ПСАЛТЫР 8 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Кіраўніку хору. На мелодыю песні “Выціскальні…” Псальм Давідаў.

² Госпадзе, Госпад наш, якое ж дзівоснае імя Тваё па ўсёй зямлі, бо слава Твая ўзнялася вышэй нябёсаў.

³ Праз вусны дзяцей і немаўлят учыніў Ты хвалу дзеля ворагаў Тваіх, каб утаймаваць ворага і мсціўцу.

⁴ Калі бачу нябёсы Твае, твор пальцаў Тваіх, месяц і зоркі, якія Ты заснаваў, —

⁵ то што ж ёсць чалавек, што Ты памятаеш пра яго, або сын чалавечы, што Ты адведваеш яго?

⁶ Мала панізіў Ты яго за анёлаў, славаю і пашанаю ўвянчаў яго,

⁷ і паставіў яго над стварэннямі рук Тваіх, і ўсё Ты кінуў пад ногі яго, —

⁸ авечак і быкоў усіх, і ў дадатак звяроў палявых,

⁹ птушак нябесных ды рыб марскіх, і ўсё, што ходзіць па шляхах марскіх.

¹⁰ Госпадзе, Госпад наш, якое ж дзівоснае імя Тваё па ўсёй зямлі!