ПСАЛТЫР 67 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Кіраўніку хору. На струнах. Псальм. Песня.

² Хай злітуецца Бог над намі і падабраславіць нас; хай пралье святло аблічча Свайго над намі,

³ каб пазналі на зямлі шлях Твой, між усіх народаў — збаўленне Тваё.

⁴ Хай вызнаюць Цябе народы, Божа; хай вызнаюць Цябе народы ўсе.

⁵ Хай весяляцца і радуюцца народы, бо Ты судзіш народы ў справядлівасці і кіруеш людам на зямлі.

⁶ Хай вызнаюць Цябе народы, Божа, хай вызнаюць Цябе народы ўсе.

⁷ Зямля дала плод свой; хай дабраславіць нас Бог, Бог наш,

⁸ хай дабраславіць нас Бог, і няхай баяцца Яго ўсе канцы зямлі.