ПСАЛТЫР 118 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Алілуя. Вызнавайце Госпада, бо Ён добры, бо вечная міласэрнасць Яго.

² Хай кажа цяпер дом Ізраэля, што Ён добры, што вечная міласэрнасць Яго.

³ Хай кажа цяпер дом Аарона, што вечная міласэрнасць Яго.

⁴ Хай кажуць цяпер тыя, што шануюць Госпада, што вечная міласэрнасць Яго.

⁵ У бядзе я звярнуўся да Госпада, і выслухаў мяне Госпад, Які выводзіць на прастору.

⁶ Госпад — Успаможца мой; не збаюся, бо што зробіць мне чалавек?

⁷ Госпад са мною, і я з пагардаю зірну на непрыяцеляў маіх.

⁸ Лепш бегчы да Госпада, чым спадзявацца на чалавека.

⁹ Лепш бегчы да Госпада, чым давярацца князям.

¹⁰ Усе паганы абступілі мяне кругом, і вынішчыў я іх у імя Госпада.

¹¹ Абступаючы, акружаюць яны мяне, і вынішчыў я іх у імя Госпада.

¹² Акружылі мяне, як пчолы, і ўзгарэліся, як агонь у цернях; і вынішчыў я іх у імя Госпада.

¹³ Піхаючы, штурхалі мяне, каб я паваліўся, і Госпад успамог мне.

¹⁴ Цвярдыня мая і хвала мая — Госпад, і стаўся Ён збаўленнем для мяне.

¹⁵ Гоман услаўлення і збаўлення чуецца ў палатках справядлівых:

¹⁶ «Правіца Госпада стварае магутнасць, правіца Госпада ўзвышае мяне, правіца Госпада стварае магутнасць!»

¹⁷ Не памру я, але буду жыць і раскажу пра справы Госпада.

¹⁸ Караючы, пакараў мяне Госпад, але смерці мяне не аддаў.

¹⁹ Адчыніце мне брамы справядлівасці; увайшоўшы праз іх, вызнаваць буду Госпада.

²⁰ Гэта брама Госпада, справядлівыя ўвойдуць праз яе.

²¹ Буду вызнаваць Цябе, бо Ты выслухаў мяне і стаўся збаўленнем для мяне.

²² Камень, які адкінулі будаўнікі, ён стаўся галавою вугла.

²³ Ад Госпада гэта сталася, і дзіўна ў вачах нашых.

²⁴ Вось жа дзень, які ўчыніў Госпад: давайце радавацца і весяліцца ў ім.

²⁵ О, Госпадзе, збаў мяне, о, Госпадзе, дай шчаслівае жыццё!

²⁶ Дабраславёны, хто прыходзіць у імя Госпада. Дабраслаўляем вас з дому Госпада.

²⁷ Бог — Госпад, і Ён асвятліў нас. Падрыхтуйце ахвяру з густым веццем аж да рагоў ахвярніка.

²⁸ Ты — мой Бог, і я буду вызнаваць Цябе, Божа мой, і буду ўзвышаць Цябе.

²⁹ Вызнавайце Госпада, бо Ён добры, бо вечная міласэрнасць Яго.