ПСАЛТЫР 2 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Чаму бунтуюцца плямёны і народы задумваюць марнае?

² Узнімаюцца цары зямлі і князі збіраюцца супольна супраць Госпада і супраць Намашчэнца Яго:

³ «Парвём кайданы іх, і ярмо іх скінем з сябе!»

⁴ Той, што жыве ў нябёсах, пасмяецца з іх, Госпад паздзекуецца з іх,

⁵ а потым скажа ім у гневе Сваім і ярасцю Сваёй узрушыць іх:

⁶ «Гэта Я паставіў Валадара Свайго на Сіёне, на святой гары Маёй!

⁷ Абвяшчу прысуд Госпадаў. Бо Ён сказаў мне: “Ты — сын Мой, Я сёння нарадзіў цябе.

⁸ Прасі Мяне, і Я дам табе ў спадчыну народы і на ўласнасць Табе зямныя прасторы.

⁹ Валадарыць будзеш імі кіем жалезным, нібы глінянае начынне скрышыш іх”».

¹⁰ А цяпер, цары, зразумейце, уцяміце [тыя], што выносіце прысуд на зямлі:

¹¹ Служыце Госпаду са страхам і радуйцеся Яму з дрыжаннем,

¹² Ушануйце Сына, каб не загневаўся і каб не папрападалі ў дарозе, калі ўзгарыцца неўзабаве гнеў Яго. Шчасныя ўсе, якія цвёрда спадзяюцца на Яго.