ПІЛІПЯНАЎ 4 - Кнігі Святога Пісання - Біблія - Біблія — пераклад Чарняўскага (выданне 2017 года)

¹ Гэтак, браты мае найдаражэйшыя і вельмі пажаданыя, радасць і вянок мой, стойце так у Госпадзе, улюбёныя.

² Эводыю прашу і Сынтыхею ўмольваю гэтаксама думаць у Госпадзе.

³ Таксама і цябе прашу, сапраўдны супрацоўніку, дапамагай ім, тым, якія са мною працавалі для Евангелля разам з Клементам і іншымі памочнікамі маімі, імёны якіх упісаны ў кнігу жыцця.

⁴ Радуйцеся ў Госпадзе заўсёды. Яшчэ раз кажу: радуйцеся!

⁵ Ціхасць ваша хай будзе вядомай усім людзям. Госпад блізка.

⁶ Не турбуйцеся ні аб чым, але ў кожнай малітве і просьбе з падзякаю няхай адкрываюцца жаданні вашы перад Богам.

⁷ І супакой Божы, які вышэй за ўсякае разуменне, хай сцеражэ сэрцы вашы і думкі вашы ў Хрысце Ісусе.

⁸ Урэшце, браты, што толькі ёсць праўдзівае, што толькі сумленнае, што толькі справядлівае, што толькі чыстае, што толькі любае, што толькі добрай славы, ці якая цнота, ці што пахвальнае, – тое майце на думцы.

⁹ І тое рабіце, чаму вы ад мяне навучыліся, што атрымалі, што пачулі і што ўбачылі; і Бог супакою будзе з вамі.

¹⁰ Дужа ўзрадаваўся я ў Госпадзе, што вы ўжо калісьці зноў пачалі думаць пра мяне, як раней думалі, але былі ў клопатах.

¹¹ Не кажу я гэтага з прычыны недахопу, бо я навучыўся задавольвацца тым, што ёсць.

¹² Умею і ў прыніжэнні быць, умею і ў дастатку; усяму і ва ўсім навучыўся: і наесціся, і галадаць; і мець дастатак, і нястачу.

¹³ Усё магу ў Хрысце, Які ўзмацняе мяне.

¹⁴ Аднак жа добра вы зрабілі, успамагаючы бядзе маёй.

¹⁵ Вы ж, піліпцы, ведаеце, што на пачатку Евангелля, калі я пакінуў Мацэдонію, ні адна з цэркваў, апрача вас, не ўзяла ўдзелу ў даванні і прыманні;

¹⁶ вы і ў Тэсалоніку раз ці два прысылалі на мой ужытак.

¹⁷ Не шукаю я дарункаў, але шукаю плода, які памнажаецца на вашу карысць.

¹⁸ Я ўсё атрымаў і хапае мне ўсяго; я напоўніўся, атрымаўшы ад Эпафрадыта салодкі водар, які вы даслалі, ахвяру прыемную, мілую Богу.

¹⁹ Хай жа Бог мой споўніць усякае ваша жаданне паводле багацця Свайго ў славе, у Хрысце Ісусе.

²⁰ Богу ж і Айцу нашаму слава на векі вечныя. Амін.

²¹ Прывітайце кожнага святога ў Хрысце Ісусе. Вітаюць вас браты, якія са мною.

²² Вітаюць вас усе святыя, а найбольш тыя, якія з дому цэзара.

²³ Ласка Госпада нашага Ісуса Хрыста з усімі вамі. Амін.