ПСАЛТЫР 105 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Вызнавайце Госпада і прызывайце імя Яго, абвяшчайце між народамі пра справы Яго.

² Спявайце Яму і грайце псальмы Яму, апавядайце пра ўсе Яго цуды.

³ Пахваляйцеся іменем святым, хай цешыцца сэрца тых, што шукаюць Госпада.

⁴ Шукайце Госпада і магутнасці Яго, аблічча Яго шукайце заўсёды.

⁵ Памятайце пра цуды Яго, якія ўчыніў, знакі Яго і прысуды Яго вуснаў.

⁶ Патомства Абрагамава, слугі Яго, сыны Якубавы, выбраннікі Яго.

⁷ Ён, Госпад Бог наш; па ўсёй зямлі суды Яго.

⁸ Памятае Ён вечна пра Свой запавет, пра абяцанне, якое даў Ён на тысячу пакаленняў,

⁹ на прымірэнне, якое ўсталяваў Ён з Абрагамам, і пра прысягу Сваю Ізааку.

¹⁰ Устанавіў Ён гэта для Якуба, як закон для Ізраэля, як вечнае прымірэнне,

¹¹ кажучы: «Табе дам зямлю Ханаан, як шнур спадчыны вашай»,

¹² калі былі лікам малымі, вельмі нешматлікімі і прыхаднямі ў ёй

¹³ і вандравалі ад племя да племя і ад валадарства да другога народа,

¹⁴ не дазволіў Ён, каб [які] чалавек крыўдзіў іх і пакараў за іх цароў:

¹⁵ «Не чапайце намашчэнцаў Маіх і прарокам Маім не рабіце зла».

¹⁶ А потым наклікаў голад на зямлю, і змарнаваў увесь запас хлеба.

¹⁷ Паслаў перад імі чалавека; у няволю быў прададзены Язэп.

¹⁸ Сціснулі кайданамі ногі яму, у жалеза ўвайшла шыя яго,

¹⁹ пакуль не надышло слова Яго, пакуль прамова Госпада не ачысціла яго.

²⁰ Паслаў цар і вызваліў яго, валадар народаў даў яму волю;

²¹ устанавіў яго гаспадаром над сваім домам і князем над ўсёй сваёй маёмасцю,

²² каб вучыў ён князёў яго паводле волі сваёй і каб яго старцаў навучаў мудрасці.

²³ І ўвайшоў Ізраэль у Егіпет, і Якуб стаў прыхаднем у зямлі Хама.

²⁴ І Ён размножыў вельмі народ Свой і зрабіў яго мацнейшым за яго непрыяцеляў.

²⁵ І павярнуў Бог іх сэрца, каб у нянавісці мелі народ Яго і каб хітрасць чынілі супраць слуг Яго.

²⁶ Паслаў Ён Майсея, слугу Свайго, Аарона, якога абраў.

²⁷ Паклаў Ён на іх словы знакаў Сваіх і цудаў у зямлі Хама.

²⁸ Наслаў цемру і зрабіў цёмна, але яны працівіліся словам Яго.

²⁹ Перамяніў воды іх у кроў і вынішчыў іх рыбаў.

³⁰ Спарадзіла іх зямля жабаў аж да пакояў цароў іх.

³¹ Сказаў Ён, і прыляцела хмара мух, і скініфы — па ўсіх межах іх.

³² Учыніў Ён ім град замест дажджу і агонь палымяны ў зямлі іх.

³³ Пабіў вінаград іх і фігі іх і панішчыў дрэвы ў іх межах.

³⁴ Сказаў, і нахлынула саранча і вусені, якім не было падліку.

³⁵ І пажэрла яно ўсю траву ў іх зямлі, і пажэрла яно плод зямлі іх.

³⁶ І пабіў усіх першародных у зямлі іх, пачаткі ўсёй сілы іх.

³⁷ І вывеў іх з серабром і золатам, і не было ў іх пакаленні хворага.

³⁸ Узвесяліўся Егіпет з выхаду іх, бо паў на іх страх дзеля Ізраэльцаў.

³⁹ Расцягнуў Ён хмару, нібы покрыва, і агонь, каб свяціў ім уночы.

⁴⁰ Прасілі, і прыляцела перапёлак, і хлебам з неба карміў іх.

⁴¹ Рассек скалу, і паплылі воды, і пацяклі рэкі ў пустыню.

⁴² Бо помніў Ён Сваё святое слова да Абрагама, слугі Свайго.

⁴³ І вывеў Свой народ у радасці, выбраннікаў Сваіх — з весялосцю.

⁴⁴ І даў ім землі паганаў, і авалодалі яны працаю народаў,

⁴⁵ каб захоўвалі прыказанні Яго і законы Яго выконвалі. Алілуя.