ПСАЛТЫР 135 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Алілуя. Хваліце імя Госпада, хваліце, слугі Госпадавы,

² вы, што стаіце ў доме Госпадавым, на дзядзінцы дому Бога нашага.

³ Хваліце Госпада, бо Госпад добры; спявайце псальмы імю Яго, бо яно мілае.

⁴ Бо Госпад выбраў сабе Якуба, Ізраэля на ўласнасць Сваю.

⁵ Бо я спазнаў, што вялікі Госпад, і Бог наш [вышэйшы] за ўсіх багоў.

⁶ Усё, што толькі захоча Госпад, здзейсніць Ён на небе і на зямлі, на моры і ва ўсіх глыбінях вадзяных.

⁷ Прыганяе хмары з канца зямлі, выклікае дождж маланкамі; выводзіць Ён вятры з клецяў Сваіх.

⁸ Ён перабіў першынцаў у Егіпце, так людзей, як і жывёлу.

⁹ Паказаў знакі і цуды пасярод цябе, Егіпет, для фараона і для ўсіх слуг яго.

¹⁰ Ён перабіў многа народаў паганскіх і забіў цароў дужых:

¹¹ Сэгона, цара амарэяў, і Ога, цара Басана і ўсе царствы Ханаанскія.

¹² А зямлю іх перадаў на пасяленне, на пасяленне Ізраэлю, Свайму народу.

¹³ Госпадзе, вечнае імя Тваё; памяць пра Цябе — на ўсе пакаленні.

¹⁴ Бо Госпад апякуецца над народам Сваім і злітуецца над слугамі Сваімі.

¹⁵ Ідалы паганаў — гэта срэбра і золата, творы рук людскіх:

¹⁶ маюць вусны, а не гавораць; маюць вочы, а не бачаць;

¹⁷ маюць вушы, а не чуюць, і няма подыху ў вуснах іх.

¹⁸ Падобнымі да іх ёсць тыя, што іх робяць, кожны, што спадзяюцца на іх.

¹⁹ Доме Ізраэля, дабраслаўляйце Госпада; доме Аарона, дабраслаўляйце Госпада;

²⁰ доме Леві, дабраслаўляйце Госпада; вы, што шануеце Госпада, дабраслаўляйце Госпада!

²¹ Дабраславёны Госпад з Сіёна, Які жыве ў Ерузаліме. Алілуя.