ПСАЛТЫР 50 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Псальм. Асафа. Бог багоў Госпад прамовіў і паклікаў зямлю ад усходу сонца аж на захад.

² З Сіёна, поўнага красы, заззяў Бог.

³ Бог наш прыйшоў і не маўчыць: агонь паглынаючы перад Ім, а вакол Яго магутная навальніца.

⁴ Кліча Ён зверху неба і зямлю, каб судзіць народ Свой:

⁵ «Збярыце да мяне святых Маіх, якія ўпарадкавалі запавет Мой праз ахвяру».

⁶ І абвяшчаюць нябёсы Яго справядлівасць, бо Бог ёсць Суддзя.

⁷ Паслухай, народзе Мой, Я буду прамаўляць! Ізраэль, Я буду сведчыць супраць цябе: «Я Бог, Я твой Бог.

⁸ Не буду вініць цябе за твае ахвяры, твае цэласпаленні заўсёды перада Мною.

⁹ Не прыму з дому твайго цялятаў ані казлоў са статкаў тваіх.

¹⁰ Бо маімі з’яўляюцца ўсе лясныя звяры, [кожная] жывёла на тысячах гор.

¹¹ Знаю Я ўсіх паднебных птушак, і тое, што на полі варушыцца, вядома Мне.

¹² Калі захачу есці, не скажу табе, бо мой увесь свет і ўсё, што яго запаўняе.

¹³ Ці ж буду Я есці мяса валовае або піць кроў казліную?

¹⁴ Складай ахвяру Богу на хвалу і перадавай твае малітвы з абяцаннямі Найвышэйшаму».

¹⁵ А тады пакліч Мяне ў дзень бяды, і Я ўратую цябе, і ты будзеш ганараваць Мяне.

¹⁶ Грэшніку ж кажа Бог: «Чаму ты распавядаеш прыказанні Мае і прымаеш запавет Мой у вусны?

¹⁷ Ты ж ненавідзіш павучанне і адкідаеш словы Мае назад.

¹⁸ Убачыўшы злодзея, ты бяжыш разам з ім і з распуснікамі ты дружыш.

¹⁹ Вусны свае распускаеш ты на непрыстойнасці, і язык твой пляце хітрыкі.

²⁰ Седзячы, гаварыў ты супраць брата твайго і зневажаў сына маці тваёй.

²¹ Гэтак ты чыніш, а Я маўчу. Ці не думаеш ты, што Я быў падобны да цябе? Я буду абвінавачваць цябе, і адкрыю гэта [ўсё] перад табою.

²² Зразумейце гэта вы, што забываеце пра Бога; калі схаплю вас Я, то не будзе каму вас ратаваць.

²³ Хто складзе ахвяру хвалы, уславіць Мяне; таму, хто беззаганны на шляху [сваім], пакажу Я збаўленне Божае».