ПСАЛТЫР 144 - Кнігі Святога Пісання - Біблія - Біблія — пераклад Чарняўскага (выданне 2017 года)

1 Давідаў.

¹ Давідаў. Дабраславёны Госпад, Успаможца мой; Ён навучыць бітве рукі мае, і пальцы мае — вайне.

² Міласэрнасць мая і цвярдыня мая, прыбежышча маё і вызваліцель мой; шчыт мой, і на Яго ўсклаў я надзею, Ён падпарадкаваў мне народ мой.

³ Госпадзе, што ёсць чалавек, што Ты ведаеш пра яго, або што ёсць сын чалавечы, што Ты пра яго думаеш?

⁴ Чалавек стаўся падобны да марнасці, дні яго мінаюць, як цень.

⁵ Госпадзе, нахіні нябёсы Твае і сыдзі; дакраніся да гор, і яны задымяцца.

⁶ Заззяй маланкамі і рассып іх, выпусці стрэлы Твае і перамяшай іх.

⁷ Падай руку Тваю з вышыняў, вырві мяне і вызвалі мяне ад вялікіх водаў, ад рукі сыноў іншаземных,

⁸ вусны якіх прамаўляюць марнае, і правіца іх — правіца ашуканца.

⁹ Божа, спяваць буду Табе песню новую, граць буду псальмы на дзесяціструнных гуслях.

¹⁰ Даеш Ты царам збаўленне, адкупаеш Ты Давіда, слугу Твайго, ад мяча ліхадзейнага.

¹¹ Вырві мяне і вызвалі мяне ад рукі сыноў іншаземных, вусны якіх прамаўляюць марнае, і правіца іх — правіца ашуканца.

¹² Сыны нашыя — быццам новыя парасткі ў маладосці сваёй; дочкі нашыя — як слупы гранёныя, высечаныя, як пабудова святыні.

¹³ Каморы нашыя поўныя, мноства ўсялякага дабра, авечак нашых — тысячы, незлічона [іх] на палях нашых,

¹⁴ валы нашы тлустыя. Няма абрушаных агароджаў і праходаў, няма голасу на вуліцах нашых.

¹⁵ Шчасны народ, у якога гэта ёсць; шчасны народ, у якога Госпад — Бог яго.