ПСАЛТЫР 26 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Давідаў. Прызнай мне, Госпадзе, справядлівасць, бо пачаў я хадзіць у бязвіннасці сваёй і не саслабею, спадзеючыся на Госпада.

² Выпрабуй мяне, Госпадзе, і ўчыні мне іспыт, растапі [мне] вантробы мае і сэрца маё.

³ Бо міласэрнасць Твая ў мяне перад вачамі, і жыву я ў праўдзе Тваёй.

⁴ Не сядзеў я разам з мужамі марнымі, і не ўвайду разам з тымі, што дзейнічаюць спадцішка.

⁵ Узненавідзеў я зборышча злачынцаў і з бязбожнікамі разам не сядаю.

⁶ У знак нявіннасці абмыю я рукі мае і абыду кругом ахвярнік Твой, Госпадзе,

⁷ каб адкрыць для вушэй воклічы хвалы і паведаміць пра ўсе дзівосы Твае.

⁸ Палюбіў я прыстанішча дому Твайго і месца пражывання хвалы Тваёй.

⁹ Не губі з бязбожнікамі душы маёй і з мужамі крыважэрнымі — жыцця майго.

¹⁰ На руках іх ліхадзействы, правіца іх поўная хабараў.

¹¹ Я ж пачаў хадзіць у нявіннасці сваёй, збаў мяне і пашкадуй мяне.

¹² На роўнай дарозе стаіць мая нага, славіць буду Госпада ў святынях.