ПСАЛТЫР 24 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Давідаў псальм. Госпадава зямля і што яе напаўняе, зямля і ўсе, хто жывуць на ёй.

² Бо Ён заснаваў яе на марах і ўмацаваў на рэках.

³ Хто падымецца на гару Госпадаву або хто стане на святым месцы Яго?

⁴ Бязгрэшны рукамі і чысты сэрцам, хто не ўзняў душу сваю да марнасцей і не прысягнуў падступна.

⁵ Гэтакі атрымае дабраславенне ад Бога і апраўданне ад Бога, свайго Збаўцы.

⁶ Такі вось ёсць род тых, што шукаюць Бога, тых, што шукаюць аблічча Бога Якубава.

⁷ Падыміце, брамы, вярхі вашы і расчыніцеся, брамы спрадвечныя, і ўвойдзе Валадар Славы.

⁸ Хто Ён, гэты Валадар Славы? — Госпад дужы і магутны, Госпад магутны ў бітве.

⁹ Падыміце, брамы, вярхі вашы і расчыніцеся, брамы спрадвечныя, і ўвойдзе Валадар Славы.

¹⁰ Хто Ён, гэты Валадар Славы? — Госпад магуццяў, вось хто такі Валадар Славы.