ПСАЛТЫР 3 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Псальм Давідаў, калі ўцякаў ад свайго сына Абсалома.

² Божа, як жа многа тых, што непакояць мяне, як шмат бунтуюцца супраць мяне!

³ Многія вось кажуць душы маёй: «Няма яму збаўлення ў Богу».

⁴ Ты ж, Госпадзе, Божа, шчыт мой, хвала мая Ты, галаву падымаеш мне ўверх.

⁵ Клічам сваім прызываў я Госпада. І выслухаў Ён мяне з гары Сваёй святой.

⁶ Я лёг і выспаўся, устаў, бо Госпад ахоўвае мяне.

⁷ Не збаюся і тысячы людзей, што навокал мяне абступілі.

⁸ Узніміся, Госпадзе! Ухавай мяне, Божа мой! Бо па шчацэ даў Ты ўсім супраціўнікам маім, павыбіваў Ты зубы грэшнікам.

⁹ У Бога бо збаўленне, і дабраславенне Тваё Твайму народу!