ПСАЛТЫР 92 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Псальм. Песня. На дзень шабату.

² Як жа добра вызнаваць Госпада і спяваць псальмы імю Твайму, Найвышэйшы!

³ Раніцай абвяшчаць Тваю міласэрнасць, і праўду Тваю — уначы.

⁴ На дзесяціструнным, і на гуслях, са спевам пад цытру.

⁵ Бо пацешыў Ты мяне, Госпадзе, Сваім стварэннем, і я буду радавацца справам рук Тваіх.

⁶ Якія ж велічныя справы Твае, Госпадзе: надзвычай глыбокімі сталіся задумы Твае!

⁷ Неразумны чалавек не спазнае і бязглузды не зразумее гэтага.

⁸ Няхай грэшныя разрастуцца, як трава, і будуць квітнець усе тыя, што чыняць несправядлівасць, аднак гэта будзе [ім] на згубу на векі вечныя;

⁹ а Ты, Госпадзе, вечна Найвышэйшы.

¹⁰ Бо вось, непрыяцелі Твае, Госпадзе, бо вось, непрыяцелі Твае загінуць і расцярушацца ўсе, што чыняць несправядлівасць.

¹¹ Ты ўзвысіш рог мой, як у адзінарога, атрымаў я багатае намашчэнне алейкам.

¹² Вока маё з пагардаю глядзела на непрыяцеляў маіх, ды пра загубу ліхотнікаў, што паўстаюць на мяне, пра ліхадзеяў радасна слухала вуха маё.

¹³ Справядлівы будзе квітнець, як пальма; быццам кедр лібанскі, узрасце.

¹⁴ Пасаджаныя ў Госпадавым доме, у дзядзінцы Бога нашага заквітнеюць.

¹⁵ Будуць прыносіць плады ў старасці, сакавітыя будуць і поўныя свежасці,

¹⁶ Каб вясціць, што Госпад справядлівы, прыстанішча маё, і няма несправядлівасці ў Ім.