1 Tɛsɑlɔník 5:12 - Kɑɑ Fí

¹² Pɔ́ɔpɛ́mɑ́, pɛk púꞋ mbɔ́ mbɔ̌ pʉʉ ŋɡɔ pʉʉ ɡɑ́ mɛkuꞋ mbɔ̌ pʉɔ pi pɔ́p fɑꞋnɛ fɑꞋ-Sɛ́ tsɛtsɛt pʉʉ, mbɔ̌ pʉɔ pi Tsɑpʉɔ kɑ tíknɛ wɔ́p mbi pʉʉ ŋɡɔ pɔ́p tʉ̈ɔ́Ꞌlɛ wʉ́ʉ.

1 Tɛsɑlɔník 5:12 Кръстосани препратки

Lúkɑ́shi 10:7

Pʉʉ lɑɑ ḿbiitɛ tɛ ŋ́kúu tsɛt ndɑ́, pʉʉ nɑ́ŋ pɔ tsɛt ndɑ́ ɛ̂yɑ́, pʉʉ pɑ́ɑ nɛpɛn ŋ́ɡʉ yɛcɔ́ zʉꞋ ndɛꞋ, pɛ́ ɡɑ́ mbɑ kʉ̈ɔ́ lɑ́ zúꞋu pʉʉ kwɛ́t, ḿbɛn ńnɔ́, kɛ́ kɔ́ sʉ́ʉ, mbíꞋŋɡɔ ŋu lɑɑ ɛ́fɑꞋ fɑꞋ, mbɔ ɑ ɡɛ ńjʉ́ pii-fɑꞋ.»

Jɑ̂ŋ 4:38

Ŋ kɑ túu wʉ́ʉ nɛlɔk yúu mi pʉʉ ŋkɑɑ jʉ́ɔ yɛcɔ́ ŋɡʉ̈ɔ́Ꞌ nǔu ḿbi pɔ́, pɛcɔ́ pʉɔ kɑ jʉ́ɔ ŋɡʉ̈ɔ́Ꞌ, pʉʉ kɑ tɔ́ yʉ́ʉ, ńtsʉ́Ꞌ ńjʉ́ pii-fɑꞋ yɔ́p jʉ́nɛ.»

ŊwɑꞋnɛ-Gɑŋntúu Yɛ́su Kɛlístɔ 20:28

Pʉʉ pɑ́ɑ yʉ́ʉ tú kwɑꞋ sʉ́Ꞌnɛ, ḿbɛn ḿbɑ́ɑ yɛ nɔɔ-mɛnjinjɔ mi Zẅikŋɛ-Sɛ́ kɑ níꞋnɛ mbɔ̌ pʉʉ ŋɡɔ pʉʉ pɔ́ ḿbyɛ́p. Pʉʉ líŋɛ cúꞋlɛ-pʉɔ-Sɛ́ sʉ́Ꞌnɛ. Jʉ́ ẅi ɑ lɛɛnɛ nǔu mɛci-Mɔ́ɔ nɛ ŋ́ɡɛ cúꞋlɛ ɛ̂yɑ́ tsʉ́Ꞌ pʉɔ pɛ́.

ŊwɑꞋnɛ-Gɑŋntúu Yɛ́su Kɛlístɔ 20:35

Ŋ kɑ pɔ́ ńnyɛt wʉ́ʉ ŋkɑ́ tsʉʉ ntɛ́ yi ɛ́ sɛ́ ḿbíkŋɛ ŋɡɔ pɛ́ fɑꞋ pɔ́Ꞌɔ, ńjí ŋɡɔ pɛ́ ɡʉ cẅɛ́lɛ́ pɑ kɛ́ yúu. Ɛ́ pɔŋ nɛkẅíitɛ nu yi kwɑꞋ Tsɑpʉɔ Yɛ́su kɑ cúnɛ ŋɡɔ: “Ŋu ɑ ɡɑ́nɛ yúu ɡẅɛɛ pɔ́ttú ńtsɑ ŋu ɑ cẅɛ́ɛnɛ.”»

Pʉɔ-Lɔ́mɑ 16:12

Pʉʉ cɛꞋlɛ Tilifɛn pɔ́p mɔ́ɔmɑ́ wɛ Tilifɔs, ɛ́ pɑŋɡɛ́ pi pɔ́p fɑꞋnɛ fɑꞋ-Tsɑpʉɔ tɛꞋ. Pʉʉ cɛꞋlɛ Pɛɛsidɛ. A tʉʉndɛn mɔ́ɔmɑ́ wɑ́ɑ wɛ mɑŋɡɛ́. A kɑ fɑꞋ yɛ́ fɑꞋ-Tsɑpʉɔ tɛꞋ.

Pʉɔ-Lɔ́mɑ 16:6

Pʉʉ ńcɛꞋlɛ Mɑlíyɑ. A kɑ kíɛ ziꞋnɛ tɛꞋ mbíꞋ wʉ́ʉ.

1 Kɔlɛ̂ŋtɛ 12:28

Sɛ́ kɑ tsʉ́Ꞌ nɛniitɛ cúꞋlɛ yɛ́, ḿbiitɛ ńzɑ́p ɡɑŋntúu, ḿbɑ́ɑtɛ ńzɑ́p pɑcẅiŋkʉʉ pi pɔ́p fúnɛ mbɔ̌ wɛ́, ḿbɑ́ɑtɛ ńtík pɑzíꞋ pʉɔ nɛ́ nu-Sɛ́, pɛ́ fú nǔu pɔ́p ńjʉ́ɔ pʉɔ pinɛ ɑ kɑ ɡɑ́nɛ fuꞋ níinɛ yɔ́p, ɛ́ pɔ́ pɑ́Ꞌ pɔ́p ɡʉ ŋ́ɡɛ mɛnu mɑ̌ɑmɑɑnɛ, ḿbɑ́ɑtɛ ńjʉ́ɔ pʉɔ pi ɑ kɑ ɡɑ́nɛ fuꞋ níinɛ yɔ́p, ɛ́ pɔ́ pɑ́Ꞌ pɔ́p ɡʉ ŋ́ɡɛ ɡɑŋɡɔɔ fíitɛ, pɛ́ fú nǔu pɔ́p ńjʉ́ɔ pʉɔ pi yɔ́p pɔ́fɑꞋ ɛ́ nɛcẅɛ́lɛ pɛcɔ́ pʉɔ mbɑ pʉɔ pi pɔ́p niitɛ́nɛ cúꞋlɛ, tɛ mbɑ pʉɔ pi ɑ kɑ ɡɑ́nɛ fuꞋ níinɛ yɔ́p ɛ́ pɔ́ pɑ́Ꞌ pɔ́p ɡʉ ɛ́sẅíŋɛ mɛsẅíŋɛ mi pɔ́p ŋkɑɑ zíꞋ.

1 Kɔlɛ̂ŋtɛ 15:10

Ɛ́ kɑ kɛ́ ńdɛɛ pɔ nǔu pɑ́Ꞌ Sɛ́ ɡɑ́nɛ fuꞋ níinɛ yɑ́ɑ, ńnɑ́ŋ ńcẅɛ́lɛ wɑ́ɑ lɑ́ n tsʉ́Ꞌ yúu mi mɔ yɛ́tɛ́ lɑɑ. Yîyɑ́ ntɛ́ nɛɡɑ́ fuꞋ níinɛ yɑ́ɑ ŋkɑɑ lɛɛ níinɛ pɔ́, ɛ fɑꞋ fɑꞋ ńdɛɛ pɛcɔ́ ɡɑŋntúu, lɑ́ mɔ kɑ́nɛ pɔ́ ńdɔk mɑ́ɑ mɛtʉʉ ɛ́fɑꞋ pɔ́. Sɛ́ cẅɛ́lɛ́nɛ wɑ́ɑ ŋ́ɡɑ́ mɛtʉʉ n dɔk ɛ́fɑꞋ.

1 Kɔlɛ̂ŋtɛ 16:16

Pʉʉ zúꞋ ntsu-pʉɔ pɑ́Ꞌ pɔ́p, mbɑ wɛ pʉɔ pi pɔ́p pɛpɔ́p ŋ́kíɛnɛ ziꞋnɛ.

1 Kɔlɛ̂ŋtɛ 16:18

Pɔ́p kɑ níꞋ tʉ́m yɑ́ɑ pɑ́Ꞌ pɔ́p kɑ níꞋnɛ yʉ́ʉ ɡúu. Pʉʉ ɡɑ́ mɛkuꞋ mbɔ̌ ntɛ́-pʉɔ pɑ́Ꞌ pɔ́p lɑɑ.

1 Kɔlɛ̂ŋtɛ 3:9

MbíꞋŋɡɔ pɛk tɛmtɛ ḿbɔ́ ɛ́fɑꞋ pɔ fɑꞋ-Sɛ́. Pʉʉ pɔ́ ŋkɑ́Ꞌ-Sɛ́, ḿbɛn ḿbɔ́ ndɑ́ yi Sɛ́ sɛ́ ŋ́kút.

2 Kɔlɛ̂ŋtɛ 11:23

Kɛ pɔ pɑ́Ꞌ pɔ́p pɑfɑꞋ fɑꞋ-Kɛlístɔ? M bɔ́ ńcú nu kwɑꞋ pɑ́Ꞌ pɑ́lɛ́ lɑ́, ńcú ŋɡɔ mɔ ŋu ẅi ɛ fɑꞋnɛ fɑꞋ-Kɛlístɔ tɛ ńdɛɛ wɔ́p pɛ́tsʉʉ, ńcú pɔ́Ꞌɔ, ɛ́fú nǔu pɑ́Ꞌ ŋ kɑ kíɛ ziꞋnɛ ńdɛɛ wɔ́p, ɛ́fú nǔu ndɛn ẅi ŋ kɑ kúunɛ tsɑ́ŋ ńdɛɛ wɔ́p, ɛ́fú nǔu ndɛn ẅí pɛ́ kɑ tswɑ́ɑnɛ wɑ́ɑ ńdɛɛ wɔ́p, ɛ́fú nǔu ndɛn mɛŋkɑ́ tɛ ńzɑ́ɑ mi nɛvú kɑ nʉknɛ wɑ́ɑ ńdɛɛ wɔ́p,

2 Kɔlɛ̂ŋtɛ 5:9

Ɛ́ lɛɛ pɔ́Ꞌɔ, yúu mi pɛk sɛ́ ńtsɑ́ɑ nɛɡɛ tɛꞋ, ɛ́ nɛɡɛ yúu mi ɛ́ pɔŋnɛ wɛ́. Kɛ pɔ pɑ́Ꞌ pɛk tsɛt yɔ mbʉʉ ɔɔ, kɛ pɔ pɑ́Ꞌ pɛk cẅɛtnɛ tsɛtú ɔɔ,

2 Kɔlɛ̂ŋtɛ 6:1

Pɑ́Ꞌ pɛkŋɛ pɛ́ Sɛ́ tɛmtɛ́nɛ ḿbɔ́ ɛ́fɑꞋ lɑ́, pɛk sɛ́ ńní mɛtʉʉ mʉ́ʉ ŋɡɔ kɔɔ pʉʉ ɡɛ nǔu ntɛ́ yi, nɛpɔ́ ẅi Sɛ́ tsɑ́ɑnɛ wʉ́ʉ, ŋ́ɡɑ́ fuꞋ níinɛ yʉ́ʉ, ɡʉ ńdɛɛ fɛ̌ɛ.

Ŋɡɑlɑ̂t 4:11

M bɔ́k yúu mi pʉʉ sɛ́ ŋ́ɡɛ lɑ́, ḿbɔ́ mɛfɑꞋ mi ŋ kɑ fɑꞋnɛ tsɛtsɛt pʉʉ lɛɛ níinɛ.

Filipɛ 2:16

nɛlɔk Ŋkʉʉ Sʉ́Ꞌnɛ ńtɔ́ mbɔ̌ pɔ́p. Ɛ́ lɑ́Ꞌ lɛ́Ꞌ yi Kɛlístɔ ḿbɛn ńtɔ́, n diŋɛ wʉ́ʉ, nu yʉ́ʉ pɔŋ wɑ́ɑ. Mbɑ wɔ̌ lɑ́ jʉ́ɔ ŋɡɔ mɛfɑꞋ mi ŋ kɑ jʉ́ɔnɛ ŋɡʉ̈ɔ́Ꞌ ɛ́fɑꞋ ɛ́ ŋkɑɑ lɛɛ níinɛ pɔ́.

Filipɛ 2:19

Mɔ sɛ́ ńtsɑ́ɑ nɛtúu Timɔtɛ̂ɛ mbɔ̌ pʉʉ, pɑ́Ꞌ Tsɑpʉɔ Yɛ́su lɑɑ ḿbɛ́m. A ńtɔ́ ŋ́ɡwɑ́ wʉ́ʉ, ḿbɛn nzʉʉ ɛ́sẅíi wɑ́ɑ, n dɔk ŋ́ɡẅɛɛ sʉk,

Kɔlɔsíyɛ̂ŋ 1:29

Pʉʉ zúꞋ yúu mi m pfúnɛ nǔu. Ŋ kɛ́ ńdɔk pɔ mɛtʉʉ mi ɛ́ fúnɛ mbɔ̌ Kɛlístɔ lɑ ɛ́fɑꞋ yɔ fɑꞋ. Mîmɑ́ mɛtʉʉ tsuŋ ḿbɔ́ sɔŋ mbʉʉ mɔ ḿbɔ́ ɛ́fɑꞋ.

1 Tɛsɑlɔník 2:9

Pʉʉ kẅíitɛ pɑ́Ꞌ ɛ́ kɑ pɔ́nɛ ŋkɑ́ yi pɛk kɑ pɔ́ ńcẅi Ŋkʉʉ Sʉ́Ꞌnɛ mbɔ̌ pʉʉ lɑ́, pɛk pɛn ɛ́fɑꞋ tɛ ŋ́kɑ́ɑ, lɑ ŋ́ɡẅɛɛ yúu kwɛ́tnɛ. Pɛk kɑ pɔ́ ɛ́fɑꞋ nɛnɛm ɛ́fɑ́Ꞌ nɛtúꞋ. Pɛk ŋkɑɑ kɔŋ nɛtsʉ́Ꞌ piꞋ mbɔ̌ wɛcɔ́ ŋu wʉʉ pɔ́.

1 Tɛsɑlɔník 4:1

Pɔ́ɔpɛ́mɑ́, nu yi pɛk ɡʉ ńdɔk ńdẅiklɛ ɛ́ pɔ́ pɔ ŋɡɔ pɛk kɑ sẅíi wʉ́ʉ nɛ́ ntɛ́ yi ɛ́ lɑɑ ḿbɔ́ pʉʉ lɔk ńnɑ́ŋ pɔ́Ꞌɔ, nu yʉ́ʉ pɔŋ Sɛ́. Ɛ́ ɡʉ ŋ́ɡɛ pɑ́Ꞌ lɑ́ pʉʉ pɔ́ ńnɑ́ŋ pɔ pɔ́Ꞌɔ. Lɑ́ pɛk pɛn ḿbɔ́ ḿbíkŋɛ mbɔ̌ pʉʉ, tɛ ḿbúꞋ pɔ mbɔ́ nǔu lík-Tsɑpʉɔ Yɛ́su ŋɡɔ, pʉʉ ɡɛ pɔ pɔ́Ꞌɔ, ńdɔk ŋ́ɡʉ nɛ́ mbi.

1 Tɛsɑlɔník 5:14

Pɔ́ɔpɛ́mɑ́, pɛk sɛ́ ḿbúꞋ mbɔ́ mbɔ̌ pʉʉ ŋɡɔ pʉʉ ɡɑ́ ntík mbɔ̌ pɛlɔ́ŋ, ńní mɛtʉʉ-pʉɔ pi pɔ́p kɑ́ ɡẅɛɛ mbɔŋyúu pɔ́, ńtɔ́ɔtɛ pʉɔ pi pɔ́p pɛ́t pɔ kɛ́ tɛntɛ, ŋ́ɡẅɛɛ pɔ kɔkmbʉʉ nzʉʉ mbɑ wɔ̌ lɑ́.

1 Timɔtɛ́ɛ 5:1

Ɔ lɑɑ ḿbɔ́ ɛ́sẅíi ndɛn ndʉ́m nɛ nu, kɔɔ cʉ́ɔk wɛ́ cʉ́ɔknɛ. Cú nu mbɔ̌ wɛ́ pɑ́Ꞌ ɔ cú mbɔ̌ tɑ́t wu. Líŋɛ pɔ́ɔsuu pɑ́Ꞌ pɔ́ɔpɛ́mɑ́ pú pɛ́ mbɛ́ɛnɛ,

1 Timɔtɛ́ɛ 5:20

Ɛ́ ɡʉ nǔu pʉɔ pi pɔ́p tsuŋnɛ ŋ́ɡɛ nu kɛpɔŋ, ɔ tʉ́ʉ pɔ tsɛt cúꞋlɛ ŋ́kɑkŋɛ wɔ́p, pɛcɔ́ pʉɔ jʉ́ɔ pɔ́Ꞌɔ, ḿbɔ́k nɛɡɛ nu kɛpɔŋ.

2 Timɔtɛ́ɛ 2:6

Nzʉ́Ꞌnɑŋ ẅí ɑ ŋ́kíɛnɛ ziꞋnɛ sʉ́Ꞌnɛ, ḿbɔ́ nduŋmbi nɛkwɛ́t yúu mi ɛ́ fúnɛ ŋkɑ́Ꞌ yɛ́.

Tîtɛ 1:3

A kɑ ńnɑ́ŋ tɛ ŋkɑ́ kuꞋ, ɑ ɡɛ pɛ́ jí sẅiŋɛ yɛ́, ńdɛɛ nǔu ŋkʉʉ ɑ kɑ níꞋnɛ mbɔ̌ mɔ. Mɔ sɛ́ ńcẅi ẅîwɑ́ ŋkʉʉ mbɔ̌ lɑ́Ꞌ mbíꞋŋɡɔ Sɛ́ ẅi ɑ ɡɛnɛ pɛkŋɛ luk kɑ cúnɛ ŋɡɔ ɛ sɑ́Ꞌ.

Tîtɛ 1:5

Ŋ kɑ nɑ́ wú ŋɡɔŋ-Kɛlɛ̂t nɛpɔ́ yi ɔ ɡʉ ńtsʉ́Ꞌ mɛkŋɛ ńtɛ́ɛ cúꞋlɛ-pʉɔ Kɛlístɔ, ḿbɛn ńzɑ́p pɑcẅɛ́ɛmbi tsɛt mbɑ wɛ́t tʉ́sɔŋ lɑ́, ńtsʉ́Ꞌ nɛzɑ́p, ńzɑ́p pɔ pɑ́Ꞌ ŋ kɑ cúnɛ mbɔ̌ ɡu.

Tîtɛ 2:15

Mɔnɛ mɛnu mi ɔ ɡẅɛɛ nɛ kɛ́ ńcú mbɔ̌ pʉɔ cúnɛ, ŋ́ɡɔ́ ńcú nɛlɔk nɛníꞋ mɛtʉʉ mɔ́p, nɛlɔk ńnyɛt ŋu nɛ́ yúu mi ɑ fɑɑnɛ́nɛ, ńdɔk pɔ mɛtʉʉ-Sɛ́. Kɔɔ ŋu ɡwɑ́k wú!

Ɛ́bɛlʉʉ 13:17

Pʉʉ zúꞋ ntsu-pʉɔ pi pɔ́p tsiinɛnɛ wʉ́ʉ. Pʉʉ ɡɑ́ mbʉʉ sɛ́ mbi pɔ́p, mbíꞋŋɡɔ pɔ́p sɛ́ ńdíŋɛ wʉ́ʉ ŋɡɔŋ ŋkɑ́ tsʉʉ, ḿbɔ́ ńjí ŋɡɔ pɔ́p ɡʉ ńdɑ́Ꞌ ńtʉ́ʉ mbi Sɛ́ ḿbɛ́ɛtɛ ntɛ́ yi pɔ́p kɑ lɔknɛ ɛ́fɑꞋ tsɛtsɛt pʉʉ. Pɔ́Ꞌɔ lɑ́, pʉʉ ɡɛ nǔu ntɛ́ yi pɔ́p ɡʉ ɛ́fɑꞋ fɑꞋ yɔ́p nɛ́ tsɑ́ɑtɛ, tɛ pɔ́p pɔɔ pɔ́ tsẅii tsẅiinɛ pɔ́, mbíꞋŋɡɔ ɛ́ lɑɑ ḿbɔ́ pɔ́Ꞌɔ, pʉʉ pɔɔ lúꞋnɛ.

Ɛ́bɛlʉʉ 13:7

Pʉʉ kẅíitɛ pʉɔ pi pɔ́p kɑ piitɛ ńtsɑ wʉ́ʉ nǔu sɛ̂ndúŋ-Sɛ́, pʉɔ pi pɔ́p kɑ sẅíinɛ wʉ́ʉ nɛ́ nu-Sɛ́, ŋ́kẅíitɛ ntɛ́ yi pɔ́p kɑ lɔknɛ ńnɑ́ŋ tɛ ńdɑ́Ꞌ ḿpfú, pʉʉ pɛ́ɛ fʉꞋ nǔu yɔp ntɛ́ nɛzɑ́p tʉ́m nǔu Sɛ́.

Mɛnu ɛ́ ńdɑ́Ꞌ ńcẅɛt 1:20

Ɛ́ ɡʉ nǔu nɛjí yúu mi pɛcʉ̈ɔ́Ꞌ-sɑŋ sɑɑmbɑ́ pi ɔ jʉ́ɔnɛ ŋ ɡẅɛɛ nǔu pɔ́ yɑ́ɑ yi tʉʉ, mbɑ nǔu mɛkyɛꞋ sɑɑmbɑ́ mi pɛ́ kɑ lɔknɛ tʉ́n-ŋɡɔ̂l ńniitɛ, mbɔ ŋ ɡʉ ɛ́sẅíi wú ŋɡɔ: Pɛcʉ̈ɔ́Ꞌ-sɑŋ sɑɑmbɑ́ lɔk ḿbɔ́ pɛcʉ̈ɔ́Ꞌ-Sɛ́ pi pɔ́p pyɛ́pnɛ mɛcúꞋlɛ-pʉɔ-Kɛlístɔ ɛ̂mɑ́ sɑɑmbɑ́, mɛkyɛꞌ sɑɑmbɑ́ lɔk ḿbɔ́ mɛcúꞋlɛ-pʉɔ-Kɛlístɔ ɛ̂mɑ́ sɑɑmbɑ́.

Mɛnu ɛ́ ńdɑ́Ꞌ ńcẅɛt 2:12

Ŋ ŋwɑꞌnɛ mɛnu mɔnɛ, ńtúu ŋ́ɡɑ́ mbɔ̌ Cʉ̈ɔꞋ-Sɛ́ ẅi ɑ líŋɛ́nɛ cúꞋlɛ-pʉɔ-Kɛlístɔ yi ɛ́ tʉ́sɔŋ-Pɛlŋɡɑmɛ. Ŋwɑꞌnɛ ŋɡɔ: Ŋu ẅi ɑ ɡẅɛɛnɛ níi-ntsɔ yɑ́ yi ɛ́ shẅítnɛ́nɛ, ḿbɛn ḿbɔ́ mɛɡʉ́ŋ mɛmbɑ́ lɑ́, ɑ sɛ́ ńcú ŋɡɔ:

Mɛnu ɛ́ ńdɑ́Ꞌ ńcẅɛt 2:18

Ŋ ŋwɑꞌnɛ mɛnu mɔnɛ, ńtúu ŋ́ɡɑ́ mbɔ̌ Cʉ̈ɔꞋ-Sɛ́ ẅi ɑ líŋɛ́nɛ cúꞋlɛ-pʉɔ-Kɛlístɔ yi ɛ́ tʉ́sɔŋ-Tyɑtîi. Ŋwɑꞌnɛ ŋɡɔ: mɔ́ɔ-Sɛ́ ẅi mík mɛ́ kyɛꞋnɛ zʉꞋ pɑ́Ꞌ lʉ́m-múk lɑ́, mɛku mɛ́ pɔ́ pɑ́Ꞌ tʉ́n Mbɛlɔŋzɛ lɑ́, ɑ sɛ́ ńcú ŋɡɔ:

Mɛnu ɛ́ ńdɑ́Ꞌ ńcẅɛt 2:3

Pʉʉ sɛ́ ɛ́sɑ́Ꞌ tʉʉ. Pʉʉ kɑ jʉ́ɔ ŋɡʉ̈ɔ́Ꞌ ntɛ́ wɑ́ɑ, ŋ́kɛ́ ḿbɔɔ kɑ́ɑ.

Mɛnu ɛ́ ńdɑ́Ꞌ ńcẅɛt 2:8

Ŋ ŋwɑꞌnɛ mɛnu mɔnɛ, ńtúu ŋ́ɡɑ́ mbɔ̌ Cʉ̈ɔꞋ-Sɛ́ ẅi ɑ líŋɛ́nɛ cúꞋlɛ-pʉɔ-Kɛlístɔ yi ɛ́ tʉ́sɔŋ-Smilnɛ. Ŋwɑꞌnɛ ŋɡɔ: Ŋu ẅí ɑ nduŋmbi, ḿbɔ́ ndẅiknzʉʉ, ŋu ẅí ɑ kɑ pfúnɛ ḿbɛn fú lɑ́Ꞌ-pɛpfú, ɑ sɛ́ ńcú ŋɡɔ:

Mɛnu ɛ́ ńdɑ́Ꞌ ńcẅɛt 3:1

Ɔ ŋ́ŋwɑꞌnɛ mɛnu mɔnɛ, ńtúu ŋ́ɡɑ́ mbɔ̌ Cʉ̈ɔꞋ-Sɛ́ ẅi ɑ líŋɛ́nɛ cúꞋlɛ-pʉɔ-Kɛlístɔ yi ɛ́ tʉ́sɔŋ-Sɑldɛs. Ŋwɑꞌnɛ ŋɡɔ: Ŋu ẅí ɑ ɡẅɛɛnɛ Mɛzẅikŋɛ-Sɛ́ sɑɑmbɑ́ mbɑ pɛcʉ̈ɔ́Ꞌ-sɑŋ sɑɑmbɑ́ lɑ́, ɑ sɛ́ ńcú ŋɡɔ: Mɔ sɛ́ ńjí mɛfɑꞋ mʉ́ʉ, ḿbɔ́ ńjí ŋɡɔ pɛ́ ɡɔ ńcú ŋɡɔ pʉʉ sʉ́Ꞌnɛ, mbɔ pʉʉ kɑ pfú mɔ.

Mɛnu ɛ́ ńdɑ́Ꞌ ńcẅɛt 3:14

Ɔ ŋwɑꞌnɛ mɛnu mɔnɛ, ńtúu ŋ́ɡɑ́ mbɔ̌ Cʉ̈ɔꞋ-Sɛ́ ẅi ɑ líŋɛ́nɛ cúꞋlɛ-pʉɔ-Kɛlístɔ yi ɛ́ tʉ́sɔŋ-Lɑɔdisɛ́. Ŋwɑꞌnɛ ŋɡɔ: Ŋu ẅí lík yɛ́ ŋɡɔ ɛ́ pɔ́ꞌɔ, ɑ pɔ́ jʉ́njʉ́ɔ wɛ kɛ́ kúpmɛ sẅiŋɛ, ẅi ɑ cúnɛ nu yí ɛ́ nɛ́nẅín, ẅi jʉ́ nzɛnɛ nǔu kʉ̈ɔ́ lɑ́ yi Sɛ́ kɑ niitɛ́nɛ, ɑ sɛ́ ńcú ŋɡɔ:

Mɛnu ɛ́ ńdɑ́Ꞌ ńcẅɛt 3:7

Ɔ ŋ́ŋwɑꞌnɛ mɛnu mɔnɛ, ńtúu ŋ́ɡɑ́ mbɔ̌ Cʉ̈ɔꞋ-Sɛ́ ẅi ɑ líŋɛ́nɛ cúꞋlɛ-pʉɔ-Kɛlístɔ yi ɛ́ tʉ́sɔŋ-Filɑdɛlfîi. Ŋ́ŋwɑꞌnɛ ŋɡɔ: Ŋu ẅí ɑ Ndɛ́ɛnɛ Lɛ́ɛnɛ́nɛ, ḿbɔ́ nɛ́nẅín, jʉ́ ẅi ɑ ɡẅɛɛnɛ tsɔ́Ꞌ-Fɔɔ Ndɑvît, jʉ́ ẅi ɑ tsɔ́Ꞌnɛ ntsundɑ́ ŋu pɔɔ kuꞋ nɛjɔ́Ꞌ pɔ́, ńjʉ́ɔꞋ ŋu pɔɔ kuꞋ nɛtsɔ́Ꞌ pɔ́, ɑ sɛ́ ńcú ŋɡɔ: