ПСАЛТЫР 73 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Псальм Асафа. Які ж добры Бог для прастадушных! Ён Госпад тым, хто чысты сэрцам.

² А мае ногі ледзь не спаткнуліся, ледзь не абарваліся крокі мае,

³ бо пазайздросціў я бязбожным, гледзячы на спакойнае жыццё грэшнікаў.

⁴ Бо няма для іх ніякіх перашкод, здаровае і сытае чэрава іх.

⁵ На працы чалавечай няма іх і не церпяць яны бічаванняў разам з людзьмі.

⁶ Таму пыха ў іх — як каралі, і імкненне да гвалту, як адзенне, пакрыла іх.

⁷ Выступае, быццам з тлустай глебы, несправядлівасць іх, вырываюцца вонкі задумы сэрца.

⁸ Здзекуюцца яны і прамаўляюць благое, з высокай пасады несправядліва прамаўляюць.

⁹ Размясцілі яны на небе вусны свае, а язык іх прайшоў па зямлі.

¹⁰ Таму і сядзяць яны на вышыні, і поўныя воды не дойдуць да іх.

¹¹ І сказалі яны: «Адкуль ведае Бог, і ці ёсць веданне ва Узвышняга?

¹² Вось, тыя самыя грэшнікі і тыя, што жывуць багата ў свеце, атрымалі яшчэ большае багацце».

¹³ І сказаў я: «Значыць не дарэмна ачысціў я сэрца сваё і ў беззаганнасці вымыў рукі мае;

¹⁴ і цярпеў я бічаванні цэлы дзень, і пакаранне маё — раніцаю».

¹⁵ Калі б сказаў я: «Я буду гаварыць, як тыя», то здрадзіў бы роду Тваіх сыноў.

¹⁶ І я разважаў, як жа зразумець гэта; напружанне было ў вачах маіх,

¹⁷ пакуль не паглыбіўся ў святую справу Божую і не асэнсаваў іхняга канца.

¹⁸ Памясціў Ты іх сапраўды на коўзкай дарозе, скінуў іх у бездань.

¹⁹ Якімі ж спустошанымі засталіся яны! Нечакана збяднелі яны, загінулі ад жаху.

²⁰ Быццам сну пасля абуджэння, Ты адцураешся іх, узняўшыся.

²¹ Паколькі раздражнялася сэрца маё і нутро маё кіпела,

²² і я быў неразумны і нічога не ведаў: як жывёла, быў я перад Табою.

²³ Але я заўсёды з Табою, Ты трымаеш правую маю руку.

²⁴ Вядзеш мяне сваёю парадаю і ў канцы прымеш мяне ў хвалу.

²⁵ Каго, апроч Цябе, маю я ў небе? І калі я з Табою, зямля мяне не захапляе.

²⁶ Знемаглося цела маё і сэрца маё. Скалой-апорай сэрца майго і доляй маёй вечнай — Бог.

²⁷ Бо вось, тыя, што адступаюць ад Цябе, пагінуць. Выгубіш усіх, што адкінуліся ад Цябе на распусту.

²⁸ Мне ж добра быць блізка да Бога, мець у Госпадзе Богу прытулак сабе. Абвяшчу пра ўсе справы Твае ў брамах Сіёна.