ПСАЛТЫР 88 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Песня. Псальм сыноў Корэ. Кіраўніку хору. Паводле «Магалат». Для спеваў. Маскіль. Гемана Эзрахіта.

² Госпадзе, Божа збаўлення майго, на працягу дня клічу, уночы малюся Табе.

³ Няхай дойдзе да Цябе малітва мая; нахілі вуха Тваё да просьбы маёй.

⁴ Бо напоўнілася ліхам душа мая, і жыццё маё наблізілася да апраметнай.

⁵ Прыпадобнены я да тых, што сыходзяць у яму, стаўся я, як чалавек без успамогі.

⁶ Паміж мёртвымі кінутыя, — быццам забітыя, што спачываюць у магілах; пра іх Ты больш не ўспамінаеш, і яны адсечаны ад рукі Тваёй.

⁷ Ты паклаў мяне ў яме глыбейшай, у цемры і ў цені смерці

⁸ абцяжарыў мяне гнеў Твой, і ўсе навалы Твае ўзводзіш Ты на мяне.

⁹ Аддаліў Ты знаёмых маіх ад мяне, закрыты я і не выйду;

¹⁰ патухлі мае вочы ад тугі. Клікаў я Цябе, Божа, цэлы дзень, выцягваў да Цябе мае рукі.

¹¹ Ці для мёртвых учыніш цуды? Ці ж паўстануць прывіды і ці ж будуць вызнаваць Цябе?

¹² Ці ў магіле будзе хто распавядаць пра міласэрнасць і пра праўду Тваю — у месцы пагібелі?

¹³ Ці ж будуць пазнаныя ў цемры цуды Твае, а справядлівасць Твая — у зямлі забыцця?

¹⁴ А я клікаў Цябе, Госпадзе, і раніцай малітва мая апярэдзіць Цябе.

¹⁵ Чаму, Госпадзе, адпіхваеш душу маю і хаваеш аблічча Сваё ад мяне?

¹⁶ Бедны я, набліжаюся да смерці ад юнацтва майго, перанёс я жахі Твае і стурбаваўся.

¹⁷ Нада мною пранесліся гневы Твае, і страхі Твае забілі мяне.

¹⁸ Пачалі кружыць яны каля мяне цэлы дзень, як вада, агарнулі мяне разам.

¹⁹ Аддаліў Ты ад мяне прыяцеля і блізкага, і знаёмыя мае — у цемры.