ПСАЛТЫР 33 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Весяліцеся, справядлівыя, у Госпадзе; справядлівым належыцца пахвала.

² Вызнавайце Госпада на гуслях, грайце Яму на псалтыры дзесяціструннай.

³ Спявайце Яму новую песню, стройна Яму грайце з ускліканнямі.

⁴ Бо праўдзівае слова Божае, і ўсе справы Яго верныя.

⁵ Ён любіць справядлівасць і закон, зямля поўная міласэрнасці Госпада.

⁶ Словам Госпадавым створаны нябёсы і дыханнем вуснаў Яго кожная сіла іх.

⁷ Быццам у мяшок, збірае Ён воды марскія, у скарбніцах складае бяздонні.

⁸ Хай уся зямля баіцца Бога, перад абліччам Яго хай трымцяць усе жыхары свету.

⁹ Бо Ён сказаў, і сталася; Ён загадаў і стварылася.

¹⁰ Госпад разбурае намеры паганаў, пустымі робіць задумы людзей.

¹¹ Намер Госпада трывае павечна, задумы Яго сэрца з роду ў род.

¹² Шчасны той народ, для якога Госпад — гэта Бог, і той народ, які Ён выбраў Сабе ў спадчыну.

¹³ Госпад глядзіць з неба, бачыць усіх сыноў чалавечых.

¹⁴ Зірнуў Ён з месца Свайго пражывання на ўсіх тых, што насяляюць зямлю.

¹⁵ Ён, Які ўтварыў кожнаму паасобку сэрцы іх, Які разумее ўсе справы іх.

¹⁶ Не бывае вызвалены цар вялікай сілай і не вызваліцца волат дзякуючы вялікай сіле сваёй.

¹⁷ Ненадзейны конь для выратавання, і вялізнай сілай сваёй не ўратуе.

¹⁸ Вось вочы Госпада над тымі, што Яго баяцца, і да тых, якія спадзяюцца на Яго ласку.

¹⁹ Каб вырваў Ён у смерці душы іх і каб карміў іх у час голаду.

²⁰ Душа наша мае надзею на Госпада. Ён — наш памочнік і абарона,

²¹ бо ў Ім узрадуецца наша сэрца, і ў імю Яго мы знайшлі надзею.

²² Дык няхай жыве міласэрнасць Твая, Госпадзе, да нас, як і мы ўскладаем надзею на Цябе.