ПСАЛТЫР 145 - Кнігі Святога Пісання - Біблія - Біблія — пераклад Чарняўскага (выданне 2017 года)

1 Хваленні. Давіда.

¹ Хваленні. Давіда. АЛЕФ. Буду ўзвышаць Цябе, Божа мой, Валадару, і дабраслаўлю імя Тваё вечна і на векі вечныя.

² БЭТ. Кожны дзень буду дабраслаўляць Цябе і хваліць імя Тваё вечна і ў векі вечныя.

³ ГІМЭЛЬ. Вялікі Госпад і вельмі варты хвалы, і няма спасціжэння велічы Яго.

⁴ ДАЛЕТ. Пакаленне пакаленню хваліць справы Твае, і апавяшчае моц Тваю.

⁵ ГЭ. Гавораць пра ўзвышнасць славы велічнасці Тваёй і абвяшчаюць цуды Твае.

⁶ ВАЎ. І кажуць пра магуцце пострахаў Тваіх і расказваюць пра вялікасць Тваю.

⁷ ДЗАЙН. Успаміны пра невычэрпнасць лагоднасці Тваёй будуць разносіць і справядлівасці Тваёй узрадуюцца.

⁸ ГЭТ. Літасцівы і спагадны Госпад, доўгацярплівы і вялікай міласэрнасці.

⁹ ТЭТ. Ласкавы Госпад да ўсіх, і літасць Яго — над усімі справамі Яго.

¹⁰ ЁД. Хай вызнаюць Цябе, Госпадзе, усе тварэнні Твае; і святыя Твае дабраслаўляць будуць Цябе.

¹¹ КАФ. Хай кажуць пра славу Валадарства Твайго і хай гавораць пра моц Тваю,

¹² ЛЯМЭД. каб даць спазнаць сынам чалавечым моц Тваю і славу велічнасці Валадарства Твайго.

¹³ НУН. Верны Госпад ва ўсіх словах Сваіх і святы ва ўсіх справах Сваіх.

¹⁴ САМЭК. Госпад падымае ўсіх, што падаюць, і падтрымлівае ўсіх зняможаных.

¹⁵ АІН. Вочы ўсіх з надзеяй глядзяць на Цябе, і Ты дасі ім ежу ў час належны.

¹⁶ ФЭ. Ты адкрываеш руку Тваю і напаўняеш кожную жывёлу.

¹⁷ САДЭ. Госпад справядлівы на ўсіх дарогах Сваіх і святы ва ўсіх справах Сваіх.

¹⁸ КОФ. Госпад блізкі тым, што прызываюць Яго, усім, якія прызываюць Яго ў праўдзе.

¹⁹ РЭС. Спаўняе ён просьбу тых, што шануюць Яго, і пачуе іх кліканне, і збавіць іх.

²⁰ СІН. Госпад апякуецца над усімі, хто любіць Яго, а ўсіх грэшнікаў нішчыць.

²¹ ТАЎ. Хай хваляць Госпада вусны мае, і хай усякае стварэнне дабраслаўляе святое імя Яго ў векі вечныя.