ПСАЛТЫР 132 - Кнігі Святога Пісання - Біблія - Біблія — пераклад Чарняўскага (выданне 2017 года)

1 Песня ўзыходжання.

¹ Песня ўзыходжання. Госпадзе, памятай пра Давіда і пра ўсю пакорлівасць яго:

² бо прысягнуў ён Госпаду, даў абяцанне Магутнаму Якубаву:

³ «Не ўвайду ў шаты дому свайго, не ўздымуся на ложа пасцелі маёй,

⁴ не дам сну вачам маім і павекам маім,

⁵ пакуль не знайду месца для Госпада, палаткі для Магутнага Якубава».

⁶ Вось, пачулі мы пра той самы [каўчэг], вось, у Эфраце, знайшлі мы яго на палях Яар.

⁷ Увойдзем у палатку Яго, аддадзім паклон ля падножжа ног Яго.

⁸ Уздыміся, Госпадзе, да месца супачынку Твайго, Ты і каўчэг Тваёй моцы.

⁹ Хай святары Твае адзенуцца ў справядлівасць, а святыя Твае радуюцца.

¹⁰ Дзеля Давіда, паслугача Твайго, не адварочвай аблічча ад намашчэнца Твайго.

¹¹ Прысягнуў Госпад Давіду праўду, і не адступіць ад яе: «Ад плода сцёгнаў Тваіх пасаджу на пасад Твой.

¹² Калі сыны твае захаваюць запавет Мой і сведчанні Мае, якім навучу Я цябе, то і сыны іх вечна будуць сядзець на пасадзе тваім».

¹³ Бо Госпад выбраў Сіён і пажадаў яго Сабе на паселішча:

¹⁴ «Гэта спачынак Мой на векі вечныя; тут буду жыць, бо пажадаў яго.

¹⁵ Дабраслаўляючы, дабраслаўлю ежу яго, бедных яго накармлю хлебам.

¹⁶ Святароў яго адзену ў збаўленне, і святыя яго будуць вельмі радавацца.

¹⁷ Тут вырашчу рог Давіда, прыгатую светач для Майго Намашчэнца.

¹⁸ Непрыяцеляў яго пакрыю сорамам, а над ім будзе зіхацець вянец яго».