ПСАЛТЫР 62 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Кіраўніку хору. Паводле Ідытун. Псальм. Давідаў.

² Толькі ў Богу спачні, душа мая, бо ад Яго — збаўленне маё.

³ Сапраўды, Ён — прыстанішча маё і збаўленне маё, абарона мая — не пахіснуся больш.

⁴ Што вы кідаецеся на чалавека, быццам на сцяну пахілую або плот павалены, што вы ўсе руйнуеце [яго]?

⁵ Вось, задумваюць яны спіхнуць мяне з вышыні маёй, захапляюцца маной. Вуснамі сваімі дабраслаўляюць, а сэрцам праклінаюць.

⁶ Толькі ў Богу спачывае душа мая, бо ад Яго — цярплівасць мая.

⁷ Сапраўды, Ён — Бог мой і збаўленне маё, абарона мая — не пахіснуся.

⁸ У Богу — збаўленне маё і слава мая; Бог моцы маёй, і прыстанішча маё — ў Богу.

⁹ Майце надзею ў Ім, уся грамада людская, адчыніце перад Ім сэрцы вашыя; Бог — прыстанішча для нас.

¹⁰ Сапраўды, марнасць — сыны Адамавы, мана — сыны чалавечыя. Калі на шалях яны ўздымаюцца, то ўсе — лягчэйшыя за дым.

¹¹ Не спадзявайцеся на гвалт і не падманвайце сябе крадзяжом, хоць бы багацце і павялічвалася — не прыкладайце [да яго] сэрца.

¹² Раз прамовіў Бог, гэтыя дзве рэчы пачуў я: бо сіла — у Бога,

¹³ і ў Цябе, Госпадзе, — міласэрнасць; бо Ты аддаеш кожнаму па справах яго.