ЭКЛЕЗІЯСТА 10 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Мёртвыя мухі псуюць і нішчаць алеек у слоіку. Малая безразважнасць больш важыць за мудрасць і славу.

² Сэрца мудрага [звяртаецца] у правы бок, а сэрца неразумнага — у левы.

³ Нават ідучы дарогаю, дурань, паколькі ён безразважны, кожнаму паказвае, што ен дурны.

⁴ Калі гнеў таго, хто мае ўладу, узгарыцца супраць цябе, не пакідай свайго месца, бо захаванне супакою спыніць найгоршыя грахі.

⁵ Ёсць ліха, якое ўбачыў я пад сонцам, гэта быццам бы аблуда, што паходзіць ад начальніка:

⁶ пастаўлены на высокае становішча неразумны, а багатыя сядзяць нізка.

⁷ Убачыў слугаў на конях, а князёў, якія ішлі пешшу, быццам слугі.

⁸ Хто капае дол, той упадзе ў яго, а таго, хто руйнуе мур, укусіць гадзюка.

⁹ Хто разбівае камяні, будзе скалечаны імі, а хто сячэ дровы, выставіць сябе праз іх на небяспеку.

¹⁰ Калі ступіцца сякера і ляза яе не навострыш, больш становіцца працы, але плёнам стараннасці будзе мудрасць.

¹¹ Калі ўкусіць змяя, а замову занядбаюць, то шаптун не будзе мець аніякага плёну.

¹² Словы ў вуснах мудрага — ласка, але вусны безразважнага пагубяць яго самога.

¹³ Пачатак слоў яго — глупства, а канец яго размовы — вялікая бязглуздзіца.

¹⁴ Неразумны шмат гаворыць: «Не ведае чалавек, што будзе потым, і, што па ім станецца, хто можа яму паказаць?»

¹⁵ Праца неразумных будзе абцяжарваць тых, хто не ведае, як ісці ў горад.

¹⁶ Бяда табе, зямля, калі твой цар — юнак і калі твае князі рана частаванне ядуць.

¹⁷ Шчасная зямля, у якой цар дастойны, ды ў якой князі банкет ядуць у свой час для сілкавання, а не для раскошы.

¹⁸ Праз лянівыя рукі правісне столь, і праз апушчаныя — працячэ дом.

¹⁹ Баль ладзяць дзеля забавы, а віно развесяляе жыццё, і грошы даюць усё.

²⁰ У думцы сваёй не зневажай цара, і ў сховах спальні сваёй не праклінай багатага, бо нават птушкі нябесныя занясуць голас твой і хто мае крылы — абвесціць сказанае.