ПСАЛТЫР 74 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Маскіль. Асафа. Чаму, Божа, Ты адпіхнуў нас да скону, няўжо ўзгарэўся гнеў Твой на авечак пашы Тваёй?

² Успомні пра сход Твой, якім Ты завалодаў ад пачатку. Ты адкупіў жазло спадчыны Тваёй, гару Сіён, на якой Ты пасяліўся.

³ Узнясі крокі Твае да вечных руін: усё знішчыў непрыяцель у святыні.

⁴ Равуць тыя, што ненавідзяць Цябе, пасярод сходу Твайго; усклалі яны знакі свае як знакі [перамогі].

⁵ Яны прыпадобнілі сябе да тых, што высока ўзносяць сякеру ў лясным гушчары.

⁶ Разбілі яны дзверы яе ўшчэнт; зруйнавалі бердышамі і сякерамі.

⁷ Падпалілі яны агнём свяцілішча Тваё, ганебна скінулі на зямлю хорам імя Твайго;

⁸ прамовілі яны ў сэрцы сваім: «Знішчым іх усіх разам». Спалілі яны ўсе святыні Божыя на зямлі.

⁹ Знакаў нашых мы не бачым, ужо няма прарока, і няма ў нас таго, які б ведаў, як доўга гэта будзе.

¹⁰ Дакуль жа, Божа, будзе здзекавацца непрыяцель? Ці ж вечна будзе знеслаўляць праціўнік імя Тваё?

¹¹ Чаму ж Ты адводзіш руку Тваю і трымаеш правіцу Тваю за пазухай Тваёй?

¹² Але ж Бог — наш цар спрадвеку, учыніў Ён збаўленні пасярод зямлі.

¹³ Ты рассек мора магуццем Тваім, сцёр галовы драконаў у водах.

¹⁴ Ты растаптаў галовы Левіятана, аддаў яго на ежу марскім страшыдлам.

¹⁵ Ты прабіў крыніцы і ручаі; Ты высушыў велічныя рэкі.

¹⁶ Твой дзень і Твая ноч; Ты змайстраваў свяцілы і сонца.

¹⁷ Ты ўсталяваў усе межы зямлі, лета і зіму — Ты стварыў гэта.

¹⁸ Помні пра гэта: непрыяцель зняважыў Госпада, і народ неразумны зняславіў імя Тваё.

¹⁹ Не аддавай звярам душы тых, што вызнаюць Цябе, і не забудзь навечна пра душы бедных Тваіх.

²⁰ Зірні на запавет, бо сховы зямныя поўныя прыбежышчаў гвалту.

²¹ Хай пакорлівы не вяртаецца пасаромленым; бедны і ўбогі хай хваляць імя Тваё.

²² Уздыміся, Божа, будзь суддзёю ў справе Тваёй; памятай пра ганьбаванні Твае, якія цэлы дзень спараджае неразумны.

²³ Не забывайся на галасы непрыяцеляў Тваіх; заўсёды ўздымаецца гоман праціўнікаў Тваіх.