ПСАЛТЫР 60 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Кіраўніку хору. Паводле «Лілея закону». Міктам. Давідаў. Дзеля павучання.

² Калі ён выступіў супраць Арам-Нагараім і Арам-Соба, і калі Ёас, вярнуўшыся, перамог Эдом у Саляным лагу: дванаццаць тысяч [чалавек].

³ Адпіхнуў Ты нас, Божа, зруйнаваў нас. Ты раззлаваны. Павярніся да нас.

⁴ Ты страсянуў зямлёю, расшчапіў яе; загаі шчыліны яе, бо хістаецца.

⁵ Паказаў Ты народу Твайму цяжкасці, напаіў нас віном зменлівасці.

⁶ Тым, хто баіцца Цябе, Ты даў знак, каб уцякалі яны ад лука.

⁷ Каб уцалелі, успамажы нам правіцаю Тваёй і выслухай нас.

⁸ Прамовіў Бог у святыні Сваёй: «Узвесялюся і парозню Сіхэм і памераю лагчыну Сукот.

⁹ Мой Галаад і мой Манаса, а Эфраім — цвярдыня галавы маёй. Юда — жазло маё.

¹⁰ Мааб — посуд мой для мыцця, на Эдом пастаўлю чаравік мой, па-над Філістэяй узнясу покліч мой».

¹¹ Хто завядзе мяне ў горад абаронны? Хто адвядзе мяне аж да Эдома?

¹² Ці ж не Ты, Божа, Які адрынуў нас, ці ж не ўзвысішся Ты, Божа, сярод магуццяў нашых?

¹³ Дай нам успамогу ў бядзе, бо марнае збаўленне людское.

¹⁴ З Богам учынім мы магутнасць, і Ён стопча пераследнікаў нашых.