ПСАЛТЫР 76 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Кіраўніку хору. На струнах. Псальм. Асафа. Песня.

² Вядомы ў Юдэі Бог, у Ізраэлі вялікае імя Яго.

³ І ёсць у Салеме хорам Яго, і паселішча Яго ў Сіёне.

⁴ Там знішчыў Ён прывабнасць лука, шчыт, меч і вайну.

⁵ Ты Дзівосны, што нясеш святло ад гор крадзяжу.

⁶ Абрабаваныя магутныя сэрцам, паснулі яны сваім сном, і не знайшлі ўсе моцныя мужы рук сваіх.

⁷ Ад папрокаў Тваіх, Божа Якуба, пазаміралі вознік і конь.

⁸ Ты — пагрозлівы, і хто супрацівіцца Табе? З таго часу і гнеў Твой.

⁹ З неба дазволіў Ты пачуць прысуд; зямля здрыганулася і суцішылася,

¹⁰ калі ўзняўся Бог на суд, каб збавіць усіх пакорлівых на зямлі.

¹¹ Бо гнеў чалавека будзе вызнаваць Цябе, і рэшткі гневу ўчыняць для Цябе дзень святочны.

¹² Прыносьце прысягі і выконвайце [іх] перад Госпадам Богам вашым; усе навокал Яго хай прыносяць дарункі Найвялебнаму.

¹³ Таму, Які адымае дух князёў, Найвялебнаму сярод цароў зямных.