ПСАЛТЫР 54 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Кіраўніку хору. На струнах. Маскіль. Давідаў.

² Пасля таго, як зіфейцы прыйшлі да Саўла, кажучы: «Вось, Давід у нас хаваецца».

³ Божа, збаў мяне ў імя Тваё і ў магуцці Тваім судзі мяне.

⁴ Божа, выслухай маё маленне, вушамі ўспрымі словы маіх вуснаў.

⁵ Бо пыхліўцы падняліся супраць мяне і моцныя шукалі душу маю, і не паставілі яны Бога перад сабою.

⁶ А вось Бог падтрымлівае мяне, Госпад — абаронца душы маёй.

⁷ Павярні ліха на непрыяцеляў маіх і ў праўдзе Тваёй павынішчай іх.

⁸ Добраахвотна складу я ахвяру Табе, вызнаваць буду імя Тваё, Госпадзе, бо яно добрае;

⁹ бо ўратаваў Ён мяне ад усіх бед, і на непрыяцеляў маіх глядзела з пагардай вока маё.