ПСАЛТЫР 106 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Алілуя. Вызнавайце Госпада, бо Ён добры, бо навек міласэрнасць Яго.

² Хто раскажа пра магутнасці Госпада, хто дасць пачуць усе хвалы Яго?

³ Шчасныя тыя, што выконваюць прыказанні, якія чыняць справядлівасць увесь час.

⁴ Помні пра нас, Госпадзе, у спагаднасці да Твайго народа наведай нас збаўленнем Тваім,

⁵ каб убачылі мы даброты выбраннікаў Тваіх, каб узвесяліліся мы весялосцю народа Твайго, каб ганарыліся Тваёй спадчынай.

⁶ Награшылі мы разам з продкамі нашымі, жылі не па праўдзе, учынілі несправядлівасць.

⁷ Нашы бацькі ў Егіпце не зразумелі Тваіх цудаў, не помнілі вялікай міласэрнасці Тваёй і злосна кпілі, выходзячы ў мора, мора Чырвонае,

⁸ але захаваў Ён іх дзеля Свайго імя, каб даць спазнаць моц Сваю.

⁹ Пагразіў Ён Чырвонаму мору, і высахла, і павёў іх між хваль, як па пустыні.

¹⁰ І збавіў іх ад рукі нахабніка; і вызваліў іх ад ворага.

¹¹ І пакрыла вада іх праціўнікаў, ані адзін з іх не застаўся.

¹² І паверылі словам Яго, і спявалі на хвалу Яго.

¹³ Але тут жа забыліся пра справы Яго і не прынялі парады Яго.

¹⁴ І разгарэліся пажаднасцю ў пустыні, і спакушалі Бога на бязводдзі.

¹⁵ І даў Ён ім паводле просьбы іх, і паслаў насычанасць у душы іх.

¹⁶ І зайздросцілі Майсею ў лагеры, Аарону, святому Госпада.

¹⁷ Расступілася зямля і праглынула Датана і пакрыла зборышча Абірама.

¹⁸ І ўспыхнуў агонь у скопішчы іх, полымя спаліла грэшнікаў.

¹⁹ І зрабілі яны цялё пры Гарэбе і пакланяліся перад ідалам.

²⁰ І замянілі хвалу сваю падабенствам быка, што паядае сена.

²¹ Забыліся пра Бога, Які збавіў іх, Які чыніў нязвыкласці ў Егіпце,

²² цуды на зямлі Хама, страшныя дзівосы каля Чырвонога мора.

²³ І сказаў Ён, што вынішчыць іх, каб не Майсей, выбраннік Яго: ён стаў перад Ім у расколіне, каб адвёў гнеў Свой, не губіў іх.

²⁴ І за нішто палічылі яны зямлю пажаданую, не паверылі слову Яго,

²⁵ І марматалі ў сваіх палатках, не слухалі голасу Госпада.

²⁶ І ўзняў Ён руку Сваю на іх, каб пакласці іх ніцма ў пустыні

²⁷ і каб раскідаць патомства іх між народамі, і рассыпаць іх па ўсёй зямлі.

²⁸ І прыгарнуліся яны да Баал-Пэгора, і з’елі ахвяры мёртвых.

²⁹ І ўгнявілі Яго сваімі [ліхімі] задумамі, і спала на іх пляга.

³⁰ Тады паўстаў Пінхас і ўчыніў суд, і спынілася пляга.

³¹ І залічана яму гэта за справядлівасць на ўсе пакаленні аж на век.

³² І ўгнявілі Яго каля водаў Мэрыбы, і праз іх прыйшла бяда на Майсея,

³³ бо яны раз’ятрылі дух яго, і пачаў прамаўляць ён неабдуманае вуснамі сваімі.

³⁴ Не вынішчылі паганаў, пра якіх сказаў ім Госпад,

³⁵ а памяшаліся яны з паганамі і навучыліся справам іх.

³⁶ І пачалі служыць іх балванам, і сталася [гэта] пасткай для іх.

³⁷ Ды складалі ў ахвяру сыноў сваіх і дочак сваіх дэманам.

³⁸ І пралілі нявінную кроў, кроў сыноў сваіх і дочак сваіх, якіх ахвяравалі балванам ханаанскім, і зямля спаганена была кроўю,

³⁹ і спракудзіліся сваімі справамі, і сваімі паводзінамі парушылі прымірэнне.

⁴⁰ І ўзгарэўся гнеў Госпадаў на народ Яго, і ўзненавідзеў Ён спадчыну Сваю.

⁴¹ І выдаў іх у рукі паганам, і запанавалі над імі тыя, што іх ненавідзелі.

⁴² І прыгняталі іх непрыяцелі іх, і прыніжаны былі іх рукой.

⁴³ Часта вызваляў Ён іх, але яны гнявілі Яго сваімі намерамі і гінулі дзеля несправядлівасцей сваіх.

⁴⁴ Але глянуў Ён на іх бяду, калі пачуў лямант іх.

⁴⁵ І ўспомніў на шчасце іх пра запавет Свой і пашкадаваў іх паводле бязмежнай міласэрнасці Сваёй.

⁴⁶ І будзіў Ён літасць да іх ва ўсіх, якія іх няволілі.

⁴⁷ Збаў нас, Госпадзе Божа наш, і забяры нас з-паміж народаў, каб мы вызнавалі святое імя Тваё і ўслаўляліся славай Тваёю.

⁴⁸ Дабраславёны Госпад Бог Ізраэля ад веку і да веку! І скажа ўвесь народ: «Амін, амін!»