ПСАЛТЫР 46 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Кіраўніку хору. Сыноў Корэ. Паводле «Аламот…» Песня.

² Бог — наша прыстанішча і магуцце, хуткі памочнік у нягодах.

³ Таму не пабаімся, калі б зямля захісталася і горы перанесліся ў сэрца мора.

⁴ Хай шумяць і ўздымаюцца яго воды, дрыжаць горы, здрыгануцца горы ў хваляванні Яго.

⁵ Воды ракі радуюць горад Божы, святы прыпынак Найвышэйшага.

⁶ Бог знаходзіцца ў ім, і ён не пахіснецца. Бог дапаможа яму на світанні.

⁷ Узбурыліся народы, захісталіся царствы; падаў Ён голас Свой — расцяклася зямля.

⁸ Госпад магуццяў з намі, прыстанішча наша — Бог Якубаў.

⁹ Прыходзьце і пабачце справы Божыя, якія дзівосы чыніць Ён на зямлі.

¹⁰ Ён спыняе войны аж па край зямлі. Ён трэ лукі і ламае зброю, а шчыты паліць агнём.

¹¹ Спачніце і паглядзіце, што Я — Бог: буду ўзнесены Я між народамі і буду ўзнесены Я на зямлі.

¹² Госпад магуццяў з намі, прыстанішча наша — Бог Якубаў.