ПСАЛТЫР 83 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Песня. Псальм. Асафа.

² Божа, не суцішвайся, не маўчы, не супакойвайся, Божа.

³ Бо вось, загаманілі Твае непрыяцелі, і тыя, што ненавідзяць Цябе, паднялі галовы.

⁴ Учыняюць яны ліхую нараду супраць Твайго народа, радзяцца супраць тых, каго Ты ўхаваў.

⁵ Кажуць: «Ідземце і вынішчым іх з-паміж народаў і хай не ўпамінаецца больш імя Ізраэля».

⁶ Бо надумляюць яны адзінадушна, супраць Цябе ўсталёўваюць пагадненне;

⁷ у паселішчы ідумеяў і ізмаэльцаў, маабіцян і агарэяў,

⁸ Гэбал і Амон ды Амалек, край Філістэя, з жыхарамі Тыра.

⁹ Таксама і асірыйцы здружыліся з імі і сталі паплечнікамі Лотавых сыноў.

¹⁰ Зрабі і гэтым, як зрабіў Мадыяну ці Сісару або Явіну над ручаём Кісон.

¹¹ Яны загінулі каля Эн-Дора і сталіся гноем для зямлі.

¹² З князямі іх учыні падобна, як з Арэбам і Зэбам, як з Зэбахам і Салманам і з усімі іх князямі,

¹³ якія сказалі: «Успадкаемім сабе пашу Божую».

¹⁴ Божа мой, зрабі іх падобнымі да кола і быццам саломінку на ветры.

¹⁵ Як агонь, што паліць лес, і як полымя, што абсмальвае горы,

¹⁶ так пераследуй іх грымотамі Сваімі і бураю Сваёй стурбуй іх.

¹⁷ Напоўні твары іх сорамам, і няхай прызываюць імя Тваё, Госпадзе.

¹⁸ Хай пачырванеюць і збянтэжацца на векі вечныя, і пасаромеюцца, і загінуць,

¹⁹ і хай спазнаюць, што імя Табе — Госпад: Ты адзін — Найвышэйшы над усёй зямлёй.