ПСАЛТЫР 7 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Жальба Давіда, якую выспеваў перад Богам дзеля Куша Бэньямінава.

² Госпадзе, Божа мой, на Цябе спадзяюся; уратуй мяне ад усіх тых, што чыняць мне пераследы, і вызвалі мяне,

³ каб не схапіў хто, як леў, душы маёй, разрываючы яе, пакуль няма Таго, Хто ўратаваў бы.

⁴ Госпадзе Божа мой, калі ўчыніў я нешта, калі ёсць няпраўда ў руках маіх,

⁵ калі вярнуў я [благое] тым, што мне аддавалі назад благое, калі ўшанаваў непрыяцеля свайго марнага, дараваўшы яму,

⁶ няхай вораг чыніць пераслед душы маёй, і схопіць, і растопча па зямлі жыццё маё і славу маю перакіне ў попел.

⁷ Паўстань, Госпадзе, у гневе Тваім і ўзнясіся супраць лютасці непрыяцеляў маіх, і паўстань, Божа мой, на судзе, які Ты запавядаў.

⁸ І хай сход народаў акружыць Цябе, і над ёю вярніся ізноў на вышыню:

⁹ Госпад судзіць народы. Судзі мяне, Госпадзе, паводле справядлівасці маёй і паводле незласлівасці маёй, якая ёсць ўва мне.

¹⁰ Хай спыніцца зласлівасць грэшнікаў, а справядлівага ўмацуй, справядлівы Божа, што пранікаеш у сэрцы і ўлонні.

¹¹ Успамога мая — у Бога, Які ратуе шчырых сэрцам.

¹² Бог — Суддзя справядлівы і магутны, гневаецца штодня,

¹³ Ці не агаліў Ён ізноў меч Свой, ці не нацягнуў лук Свой і не падрыхтаваў яго?

¹⁴ І падрыхтаваў Ён Сабе смяротную зброю, стрэлы Свае зрабіў агнявымі.

¹⁵ Вось [чалавек]: затаіў у сабе несправядлівасць — даў пачатак жалю — спарадзіў няпраўду;

¹⁶ пачаў капаць катлаван і выкапаў яго, і ўваліўся ў яму, якую зрабіў.

¹⁷ Абернецца жаль яго на галаву яго, а зласлівасць яго спадзе на патыліцу яго.

¹⁸ Спавядаюся Госпаду паводле справядлівасці Яго і буду спяваць псальмы імю Госпада Найвышэйшага.