ПСАЛТЫР 34 - Кнігі Святога Пісання - Біблія - Біблія — пераклад Чарняўскага (выданне 2017 года)

1 Давідаў.

¹ Давідаў. Калі ўдаваў сябе за змяшанага ў розуме перад Абімэлехам і пайшоў, выгнаны ім.

² АЛЕФ. Буду дабраслаўляць Госпада ўвесь час, хвала Яго заўсёды ў маіх вуснах.

³ БЭТ. Госпадам будзе выхваляцца душа мая, хай чуюць [гэта] пакорлівыя і хай радуюцца.

⁴ ГІМЭЛЬ. Узвялічвайце Госпада са мною і давайце ўзнясём імя Яго ўсе разам.

⁵ ДАЛЕТ. Пачаў я шукаць Госпада, і Ён выслухаў мяне і вырваў Ён мяне з усіх трывог маіх.

⁶ ГЭ. Зірніце на Яго — і прасвятлееце, і твары вашыя не засаромеюцца.

⁷ ДЗАЙН. Вось убогі ўсклікнуў, і Госпад выслухаў яго, і з усіх бед выратаваў яго.

⁸ ГЭТ. Анёл Госпадаў абароніць усіх тых навокал, што баяцца Яго, і вырве іх.

⁹ ТЭТ. Пакаштуйце і паглядзіце, які салодкі Госпад; шчасны чалавек, які ўсклаў надзею на Яго.

¹⁰ ЁД. Бойцеся Госпада, святыя Яго, бо няма нястачы для тых, што баяцца Яго.

¹¹ КАФ. Багатыя збяднелі і пачалі галадаць, а вось тыя, што шукалі Госпада, не будуць мець нястачы ні ў чым добрым.

¹² ЛЯМЭД. Хадзіце, сыны, слухайце мяне: навучу я вас пашане да Бога.

¹³ МЭМ. Што гэта за чалавек, які хоча жыць, шануе дзень, каб пабачыць добрае?

¹⁴ НУН. Утрымлівай язык свой ад ліха і вусны твае хай не гавораць падступна.

¹⁵ САМЭК. Адступіся ад ліха і чыні дабро, шукай спакою і імкніся да яго,

¹⁶ АЙН. бо вочы Госпада — да справядлівых, і вушы Яго — да просьбаў іх.

¹⁷ ФЭ. Але аблічча Госпада супраць тых, што чыняць ліха, каб сцерці з зямлі і памяць аб іх.

¹⁸ САДЭ. [Справядлівыя] паклікалі — і Госпад выслухаў, і вызваліў іх ад усіх бед іх.

¹⁹ КОФ. Блізкі Госпад да тых, што спакутаваны сэрцам, і пакораных духам Ён уратуе.

²⁰ РЭС. Многа бед у справядлівых, але з усіх іх уратуе іх Госпад.

²¹ СІН. Сцеражэ Ён усе косці іх, не зломіцца ні адна з іх.

²² ТАЎ. Крывадушнасць знішчыць грэшніка, і тыя, што ўзненавідзелі справядлівага, будуць пакараныя.

²³ ФЭ. Госпад адкупіць душы паслугачоў сваіх, і не будуць пакараныя ўсе тыя, што пакладаюць і Ім надзею.