دَرگوَز 7:19 - هُدائے پاکێن کتاب، بلۆچی زبانا

¹⁹ هُداوندا گۆن موسّایا گوَشت: ”هارونا بگوَش: ’وتی اَسایا دستا کن و دستا مِسرئے آپانی سرا شهار دئے، آیانی کئورانی سرا، آیانی جۆانی سرا، آیانی تَلاوَگانی سرا و آیانی سجّهێن آپجلّانی سرا. اِشانی تهئے سجّهێن آپ هۆن جۆڑَ بنت. سجّهێن مِسرئے مُلک هۆنا پُرَّ بیت، آپدان هم چه هۆنا پُرَّ بنت.‘“

دَرگوَز 7:19 Кръстосани препратки

پێدایش 1:10

هُدایا هُشکیئے نام ”زمین“ کرت و یکجاه بوتگێن آپانی نام ”دریا“. هُدایا دیست که اے کار شَرّ بوت.

دَرگوَز 10:12

هُداوندا گۆن موسّایا گوَشت: ”وتی دستا مِسرئے مُلکئے سرا شهار دئے که مَدَگ مِسرئے سرا اُرش بکننت و مُلکئے سجّهێن درچک و داران بوَرنت، هرچے که چه ترۆنگلا رَکِّتگ.“

دَرگوَز 10:21

هُداوندا گۆن موسّایا گوَشت: ”وتی دستا آسمانئے نێمگا شهار دئے که مِسرئے مُلکا تهاریے مان بشانیت، اَنچێن بَزێن تهاریے که چمّ په چمّا گِندگ مبیت.“

دَرگوَز 14:16

تئو وتی اَسایا چست کن و دستا دریائے سرا شهار دئے و دریایا دو بهر کن که اِسراییلی چه دریائے تَها، هُشکیئے سرا بگوَزنت.

دَرگوَز 14:21

موسّایا وتی دست دریائے سرا شهار دات و چه هُداوندئے زۆرا سجّهێن شپا چه رۆدراتکا ترُندێن گواتێا کَشِّت و دریا پُشتا کِنزێنت. آپ دو بهر بوت و هُشکی زاهر بوت.

دَرگوَز 14:26

هُداوندا گۆن موسّایا گوَشت: ”وتی دستا دریائے سرا شهار دئے که آپ مِسری و آیانی اَرّابه و اَرّابه‌سوارانی سرا پِر بِلێٹیت.“

دَرگوَز 4:9

بله اگن اے دوێن نشانی‌اِش باوَر نکرتنت و تئیی گَپِّش گۆش نداشت، گڑا چه نیلّا کمّے آپ بزور و هُشکێن زمینئے سرا برێچ. اے آپان که تئو چه نیلّا زورئے، اے آپ هُشکێن زمینئے سرا هۆنَ بنت.“

دَرگوَز 8:16

هُداوندا گۆن موسّایا گوَشت: ”هارونا بگوَش: ’وتی اَسایا شهار دئے و زمینئے هاکان بجن که سجّهێن مِسرا پَشّگ مان برچیت.‘“

دَرگوَز 9:33

موسّا چه پِرئونئے کرّا شت و چه شهرا که در آتک، دستی هُداوندئے نێمگا چِست کرتنت. گْرند و ترۆنگل اۆشتاتنت و هئورا گوارگ بَسّ کرت.