ПСАЛТЫР 84 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Кіраўніку хору. Паводле «Выціскальняў». Сыноў Корэ. Псальм.

² Якія ж мілыя паселішчы Твае, Госпадзе магуццяў!

³ Тужыць і рвецца душа мая ў палац Госпада, сэрца маё і цела маё ўзрадаваліся Богу жывому.

⁴ Нават верабей знаходзіць сабе дом і ластаўка гняздо сабе, каб уладкаваць птушанят сваіх: ахвярнікі Твае, Госпадзе магуццяў, Валадару мой і Божа мой!

⁵ Шчасныя тыя, што жывуць у доме Тваім: век будуць яны славіць Цябе.

⁶ Шчасны той чалавек, у якога ёсць успамога ад Цябе; размясціў ён у душы нябесныя шляхі:

⁷ Праходзячы сухой лагчынаю, яны робяць яе крыніцаю, бо ранні дождж дабраславеннем зросіць яе.

⁸ Пойдуць яны з сілы ў сілу, убачыцца [імі] Бог багоў на Сіёне.

⁹ Госпадзе, Божа магуццяў, выслухай малітву маю; прыхіні вуха, Божа Якубаў.

¹⁰ Глянь, Божа, наш абаронца, ды глянь на аблічча намашчэнца Твайго!

¹¹ Бо мілейшы адзін дзень у палатцы Тваёй за тысячу! Хачу лепш стаяць на парозе дома Бога майго, чым жыць у палатках грэшнікаў.

¹² Бо Госпад Бог ёсць сонца і шчыт; ласку і славу дасць Госпад; Ён не забярэ дабра ў тых, што жывуць у бязвіннасці.

¹³ Госпадзе магуццяў, шчасны той чалавек, які ўскладае надзею на Цябе!