ПСАЛТЫР 81 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Кіраўніку хору. Паводле «Выціскальняў». Асафа.

² Радуйцеся Богу, Успаможцу нашаму, гучна ўслаўляйце Бога Якубава.

³ Вазьміце псалтыр і дайце бубен, мілагучныя гуслі з цытрай.

⁴ Трубіце ў трубы на маладзік, у поўню, у дзень свята нашага.

⁵ Бо ёсць пастанова ў Ізраэлі, прыказанне ў Бога Якубава.

⁶ Ён пастанавіў гэта, як сведчанне для Язэпа, калі ён выходзіў з зямлі Егіпецкай; мову, якой не ведаў, пачуў ён:

⁷ Я вызваліў ад цяжару спіну яго, рукі яго пазбыліся каша.

⁸ Прызываў ты Мяне ў бядзе, і Я выратаваў цябе, пачуў цябе ў сховах навальніцы, выпрабаваў цябе пры вадзе Мэрыбы.

⁹ Слухай, Мой народзе, буду клікаць цябе ў сведкі: «Ізраэль, каб толькі ты паслухаў Мяне!»

¹⁰ Не будзе ў цябе бога чужога, і не будзеш ты пакланяцца богу іншаземнаму:

¹¹ Але Я — Госпад, Бог твой, Які вывеў цябе з зямлі Егіпецкай! Адкрый вусны свае, і Я напоўню іх.

¹² Але не паслухаў Мой народ голасу Майго, і Ізраэль не звярнуўся да Мяне.

¹³ Таму пакінуў Я іх паводле закамянеласці сэрца іх, будуць хадзіць яны ў сваіх намерах.

¹⁴ О, каб народ Мой Мяне паслухаў, каб Ізраэль хадзіў па Маіх дарогах!

¹⁵ Неўзабаве Я ўпакорыў бы непрыяцеляў яго і накіраваў бы руку Маю супраць прыгнятальнікаў яго.

¹⁶ Непрыяцелі Госпадавы ліслівілі б перад ім, і доля іх была б навечна.

¹⁷ І карміў бы Я іх адборнай пшаніцай і насычаў бы іх мёдам са скалы.