ПСАЛТЫР 98 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Псальм. Спявайце Госпаду новую песню, бо ўчыніў Ён цуды. Паратунак у правіцы Яго і ў руцэ святой Яго.

² Госпад абвясціў Сваё збаўленне, на віду паганаў аб’явіў Ён Сваю справядлівасць.

³ Успомніў Ён пра міласэрнасць Сваю і пра праўду Сваю для дома Ізраэля. Убачаць усе канцы свету збаўленне Бога нашага.

⁴ Услаўляй гучна Бога, уся зямля, выбягайце, радуйцеся і грайце псальмы.

⁵ Грайце Госпаду на цытры, на цытры і з гукамі псальма.

⁶ На срэбных трубах і пад гукі рога спявайце гучна славу перад абліччам Госпада Валадара.

⁷ Хай шуміць мора і ўсё, што яго запаўняе, увесь сусвет і тыя, што ў ім пражываюць.

⁸ Хай рэкі плешчуць у далоні і разам радуюцца горы

⁹ перад Госпадам, бо прыходзіць Ён судзіць зямлю. Ён будзе судзіць сусвет па справядлівасці і народы — па праўдзе.