ПСАЛТЫР 48 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Песня. Псальм. Сыноў Корэ.

² Вялікі Госпад і праслаўлены вельмі ў горадзе нашага Бога.

³ Святая гара Яго, прыгожы ўзгорак — радасць усёй зямлі. Гара Сіён, скрай поўначы, горад вялікага Валадара.

⁴ Бог у дамах яго вядомы зрабіўся як прыстанішча.

⁵ Бо сышліся цары, сабраліся, як адзін.

⁶ Калі ж самі ўбачылі, так здзівіліся, што стрывожыліся і ўцяклі.

⁷ Страх напаў там на іх і боль, быццам у парадзіхі.

⁸ Ветрам усходнім скрышыў Ты караблі Тарсіскія.

⁹ Так, як мы спачулі, так і пабачылі ў горадзе Бога Магуццяў, у горадзе нашага Бога, Бог заснаваў яго навек.

¹⁰ Мы разважаем, Божа, пра Тваю міласэрнасць пасярод святыні Тваёй.

¹¹ Як імя Тваё, Божа, так і хвала Твая — да ўскрайкаў зямлі. Правіца Твая поўная справядлівасці.

¹² Хай весяліцца гара Сіён, хай радуюцца дочкі Юды з прычыны Тваіх судоў.

¹³ Абыдзіце Сіён наўкола і абдыміце яго, палічыце яго вежы.

¹⁴ Адчуйце сэрцам вашым магуцце яго і прабяжыцеся ўздоўж дамоў яго, каб расказаць іншаму пакаленню.

¹⁵ Бо гэта і ёсць Бог, Бог наш навечна і на векі вечныя; Ён павядзе нас праз вякі.