ПСАЛТЫР 45 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Кіраўніку хору. На мелодыю “Лілія”. Сыноў Корэ. Маскіль, вясельная. Песня кахання.

² Вымавіла сэрца маё добрае слова, распавядаю я пра творы мае цару; язык мой — пяро пісара, які спрытна піша.

³ Прыгажэйшы ты выглядам між сыноў людскіх, разлілася ласка на тваіх вуснах, таму дабраславіў цябе Бог павечна.

⁴ Прыперажы меч твой да паясніцы тваёй, о наймагутнейшы, — гонар твой і красу!

⁵ У красе тваёй выйдзі наперад, узыдзі на калясніцу дзеля праўды, літасцівасці і справядлівасці, і хай кіруе табою мужная твая правіца,

⁶ народы падаюць перад табою. Стрэлы твае вострыя — у сэрцы ворагаў цара.

⁷ Пасад Твой, Божа, на векі вечныя, і жазло справядлівасці — жазло валадарства Твайго.

⁸ Узлюбіў Ты справядлівасць і ўзненавідзеў беззаконне, таму намасціў цябе, Божа, Бог твой алеем радасці больш за супольнікаў тваіх.

⁹ Міра, алой і касія — на ўсёй адзежы тваёй, з дамоў слановай косці лютні весяляць цябе.

¹⁰ Царскія дочкі — сярод скарбаў тваіх; стаіць царыца праваруч цябе, прыбраная ў золата з Афіра.

¹¹ Слухай, дачка, глянь і нахілі вуха тваё, і забудзься пра народ твой і пра дом бацькоў тваіх,

¹² цар прагне прыгажосці тваёй. Паколькі ён — валадар твой, пакланіся яму.

¹³ Дачка Тыру — з падарункамі, багацеі з народа шукаюць у цябе ласкавасці.

¹⁴ Надзвычайна славутая дачка цара — унутры, агорнутая залатымі тканінамі.

¹⁵ У шматколернай вопратцы прыводзяць яе да цара; дзевы, яе сяброўкі, следам за ёй ідуць да цябе.

¹⁶ Ідуць яны ў весялосці і радасці, прыводзяць іх у дом цара.

¹⁷ Месца тваіх бацькоў зоймуць твае сыны, установіш ты іх князямі над усёй зямлёй.

¹⁸ Я зраблю памятным імя Тваё з роду ў род, і дзеля таго вызнаваць Цябе будуць народы вечна і на векі вечныя.