Isaías 7:9 - Las Escrituras en Ashéninka Ucayali del Sur

⁹ Rootaki Samaria otzinkamintsitari inampi Efraín-iite. Riima itomi Remalías riitaki iwinkatharitetari Samaria-jatzi. Eerorika pikyaaryooteeyini, aritaki ithonkaetakimi eejatzi eerokaete.”

Isaías 7:9 Кръстосани препратки

Isaías 7:10

Iroka otsipa ikantakiriri Tajorentsi irika Acaz:

Isaías 7:4

Pikanteri pitomi: ‘Paamahaeya, tekatsi pithaawanteeya, Tontashireri pikantya, eero pithaawantari apite oshiyakawori okachaatzi paamari, Irikaete Resín, Siria-jatzi, eejatzi itomi Remalías, katsimaki ikantaka ayimatziri mashirenkari.

Rantayi-takiri 27:11

Roo kanteencha tee ikemijantzi reewarite owayiri-paeni, apatziro ikemijantakiri ashitawori amaatako-mentotsi eejatzi antakotzirori.

Rantayi-takiri 27:25

Ari ikantakinari. Pithaamentee-yaani, tema nawentaa-shiretari naaka Tajorentsi, niyotzi aritaki omatakyaa okaatzi ikamanta-kinari Ronampiri Tajorentsi.

Roma-jatzi 11:20

Ari okantawitari, roo kanteencha pikenkishireero kimiwitaka nosheninka-paeni Judá-paeni icheka-tewae-teeri okantakaawo tee ikemijantzi. Rooma eeroka-paeni kaari nosheninkata, eeroka poyaatariri okantakaan-tziro pawentaa-shiretaa. Tee okameethatzi pajahaa-wenta-waetyaa, pipinkathateri Tajorentsi.

Heber-paeni 11:6

Tema kaari tzimatsini rawentaa-shirenka, teera inimotziri Tajorentsi. Aririka ikowaete riyoperoe-teeri Tajorentsi, otzimatyee ikemijantee, ikante: “Omaperotatyaa itzimi Tajorentsi.” Ikante eejatzi: “Ari imatakaa-yiteeri Tajorentsi kowaperota-tsini riyoteeri.”

1 Juan 5:10

Itzimi-rika kemijanteeriri Itomi Tajorentsi, riitaki kemathateerori omaperotatyaa okaatzi ikantakiri Tajorentsi. Riima kaari kemijanta-tsini, itheeya-nitakaakari Tajorentsi, tema itheenkakiro iñaani ikantakiranki “Notyomi irika Jesús.”