ПСАЛТЫР 6 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Кіраўніку хору. Для струнных іструментаў. На актаву. Псальм Давідаў.

² Госпадзе, не выкрывай мяне ў гневе Тваім, і не асуджай мяне ў абурэнні Тваім.

³ Пашкадуй мяне, Божа, бо я кволы; ацалі мяне, Божа, бо трасуцца косці мае.

⁴ І душа мая надта ўстрывожана, а Ты, Госпадзе, дакуль жа?

⁵ Павярніся, Госпадзе, вызвалі душу маю; уратуй мяне дзеля міласэрнасці Тваёй.

⁶ Бо не ёсць у смерці той, хто помніць Цябе, а ў пекле хто ж будзе Цябе славіць?

⁷ Замучыўся я ў стагнанні маім, штоноч абмываў я ложак свой, слязьмі сваімі пасцель сваю паліваў.

⁸ Змарнела ў жальбе вока маё, састарэў я сярод усіх непрыяцеляў маіх.

⁹ Адступіцеся ад мяне ўсе тыя, што чыніце злачынства, бо Госпад пачуў голас плачу майго.

¹⁰ Госпад пачуў маленне маё, бо прыняў Госпад малітву маю.

¹¹ Хай жа пасаромяцца і будуць моцна стурбаваныя ўсе непрыяцелі мае; няхай навернуцца і пасаромяцца вокамгненна.