

Yúu lɑɑ ńjɑ́k mbɔ̌ pɔ́ɔpɛ́mɑ́, pʉʉ pʉɔ-Kɛlístɔ, pʉʉ cẅɛ́lɛ́ wɔ́p. Pʉʉ ńnɑ́ŋ ńcẅɛ́ɛ pʉɔ-túu sʉ́Ꞌnɛ.

Ɛ́fɛ̂zɛ 2:10

Pɛkŋɛ lɑɑ ḿbɔ́ kʉ̈ɔ́ ɔɔ, mbɔ pɛkŋɛ lúꞋnɛ pɔ Sɛ́. Sɛ́ kɑ lɛɛ nǔu Yɛ́su Kɛlístɔ ḿbɔ́ɔ wɛkŋɛ, nɛpɔ́ yi pɛkŋɛ ɡʉ ɛ́fɑꞋ mɛfɑꞋ sʉ́Ꞌnɛ mi jʉ́ Sɛ́ kɑ lɑ́Ꞌnɛ ńniitɛ ńzɑ́p pɑ́Ꞌ pɛkŋɛ ɡʉ ɛ́fɑꞋ.

Kɔlɔsíyɛ̂ŋ 1:10

Pɔ́Ꞌɔ, pʉʉ kuꞋ nɛnɑ́ŋ nǔu ntɛ́ yi Tsɑpʉɔ sɛ́ ŋ́kɔŋ, ḿbɔ́ ŋ́ɡɛ pɔ yúu mi ɛ́ pɔŋnɛ wɛ́, ɛ́fɑꞋ mɛfɑꞋ sʉ́Ꞌnɛ mɛntɛ́ mɛntɛ́, ŋ́kẅiꞋ ńjí jʉ́ Sɛ́.

1 Timɔtɛ́ɛ 2:10

Ɛ́ píkŋɛ ŋɡɔ pɔ́p lɔk pɔ mɑt wɔp ńnyɛt ŋɡɔ pɔ́p pɑŋɡɛ́ pi pɔ́p síinɛ. Ɛ́ pɑ́Ꞌ pɑŋɡɛ́ pi pɔ́p ɡɛnɛ yúu mi ɛ́ pɔŋnɛ Sɛ́ ɡẅɛɛnɛ nɛɡɛ.

1 Timɔtɛ́ɛ 3:2

Ɛ́ píkŋɛ ŋɡɔ ŋu ẅí ɑ líŋɛ́nɛ cúꞋlɛ-pʉɔ-Kɛlístɔ pɔ́ ŋu ẅí pɛ́ kɑ́ kẅíi lík yɛ́ kɛpɔŋ pɔ́. Ɛ́ píkŋɛ ŋɡɔ ɑ ɡẅɛɛ pɔ tɑ́Ꞌ mɑŋɡɛ́ wɛ́mɔ́Ꞌ, kɔɔ ɑ ɡɛ yɛcɔ́ yúu tɛ ɛ́ lɛɛ. A pɔ́ ŋu ẅí ɑ sɑ́ŋ nu lɑ ŋ́ɡɛ, ḿbɔ́ ŋu ẅí ɑ kúkŋɛ pɛɡʉʉ sʉ́Ꞌnɛ, ŋ́kuꞋ nɛzíꞋ pʉɔ nɛ́ yúu.

1 Timɔtɛ́ɛ 3:7

Ɛ́ pɛn ḿbɔ́ ḿbíkŋɛ ŋɡɔ ɑ pɔ́ ŋu ẅí pʉɔ pi pɔ́p kɑ́ pɔ́ pʉɔ-Kɛlístɔ pɔ́, pɔ́ kẅíi lík yɛ́ pɔ sʉ́Ꞌnɛ. Pɔ́Ꞌɔ, mɛcɔ́ mɛnu mɛ́ mi ḿbɔ́ pɛ́ kɛm sʉ́ʉ kɔ́ wɛ́ pɔɔ ɡú pɔ́, Sɑ́ttɑ pɔɔ kuꞋ nɛlʉꞋ ŋkʉ tɛ ńdɔk ŋ́ɡẅɛɛ wɛ́ pɔ́.

1 Timɔtɛ́ɛ 5:16

Mɑŋɡɛ́ lɑɑ ḿbɔ́ ŋu-Kɛlístɔ, pɛpfúk pɔ́ nǔu tsɛ́nndɑ́ yɔ́p, mbɔ ɛ́ sɛ́ ḿbíkŋɛ ŋɡɔ jʉ́ pɔ́nɛ ńcẅɛ́lɛ́ wɔ́p tɛ mbɔɔ ɡɑ́ yîyɑ́ piꞋ mbɔ̌ cúꞋlɛ-pʉɔ-Kɛlístɔ pɔ́, ńjí ŋɡɔ cúꞋlɛ-pʉɔ-Kɛlístɔ ɡʉ ńcẅɛ́lɛ́ pɔ pɛpfúk pi ŋu kɑ́ pɔ́ nzʉʉ pɔ́p pɔ́.

1 Timɔtɛ́ɛ 5:25

Ɛ́ pɛn ḿbɔ́ pɔ ndʉ́ŋndʉŋ nǔu mɛfɑꞋ sʉ́Ꞌnɛ, ɛ́ zɛɛ ńcẅɛt pɔ mɑ́ntɑ́ɑ, tɛ mbɑ mi pɛ́ kɑ́ pɔ́ fɛ́Ꞌnɛ ńjʉ́ɔ pɔ́, pɛ́ ńdɑ́Ꞌ ŋ́kɛ́ ńjʉ́ɔ jʉ́ɔnɛ.

1 Timɔtɛ́ɛ 6:18

Cú mbɔ̌ pɔ́p ŋɡɔ pɔ́p ɡɛ nu sʉ́Ꞌnɛ. NɛfɑꞋ mɛfɑꞋ sʉ́Ꞌnɛ pɔ́ yɔ́p fuꞋ, ŋɡɔ pɔ́p zíꞋ nɛɡɑp pɔ́, ńdɔk yúu pɔ́p ńcẅɛ́lɛ́ pʉɔ.

2 Timɔtɛ́ɛ 1:5

Ŋ kɑ́ likŋɛ ŋɡɔ ɔ zɑ́p tʉ́m nǔu Yɛ́su Kɛlístɔ tɛ ɛ́sẅíi nu pɔ́, ŋ kɑ́ likŋɛ ŋɡɔ mɑ́ wu wɛ ndʉ́m Lɔẅîs tɛ mbɑ mɑ́ wu Ɛnîs kɑ pɔ́ ŋ́ɡɛ pɔ pɔ́Ꞌɔ pɔ́. N jí ŋɡɔ mbɑ ɡu yú pɛn ńzɑ́p tʉ́m yú nǔu Yɛ́su pɔ pɑ́Ꞌ pɔ́p.

2 Timɔtɛ́ɛ 2:21

Pɔ́Ꞌɔ, ŋu lɑɑ ḿbʉʉtɛ mbʉʉ yɛ nǔu mɛnu kɛpɔŋ mi ɛ fúnɛ nɛcú lɑɑ, mbɔ ŋɡɑŋ ɡʉ ḿbɔ́ pɑ́Ꞌ kɑ́ŋ yi pɛ́ tíknɛ sɛ́ pɔ nǔu lɛ́Ꞌ ɡwɛ́ lɑ́. Mbɔ ɑ ɡʉ ḿbɔ́ ŋu Tsɑpʉɔ fyɑknɛ wɛ́ ńdɔk ŋ́ɡɛ wɛ, ɑ cẅɛ́lɛ́ Tsɑpʉɔ wɛ, ɑ pɔ́ ŋu ẅí ɑ ɡɛnɛ nu sʉ́Ꞌnɛ tsʉʉ.

2 Timɔtɛ́ɛ 3:15

Ɔ kɑ ɡɔ́ ńdɔ sɛ́ ḿbɔ́ ńjí yúu mi ŋwɑꞋnɛ-Sɛ́ yɛ́tɛ́, ḿbɔ́ yɛ́tɛ́ ɡɑ́nɛ wú nɛ́ jínu nɛlɔk ńzɑ́p tʉ́m nǔu Yɛ́su Kɛlístɔ, Sɛ́ ɡɛ ɔ luk.

2 Timɔtɛ́ɛ 3:17

Ɛ́ lɛɛ pɔ́Ꞌɔ, ŋu ɑ fɑꞋnɛ fɑꞋ-Sɛ́ niitɛ mbʉʉ yɛ kwɑꞋ sʉ́Ꞌnɛ, ŋ́kuꞋ nɛɡẅɛɛ kʉ̈ɔ́ lɑ́ yi mbɔ ɑ lɔk ŋ́ɡɛ nu tsʉʉ yi ɛ́ pɔŋnɛ.

Tîtɛ 2:14

KwɑꞋ jʉ́ kɑ ɡɑ́ tú yɛ́ ńdɔk ńzúu tú yɛkŋɛ, nɛlɔk ńtsúꞋ wɛkŋɛ nǔu mɛnu kɛpɔŋ mɛkŋɛ tsʉʉ. A kɑ niitɛ wɛkŋɛ, pɛkŋɛ tsʉ́Ꞌ pʉɔ pɛ́, ḿbɔ́ pʉɔ kɛ́ lɔ́Ꞌ, ńtsʉ́Ꞌ ńníꞋ tú ŋ́ɡɛ pɔ yúu mi ɛ́ pɔŋnɛ.

Tîtɛ 2:7

mbɑ nǔu kʉ̈ɔ́ lɑ́. KwɑꞋ ɡu tʉ́ʉ nǔu kʉ̈ɔ́ lɑ́, ńnyɛt pɔ fʉꞋ-yúu sʉ́Ꞌnɛ. Ɔ lɑɑ ḿbɔ́ ńzíꞋ pʉɔ nɛ́ yúu, ɔ zíꞋ wɔ́p pɔ ndɑꞋ nɛ́ nu yi Sɛ́ kɔŋnɛ, ḿbɛn ńzíꞋ tɛ ńjí yúu mi ɔ zíꞋnɛ yɛ́tɛ́.

Tîtɛ 3:1

Kẅíitɛ pʉɔ-Kɛlístɔ ŋɡɔ pɔ́p ɡẅɛɛ nɛzúꞋ ntsu-pɑsɑ́Ꞌŋɡɔŋ pɔ́p pɑtsiinɛ ŋɡɔŋ, ŋ́ɡɛ yúu mi pɔ́p sɛ́ ḿbíkŋɛ, ḿbɛn ńnɑ́ŋ ńtʉ́ʉ pɔ nɛɡɛ mɛnu mi ɛ́ pɔŋnɛ.

Tîtɛ 3:14

Ɛ́ píkŋɛ ŋɡɔ pɔ́ɔpɛ́mɑ́ pɛkŋɛ nzʉʉ Kɛlístɔ ɡẅɛɛ nɛsɑ́Ꞌ tʉʉ ŋ́ɡɛ mɛnu sʉ́Ꞌnɛ, nɛlɔk ńcẅɛ́lɛ́ pʉɔ pi kwɑꞋ nu tʉ́ʉnɛ nǔu pɔ́p, kɔɔ pɔ́p pɔ́ pʉɔ kɛ pɛ́ ńdúꞋnɛ wɔ́p.

Tîtɛ 3:8

Mɛnu mɔnɛ mi ɛ fúnɛ nɛcú lɑɑ zúꞋu ḿbɔ́ pɔ́Ꞌɔ. M bɛn ḿbɔ́ ŋ́kɔŋ ŋɡɔ ɔ tsuŋ ɛ́sẅíi wɔ́p sʉ́Ꞌnɛ, ńjí ŋɡɔ pʉɔ tsʉʉ pi pɔ́p zɑ́pnɛ tʉ́m yɔ́p nǔu Sɛ́ ɡʉ ɛ́sɑ́Ꞌ tʉʉ nɛɡɛ mɛfɑꞋ sʉ́Ꞌnɛ, ɛ́ pɔ́ pɔ́Ꞌɔ, yúu mi ɔ zíꞋnɛ pɔŋ ḿbɛn ḿbɔ́ yúu mi ɛ́ ńcẅɛ́lɛ́ pʉɔmɛsɔŋ.

Ɛ́bɛlʉʉ 10:24

Kɔɔ ŋu wɛkŋɛ likŋɛ nɛlíŋɛ mɔ́ɔmɑ́ wɛ, ḿbɛn ńdíŋɛ wɛ́, ńjí ŋɡɔ pɛkŋɛ ɡʉ ńdɔk pɔ́Ꞌɔ, ńníꞋ mɛtʉʉ mɛkŋɛ nǔu nɛɡẅɛɛ ŋkɔŋɛ mbɑ nǔu nɛfɑꞋ mɛfɑꞋ sʉ́Ꞌnɛ.

Ɛ́bɛlʉʉ 13:2

Kɔɔ pʉʉ likŋɛ nɛkúkŋɛ pɛɡʉʉ pi pɔ́p tɔ́nɛ njɛ́Ꞌ pʉʉ, pɛcɔ́ pʉɔ kɑ lɑ́Ꞌ ŋ́kúkŋɛ pɛɡʉʉ kúkŋɛ́nɛ, tɛ ńdɑ́Ꞌ lɛ́Ꞌ ŋ́kúkŋɛ pɛcʉ̈ɔ́Ꞌ-Sɛ́ kɛ́ jí.

Ɛ́bɛlʉʉ 13:21

Ɛ́ pɔŋ ŋɡɔ Sɛ́ mbɔ́tnɛ ɛ̂wɑ́, ɡɛ pʉʉ kuꞋ nɛɡɛ nu sʉ́Ꞌnɛ nɛpɔ́ yi pʉʉ ɡʉ ŋ́ɡɛ pɔ yúu mi ɑ sɛ́ ŋ́kɔŋ. Ɛ́ pɔŋ ŋɡɔ jʉ́ Sɛ́ fú nǔu Yɛ́su Kɛlístɔ, ŋ́ɡɛ yúu mi ɛ́ pɔŋnɛ wɛ́ pɔ́ nǔu pɛkŋɛ. NɛɡúꞋ pɔ́ mbɔ̌ Yɛ́su Kɛlístɔ nǔu mɛŋɡuꞋ mɛŋɡuꞋ! Ɛ́ pɔ́Ꞌɔ.

1 Pyɛ̂ 2:12

Pʉʉ ɡẅɛɛ tsẅɛ́ sʉ́Ꞌnɛ tsɛtsɛt pɑkɛ́jí nu-Sɛ́, tɛ ḿbɔ́ yi pɔ́p lɑɑ ḿbɔ́ ɛ́sẅíitɛ kɛpɔŋ nǔu lík yʉ́ʉ, pɔ́p jʉ́ɔ mɛnu sʉ́Ꞌnɛ mi pʉʉ sɛ́ ŋ́ɡɛ, ŋ́ɡúꞋlɛ lík-Sɛ́ ŋkɑ́ yi Sɛ́ ɡʉ ŋ́ɡɛ ńtɔ́ ńcú nu mbɔ̌ pɔ́p.

1 Pyɛ̂ 4:9

Pʉʉ kúkŋɛ pɔ́ɔpɛ́mɑ́ pʉʉ tsɛtsɛt pʉʉ tsɛt mɛndɑ́ mʉ́ʉ kɛ́ pɔ́ ńcútɛ.

3 Jɑ̂ŋ 1:12

ŋ́ɡʉ nǔu Ndɛlmɛ́tɛ́lẅís, mbɔ mbɑ wɔ̌ lɑ́ kẅíi lík yɛ́ pɔ sʉ́Ꞌnɛ. Ntɛ́ yi ɑ sɛ́ ńdɔk ńnɛn nǔu sɛ̂ndúŋ-nu nɛ́nẅín sɛ́ ńdɛꞋlɛ ŋɡɔ mɛfɑꞋ mɛ́ pɔŋ. Pɛk ɡúu sɛ́ ŋ́kẅíi lík yɛ́ pɔ sʉ́Ꞌnɛ, ɔ pɛn ḿbɔ́ ńjí ŋɡɔ pɛk lɔk ńcú ɛ́sẅíi nu.