ПСАЛТЫР 75 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Кіраўніку хору. Паводле «Не знішчай» Псальм. Асафа. Песня.

² Будзем вызнаваць Цябе, Божа; будзем вызнаваць і прызываць імя Тваё: будзем распавядаць пра цуды Твае.

³ Калі ўстанаўлю час, буду судзіць Я па справядлівасці.

⁴ Калі расцяклася зямля і ўсе, што жылі на ёй, Я ўмацаваў апоры яе.

⁵ Я сказаў тым, што выхваляюцца: «Не выхваляйцеся!» і тым, што ўчыняюць злачынствы: «Не ўздымайце рог!

⁶ Не ўздымайце дагары рог ваш; не прамаўляйце нахабстваў супраць Бога».

⁷ Бо пыха — ані з усходу, ані з захаду, ані з пустыні.

⁸ Бо Бог — суддзя: аднаго прынізіць, а другога ўзвялічыць.

⁹ Бо ў руцэ Госпада — келіх чыстага віна, поўны сумесі. І Ён пераліў з аднаго ў другое; і ўсё ж будуць выпіваць аж да асадку, будуць піць усе грэшнікі зямлі.

¹⁰ А я буду абвяшчаць у вяках, буду спяваць Богу Якубаву.

¹¹ І патрушчу я ўсе рогі грэшнікаў; і ўзвысяцца рогі справядлівага.