ПСАЛТЫР 71 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ У Табе, Госпадзе, маю надзею: не пасаромлюся навек.

² У Сваёй справядлівасці вызваляй мяне і ратуй мяне, нахілі да мяне сваё вуха і збаў мяне.

³ Будзь для мяне скалой абароны і ўмацаваным домам, каб збавіў Ты мяне, бо Ты цвярдыня мая і прыстанішча маё.

⁴ Божа мой, вырві мяне з рукі грэшніка і з рукі беззаконнага і несправядлівага.

⁵ Бо Ты — чаканне маё, Госпадзе; Госпадзе, надзея мая ад юнацтва майго.

⁶ На Табе я ўгрунтаваўся ад нараджэння, з улоння маці маёй Ты апякун мой, для Цябе хвала мая заўсёды.

⁷ Мо дзіўным паказаўся я для многіх, а Ты — магутны Успаможца.

⁸ Хай напоўняцца вусны мае хвалою Тваёй, цэлы дзень — веліччу Тваёй.

⁹ Не адпіхай мяне ў часіну старасці; калі саслабее магуцце маё, не пакідай мяне.

¹⁰ Бо намаўлялі непрыяцелі мае на мяне і тыя, што падпільноўвалі душу маю, учынілі змову,

¹¹ кажучы: «Бог пакінуў яго! Даганіце і схапіце яго, бо няма Таго, Хто ўратуе».

¹² Божа, не аддаляйся ад мяне, Божа мой, паспяшы мне на дапамогу.

¹³ Хай пасаромяцца і знікнуць тыя, што варожа ставяцца да душы маёй; хай пакрыюцца сорамам і ганьбаю тыя, што шукаюць для мяне ліха.

¹⁴ А я вось буду заўсёды спадзявацца і памнажаць буду кожную хвалу Тваю.

¹⁵ Вусны мае абвясцяць справядлівасць Тваю, цэлы дзень — збаўленне Тваё, бо не ведаю ёй межаў.

¹⁶ Прыйду я да сіл Госпада; буду ўспамінаць я толькі пра Тваю справядлівасць.

¹⁷ Божа, Ты вучыў мяне ад юнацтва майго, а я аж дасюль абвяшчаю цуды Твае.

¹⁸ І да самай старасці і нямогласці, Божа, не пакідай мяне, аж пакуль абвяшчаць буду пра магутную руку Тваю кожнаму пакаленню, якое прыйдзе ў будучым. Сіла Твая

¹⁹ і справядлівасць Твая, Божа, аж да вышыняў, учыніў Ты вялікія справы: Божа, хто ж падобны да Цябе?

²⁰ Ты паказаў мне шматлікія і ліхія беды; ды зноў ажывіў Ты мяне і з бездані зямной ізноў вывеў.

²¹ Ты памнож велічнасць маю і, вярнуўшыся, суцеш мяне.

²² Я таксама буду вызнаваць Цябе, у псалтыры — праўду Тваю, Божа мой, спяваць псальмы Табе буду на гуслях, о Святы Ізраэльскі.

²³ Радавацца будуць мае вусны, калі буду спяваць Табе, і мая душа, якую Ты адкупіў;

²⁴ але і язык мой цэлы дзень разважаць будзе пра справядлівасць Тваю, бо пасаромяцца і баяцца будуць тыя, што шукаюць ліха на мяне.