ПСАЛТЫР 68 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Кіраўніку хору. Давідаў. Псальм. Песня.

² Паўстае Бог, і рассейваюцца непрыяцелі Яго; і ўцякаюць ад аблічча Яго тыя, што ненавідзяць Яго.

³ Як рассейваецца дым, Ты рассееш іх; як плавіцца воск ад агню, так згінуць грэшнікі ад Бога.

⁴ Справядлівыя ж будуць весяліцца і радавацца перад Богам і адчуюць асалоду ў весялосці.

⁵ Спявайце Богу, спявайце псальм імю Яго; учыніце дарогу Таму, Які ўзносіцца над аблокамі: імя Яму — Госпад. Усклікайце радасна перад Ім;

⁶ бацька сірот і суддзя ўдоў, Бог у доме Сваім святым.

⁷ Бог, Які селіць пакінутых у доме, Які выводзіць вязняў да дабрабыту; між тым бунтаўнікі будуць жыць на няплоднай зямлі.

⁸ Божа, калі ішоў Ты перад народам Тваім, калі праходзіў Ты па пустыні,

⁹ зямля здрыганулася, нават нябёсы струмяніліся перад Богам Сіная, перад Богам Ізраэля.

¹⁰ Выпусціў Ты, Божа, дождж самаўладна; спадчына Твая саслабела — Ты ж аднавіў яе.

¹¹ Жывыя стварэнні Твае жылі там, падрыхтаваў Ты [усё] для беднага ў дабраце Сваёй.

¹² Госпад дае слова і абвяшчаюць добрае, вялікае мноства:

¹³ «Цары войскаў уцякаюць, уцякаюць, а краса дому дзеліць здабычу.

¹⁴ А вы спіце ў агароджах сваіх: крылы галубіцы ззяюць срэбрам, а пер’е іх — яснасцю золата.

¹⁵ Калі разганяе па ёй цароў Усемагутны, снегам бялеецца Сэлмон».

¹⁶ Гара Божая — гара Басан, гара крутая — гара Басан.

¹⁷ Што глядзіце вы з пагардаю, горы крутыя, на гару, дзе спадабалася пасяліцца Богу? Бо Госпад паселіцца навечна.

¹⁸ Калясніц Божых дзесяць тысяч тысяч: Госпад прыходзіць з Сіная ў святое месца.

¹⁹ Узышоў ты на вышыню, палоннага прывёў у палон; атрымаў людзей у падарунак, каб нават бунтаўнікі пасяліліся ў Госпада Бога.

²⁰ Дабраславёны Госпад штодня; панясе нас Бог збавенняў нашых.

²¹ Бог наш, Бог дзеля збаўлення; і ў Госпада, у Госпада — брама смерці.

²² Але ж Бог знясе галовы Сваім непрыяцелям, валасатую чупрыну — тым, хто трывае ў сваіх злачынствах.

²³ Госпад сказаў: «Ад Басана прывяду назад, выведу назад з глыбіні марской,

²⁴ каб намачылася нага твая ў крыві, каб язык тваіх сабак атрымаў кавалак ад непрыяцеляў».

²⁵ Убачылі яны шэсце Тваё, Божа, шэсце Бога майго, Цара майго, у святое месца.

²⁶ Наперадзе ішлі спевакі, апошнімі ідуць гусляры, у цэнтры — дзяўчаты з бубнамі.

²⁷ У святынях дабраслаўляйце Бога, Госпада, вы, ад вытокаў Ізраэля.

²⁸ Там маладзенькі Бэньямін, што ўладарыць імі, князі Юды з харугвай сваёю, князі Забулона, князі Нэфталі.

²⁹ Даручы, Божа, магуццю Твайму; умацуй тое, Божа, што ты стварыў у нас!

³⁰ У святыні Тваёй, у Ерузаліме, цары прынясуць Табе дары!

³¹ Напалохай звера ў трыснягу, статак быкоў сярод цялят народаў, якія хваляцца зліткамі срэбра. Разгані народы, якія імкнуцца да войнаў.

³² Хай прыйдуць магнаты з Егіпта, хай Этыёпія працягне рукі свае да Бога.

³³ Валадарствы зямныя, спявайце Богу, грайце Госпаду, грайце Богу.

³⁴ Які імкнецца паўздоўж неба нябёсаў на ўсход; вось, падасць Ён голас Свой, голас магуцця.

³⁵ Прызнайце магуцце за Богам. Вышэй за Ізраэль веліч Яго, і магуцце Яго — у аблоках.

³⁶ Дзівосны Ты, Божа, ад святога месца Твайго! Бог Ізраэля Сам надасць магуцце і моц Свайму люду. Дабраславёны Бог!