ПСАЛТЫР 113 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Алілуя. Хваліце, слугі Госпадавы, хваліце імя Госпада.

² Хай будзе імя Госпада дабраслаўлёна з [гэтага] часу, цяпер і вечна.

³ Ад усходу сонца і да захаду яго хай будзе ўслаўлена імя Госпада.

⁴ Госпад узвышаны над усімі народамі, слава Яго над нябёсамі.

⁵ Хто ж, як Госпад Бог наш, Які жыве на вышынях?

⁶ І схіляецца, каб пазіраць на неба і на зямлю?

⁷ Падымае Ён з зямлі ўбогага, з гною выцягвае беднага,

⁸ каб памясціць яго з князямі, з князямі народа Свайго.

⁹ Ён робіць так, што няплодная пасяляецца ў доме як маці, што радуецца сынам.