ПСАЛТЫР 21 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Кіраўніку хору. Псальм Давідаў.

² Госпадзе, цар парадуецца з магутнасці Тваёй. О, як вельмі пацешыцца ён і з Тваёй помачы!

³ Выканаў Ты жаданне сэрца яго для яго, і не адмовіў просьбе яго вуснаў.

⁴ Бо папярэдзіў Ты яго шчодрымі дабраславеннямі, усклаў на галаву яго з найчысцейшага золата вянец.

⁵ Прасіў ён жыцця ў Цябе, і Ты надзяліў [ім] яго — доўгасцю дзён навечна і на векі вечныя.

⁶ Вялікая хвала яго ва ўспамозе Тваёй, велічы і гожасці дадасі Ты яму;

⁷ бо дадасі Ты яму дабраславенне на векі вечныя, усцешыш яго радасцю перад абліччам Сваім.

⁸ Цар бо здавяраецца Госпаду і ў ласцы Найвышэйшага не пахіснецца.

⁹ Хай дасягне рука Твая ўсіх непрыяцеляў Тваіх, хай дасягне правіца Твая ўсіх ненавіснікаў Тваіх.

¹⁰ Памясці іх нібы ў печ вогненную ў час з’яўлення Твайго:

¹¹ выгубі патомства іх з зямлі і семя іх з ліку сыноў чалавечых.

¹² Бо яны задумалі супраць Цябе ліхое, учынілі нараду, — але яны не змогуць нічога.

¹³ Ты павернеш іх назад, накіруеш лук Твой у іх твар.

¹⁴ Падыміся, Госпадзе, у магутнасці Сваёй! Апяём і праславім магутнасць Тваю.